TIBƆKPIIRKAAN 12

1Tɔ, le m kan lijinjiir aawan paacham. Upii ubaa nan bi ki pee nwiin. Le uŋmal mu nan bi utaa aataab. Iŋmabi kipiik ni ilee mu nan bi uyil pu. Le u nan kpa lipuul. 2Le imalween chuu u. Le u wii ki ban un ma ubo. 3Le m ki kan lijinjiir aawan niken paacham. M kan kipeewambiik saakpeŋ maman, u kpa ŋiyil ŋilule ni iyiin kipiik, ki chik ubɔr aayikpupur tilule. 4Le u di ujuul kuun foor ni iŋmabi ligeln taatar, ki di lii ni kitiŋ, ki dan nan sil upii u ban un ma ubo na aanimbiin ni ke un ŋma waabo. 5Le upii ngbaan ma ubijabo u ga li joo dulnyaa ni aanib mpɔɔn pu na. Le Uwumbɔr yoor ubo ngbaan ki di buen ubaa chee paacham un ka waabɔrjal pu. 6Le upii ngbaan san buen kipɔɔk ni, Uwumbɔr aah toor mpaan nin chee ki tii u na, ki kpiini u nima chee iwiin lichur libaa ni ikub ilee ni imonko itaa. 7Tɔ, le bi to butɔb paacham. Uwumbɔr aatuuntiib aaninkpil Maikel ni waatuuntiib to kipeewambiik ngbaan ni waatuuntiib butɔb, 8le ki nyaŋ bi, le ki nyan bi paacham. Baa ki kan mpaan paacham. Kipeewambiik ngbaan ye Kinimbɔŋ la. Bi yi u ke Uwaa u por na, ki ki yi u ke Defil. Uma le ŋmanni dulnyaa aanib mɔmɔk. Bi nyan u ni waatuuntiib paacham, ki di lii ni kitiŋ. 10Le m ŋun nneel saakpiin len mpɔɔn pu paacham ke "Dandana wee ti kan timi Aawumbɔr aah kpa mpɔɔn pu ki gaa waanib lii na ki joo waanaan ni aanib na. Dandana ti kan Waanileekoo Kristo aah kpa yiko pu na. Ba pu? u nyan Kinimbɔŋ paacham. Kinimbɔŋ ye unibiinii u sil Uwumbɔr aanimbiin ni ki bii Uwumbɔr aanib nwiin pu ni kinyeek na. 11Upihbo Yesu aasin aapɔɔn pu ni waaliin aapɔɔn pu le bi nyaŋ Kinimbɔŋ. Bi gee Yesu ki jer baamɔfal, ki kpo u pu. 12Nimi bi bi Uwumbɔr do na, li kpa mpopiin man; ba pu? Kinimbɔŋ aa ki kpa mpɔɔn. Tɔ, tibɔbil mu ga lir kitiŋ aanib pu, ni nnyusaakpem aanib pu; ba pu? Kinimbɔŋ sunn ni bi chee, ki gee liŋuul saakpeln; ba pu? u bee ke waayoonn aa ki wiir." 13Kipeewambiik ngbaan aah kan ke bi nyan u paacham ki lii ni kitiŋ na, le u san dii upii u ma ubijabo na, ke un ti chuu u. 14Le Uwumbɔr tii upii ngbaan libɔrwiin aafeen ilee un laan ki buen kipɔɔk ni, waapaan ni, kipeewambiik ngbaan taa ki pii u nima chee. Le bi kpiini u nima chee ŋibin ŋitaa ni ligeln. 15Le kipeewambiik tii nnyun saakpem umɔb ni ke limɔɔl na ki lii, ke mu puu ki di upii ngbaan ki di buen. 16Le kitiŋ ter upii ngbaan, le ki waar kimɔb le ki di nnyun mu nyan kipeewambiik aamɔb ni na, ki di nab, le mu aa ki pii upii ngbaan. 17Le kipeewambiik ngbaan gee liŋuul saakpen upii ngbaan pu, ki buen ki ti to waabim biken butɔb. Waabim ye binib bi kii Uwumbɔr aamɔb ki tuk binib Yesu aabɔnyaan na. Le kipeewambiik ngbaan sil nnyusaakpem aagbaan.

will be added

X\