TIBƆKPIIRKAAN 19

1Nimina aapuwɔb le m ŋun nneel mu naahn kinipaak saakpeŋ na aaneel paacham. Bi len ke "Haleluya! Tidindaan Uwumbɔr le cha ti ŋmar. Uma le yeh nnyuŋ ni mpakm ni mpɔɔn. 2U ji binib tibɔr mbamɔm ki ŋa bi baah ŋeer pu na. U ji upiidaagookpaan u nan cha dulnyaa aanib gɔr kidaagook na aabɔr, ki daa utafal; ba pu? u nan ku Uwumbɔr aatutuliib." 3Le kinipaak bi bi paacham na ki len ke "Haleluya! Iŋmanyu nyan kitiŋ ngbaan ki ga fii paacham n-yoonn mu kaa kpa ndoon na." 4Le bininkpiib moninko ni binaa ngbaan, ni tiwanfuurkaan ninaa ngbaan gbaan kitiŋ le ki pak Uwumbɔr u ka libɔrjal pu na, le ki len ke "Amii! Haleluya!" 5Le nneel nyan libɔrjal chee ki len ke "Nimi bimɔk ye timi Aawumbɔr aatutuliib ki san u na, biwaatiib ni bipɔɔndam, ni mɔmɔk pak u man." 6Le m ŋun nneel mu naahn kinipaak saakpeŋ aaneel na, ki naahn bunyɔb saakpem aanyun aah fuuk pu na, ki fuuk ke utaal aah teen mpɔɔn pu na, ki len ke "Haleluya! Dandana wee Tidindaan Uwumbɔr u kpa mpɔɔn mɔmɔk na ga ji waanaan binib aanimbil ni. 7Cha ti li mɔɔni ki li kpa mpopiin saakpen ki nyuŋ u; ba pu? ni ŋeer Upihbo ngbaan yoor upuu u ye waanib na. Le bi gor bibaa. 8Uwumbɔr tii bi ŋikeken nyaan ŋi bi chain ki wiin na, bi di peen." (Ŋikeken nyaan ngbaan le ye waanib aatuln nyaan.) 9Le Uwumbɔr aatuun ngbaan bui mi, "Ŋmee ke: Binib bi Uwumbɔr yin bi ke bin dan ki nan ji Upihbo ngbaan aabɔndinn aajikaar na, Uwumbɔr aanyoor bi bi pu." Le Uwumbɔr aatuun ngbaan ki len ke "Uwumbɔr aaliin i ye mbamɔn na le na." 10Le m gbaan kitiŋ utaafar chee, le ki ban ke m pak u. Le u bui ke m taa ŋa kena; ba pu? u mu po ye m ni nnaabitiib bi joo Yesu aaliin na aatutuŋeer, ke m pak Uwumbɔr baanja. Tɔ, Uwumbɔr aabɔnabtiib aah len pu na le ye Yesu aabɔr. 11Le m kan kitaapaak chuu piir, ki kan utaapiin. Un dik u pu na aayimbil ye, "U ŋani waah puu tipuul ti na la" ki ki ye, "U len mbamɔn na la." U ji binib tibɔr baah ŋeer pu na, ki nyaŋ waadim, ki kpa mbamɔn la. 12Unimbil wɔb wiin ke mmiigaal na. Ubɔr aayikpupur ti wiir na bi uyil pu. Waayimbil ŋmee u pu. Ubaa aa nyi liyimbil ngbaan see uma baanja. 13U pee kikpalk ki mɔɔn nsin ni na. Bi yi u ke "Uwumbɔr Aaliin." 14Le Uwumbɔr aatuuntiib bi bi paacham na paan upuwɔb, ki dik itaanpiin pu, ki pee ŋikekepiin ŋi ŋan ki bi chain na. 15Le kpaacha u ka na bi umɔb ni, ke un ti nyaŋ ŋinibol mɔmɔk. U ga li joo bi mpɔɔn pu, ki ga bii bi ke binib aah taa ŋisubil pu ki nyan ŋaanyun pu na; ba pu? Uwumbɔr u yeh mpɔɔn mɔmɔk na gee liŋuul saakpen bi pu la. 16Ŋiyimbil ŋmee waakpalk pu ki ŋmee utaapaln mu pu. Ŋi ye "Bibɔrb mɔmɔk Aabɔrkpaan ni dindaatiib mɔmɔk Aadindaan." 17Le m kan Uwumbɔr aatuun ubaa si nwiin ni. Le u teen mpɔɔn pu ki yin inyoon imɔk laani paacham na, ke i dan ki nan ji tijikaar saakpen ti Uwumbɔr ga tii i na, 18ti ye bibɔrb aawon, ni sujatiib aaninkpiib aawon, ni bipɔɔndam aawon, ni itaan aawon, ni bin dik i pu na aawon, ni binib mɔmɔk aawon, bin ye binaagbiib ni bimalb, ni bin ye biwaatiib ni bin ye bipɔɔndam na aawon. 19Le m kan upeel ngbaan, ni dulnyaa aabɔrb ni baasujatiib, bi mɔmɔk kuun tɔb chee, bin ti to Yesu u dik utaan pu na, ni waatuuntiib butɔb. 20Le bi chuu upeel ngbaan ni waabɔnabr u nan tun lijinjiir aatun unimbiin ni ki ŋmanni binib bi nan gaa upeel ngbaan aadaan ki dii waawaal na. Bi chuu upeel ngbaan ni waabɔnabr ngbaan ki di ŋa cheribir aamii saakpiin ni, bi beenin fu. 21Le Yesu u dik utaan ngbaan pu na di kpaacha u bi umɔb ni na ki ku baasujatiib ngbaan mɔmɔk. Le inyoon mɔmɔk jin baawon ki bab.

will be added

X\