TIBƆKPIIRKAAN 16

1Le m ŋun nneel saakpiin nyan Uwumbɔr aadiik ni, ki tuk Uwumbɔr aatuuntiib bilule ngbaan, "Li cha ti di falaa u bi ŋisambil ŋilule ni na, ki di kpir dulnyaa ni; ba pu? Uwumbɔr gee liŋuul ki ŋa bi." 2Le Uwumbɔr aatuun ubaa buen ki di falaa u bi waasambil ni na ki di kpir dulnyaa ni. Le ni ŋa ibuun i wu saakpen na ki baan binib bi kpa upeel ngbaan aadaan ki dii waawaal na pu. 3Le Uwumbɔr aatuun leeler mu di falaa u bi waasambil ni na, ki di kpir nnyusaakpem ponn ni. Le nnyusaakpem ngbaan aanyun kpaln nsin ke lininkpol aasin na. Le tiwan nimɔk bi nnyusaakpem ponn ni na kpo a. 4Le Uwumbɔr aatuun taatar mu di falaa u bi waasambil ni na, ki di kpir ŋimɔɔ ni, ni inyumbun ni. Le nnyun ngbaan kpaln nsin. 5Le m ŋun Uwumbɔr aatuun u ye nnyun aayidaan na len ke "Uwumbɔr u ye chaindaan, ki nan bi, ki beenin bi na, saah daa binib ngbaan aatafal kena na, aa ŋa ni ŋan; 6ba pu? bi ku saanib ni saabɔnabtiib ki cha baasin nyan, le aa mu cha baanyun kpaln nsin bin nyu. Bi ŋeer kena la." 7Le m ŋun nneel nyan kitork aabimbiln ni ki len ke "Tidindaan Uwumbɔr, u yeh mpɔɔn mɔmɔk na, ni ye mbamɔn, aa ji binib tibɔr mbamɔm ki ŋa bi baah ŋeer pu na." 8Le Uwumbɔr aatuun naanar mu di falaa u bi waasambil ni na, ki di kpir nwiin pu. Le Uwumbɔr cha mu seer binib ke mmii aah seer pu na. 9Le ntoton saakpen seer binib. Le bi sii Uwumbɔr u kpa mpɔɔn ki cha bi ji falaa kena na. Baa kpeln baabimbin, kaa nyuŋ u. 10Le Uwumbɔr aatuun ŋmuŋmur mu di falaa u bi waasambil ni na ki di kpir upeel ngbaan aabɔrjal pu. Le waanaan bɔln. Le binib junni bilambil iween pu. 11Iween ngbaan pu ni ibuun ngbaan pu le bi sii Uwumbɔr u bi paacham na, kaa kpeln baabimbin, kaa di cha baatunwambir. 12Le Uwumbɔr aatuun luluub mu di falaa u bi waasambil ni na, ki di kpir limɔɔl saakpeln bi yi li ke Yufretes na ni. Le laanyun foor a, ki ŋa nsan ki tii bibɔrb bi nyan ni liwipuul wɔb na. 13Le m kan tiyaayar titaa, ti naahn titaateeraakpaln na. Ti nyan ni kipeewambiik, ni upeel, ni waabɔnabr aamɔb ni la. 14Tiyaayar ngbaan ye Kinimbɔŋ yaan, le ki tun lijinjiir aatun, ki buen dulnyaa wee ni aabɔrb mɔmɔk chee, ki ti kuun bi, bin ti to butɔb, Uwumbɔr u yeh mpɔɔn mɔmɔk na aawiinsaakpiin daal. 15Tiyaayar ngbaan kuun bi lipepel libaa wɔb. Juu yaab aaliin ponn ni bi yi nima chee ke Amagedon. Le Yesu bui ke "Li pel man, m ga dan ke unaayuk aah choo pu na. Uwumbɔr aanyoor bi binib bi si kii bundaln m ga fuu ni na, ki lik baawanpeenkaan ke bi taa chuun bi ŋmeen, ki taa ji inimɔɔn." 17Le Uwumbɔr aatuun lulule mu di falaa u bi waasambil ni na, ki di kpir libuln pu. Le nneel saakpiin nyan ni Uwumbɔr aabɔrjal li bi waadiik ni na, ki len, "Ni ŋa doo a." 18Le utaal moor, le kifuuk faa, le utaal teen, le kitiŋ deŋ saakpen ki ti nyaŋ. Uwumbɔr aah nan naan binib buyoonn na, kitiŋ aa nan deŋ saakpen ke kaah deŋ n-yoonn ngbaan saakpen pu na. 19Le kitisaakpeŋ ngbaan aadir mɔmɔk yakr mfim mutaa ki lir kitiŋ. Ŋinibol mɔmɔk aatim mu lir kitiŋ a; ba pu? Uwumbɔr aa sunn kitisaakpeŋ ngbaan Babilon aanib aatunwambir, ki gee liŋuul saakpen bi pu, ki daa bitafal kena. 20Le ŋiyik mɔmɔk fii, le ŋijoo mɔmɔk lir. 21Le utaal nu ŋitaatakpabil saakpiin, ki lir binib pu. Le ŋi mɔmɔk nyuun ke bɔtɔ mam aah nyuun pu na. Le binib sii Uwumbɔr ŋitaatakpabil ngbaan pu; ba pu? ŋi ŋa bi falaa pam.

will be added

X\