TIBƆKPIIRKAAN 14

1Tɔ, le m kan Upihbo ngbaan si Sion aajool paab. Binib ŋichur nkub ni imonko ilee ni ŋinaa bi u chee, ki kpa waayimbil ni Ute Uwumbɔr aayimbil biyigbeer pu. 2Le m ŋun binib gaa ilahn paacham. Ni fuuk ke bunyɔb aanyun aah fuuk pu na, ki fuuk ke utaal aah teen mpɔɔn pu, pu na, ki naahn binib aah gbaa tibar aah wii pu na. 3Binib ngbaan bi Uwumbɔr aabɔrjal, ni tiwanfuurkaan ninaa, ni bininkpiib aanimbiin ni, ki gaa ilahnpɔɔn. Ubaa aan ŋma bae nlahn ngbaan see binib ŋichur nkub ni imonko ilee ni ŋinaa ngbaan bi Uwumbɔr daa bi ki nyan bi dulnyaa wee ni na. 4Bi bi chain ke usaapɔɔn u kaa nyi uja na; ba pu? baa dii tiwan nibaa see Yesu baanja. Bima le dii Upihbo ngbaan waah cha nin chee na mɔmɔk. Uwumbɔr nyan bi binib ponn ni ki daa bi, bi li ye u ni Upihbo ngbaan aanib. 5Nnyaamɔn mubaa aa bi bimɔi ni. Baa kpa taani ubaa. 6Le m kan Uwumbɔr aatuun uken laani paacham, ki joo ni tibɔnyaan ti bi n-yoonn mu kaa kpa ndoon na, ki ti tuk ŋitimbol mɔmɔk aanib bi bi dulnyaa wee ni ki len iliin imɔk bi dulnyaa wee ni na. 7Le Uwumbɔr aatuun ngbaan len mpɔɔn pu, "Ni li san Uwumbɔr, ki nyuŋ u man; ba pu? ni ŋeer un ji binib tibɔr. Ni li pak Uwumbɔr u nan naan paacham, ni kitiŋ, ni nnyusaakpem, ni nnyun mɔmɔk na." 8Le Uwumbɔr aatuun leeler mu paan njan yoo aapuwɔb le ki len ke "Kitisaakpeŋ Babilon lir a. Kitiŋ ngbaan pu le ŋinibol mɔmɔk aanib nan tun titunwambir. Le Uwumbɔr gee liŋuul bi pu." 9Le Uwumbɔr aatuun taatar mu paan uleeler aapuwɔb le ki len mpɔɔn pu ke "Binib bimɔk dii upeel ngbaan ni liwaal li naahn u na ki gaa waadaan biyigbeer pu, bee biŋaal pu na, 10Uwumbɔr ga gee liŋuul bi pu. U ga gee liŋuul saakpen kaan san bi kinimbaak. Bi ga li bi Uwumbɔr aatuuntiib bi bi chain na, ni Upihbo ngbaan aanimbiin ni, ki ga ji falaa saakpen mmii ni cheribir ponn ni. 11Iŋmanyu nyan mmii ngbaan ni ki fii paacham. Binib bi dii upeel ngbaan ni liwaal li naahn u na, ki gaa waadaan ki ye waayimbil na, bi ga ji falaa mmii ngbaan ponn ni n-yoonn mu kaa kpa ndoon na. Baan fuur nwiin pu, kaan fuur kinyeek." 12Nima le cha Uwumbɔr aanib bi kii waamɔb ki gaa Yesu ki kii na kpa limɔr. 13Le m ŋun nneel len paacham, "Ŋmee ke: Bitekpiib bi nan dii Tidindaan na, waanyoor bi bi pu dandana wee ki joo cha." Le Uwumbɔr Aafuur nyaan kii ke "Ni ye mbamɔn; ba pu? bi nan tun lituln nyaan linimaln. Baah kpo na, le bi fuur. Baah tun pu na mu dii bi." 14Le m kan ntaalangbapiin. Ubaa ka mu pu ki naahn unii, ki chik salmaa aayikpupuk, ki joo gɔrk u ka na uŋaal ni. 15Le Uwumbɔr aatuun uken nyan Uwumbɔr aadichal ni, ki len mpɔɔn pu ki tuk un ka kitaalangbaŋ pu na, "Di saagɔrk ki chee tijikaar; ba pu? ni ŋeer lijikaacheer. Dulnyaa aajikaar biir a." 16Le un ka kitaalangbaŋ pu na di waagɔrk ki chee dulnyaa aajikaar. 17Le Uwumbɔr aatuun uken nyan Uwumbɔr aadichal li bi paacham na. U mu joo gɔrk u ka na. 18Le Uwumbɔr aatuun uken nyan kitork aabimbiln chee. Uma le ye mmii aayidaan. Le u teen mpɔɔn pu ki tuk Uwumbɔr aatuun u joo gɔrk u ka na, "Di saagɔrk u ka na ki ker ŋisubil ŋi bi wain aasui pu na dulnyaa ni; ba pu? ŋisubil ngbaan puir a." 19Le Uwumbɔr aatuun ngbaan di waagɔrk ki ker dulnyaa aasubil ngbaan, ki di ŋa libuul saakpeln li ponn ni bi taar ŋisubil ki nyan ni ŋaanyun na. Nima le mɔk Uwumbɔr aah ga bii binib bi kaa dii u na pu na. 20Le bi taa ŋisubil ngbaan pu libuul ngbaan ponn ni kitiŋ aagbaan, ki nyan ŋaanyun. Le nsin nyan libuul ngbaan ni, ki wiir ki fuu itaan aataangaar chee, le ki fɔk mal lichur libaa ni ikub iluub.

will be added

X\