TIBƆKPIIRKAAN 10

1Le m kan Uwumbɔr aatuun mpɔɔndaan uken nyan paacham. U pee kitaalangbaŋ. Le waakpimanja mu lur goln uyil. Unimbil wɔb naahn nwiin la. Utaa mu naahn kimiigaak. 2U joo kigbaŋ waatiir ki kpar na uŋaal ni. Le u di utaagiir ki di taa nnyusaakpem pu, le ki di utaagaln mu taa kitiŋ pu, 3le ki teen mpɔɔn pu ke uchinn aah tar pu na. Waah teen kena na, le utaal mu teen mfim mulule. 4Utaal aah teen mfim mulule na, le m ban m ŋmee waah len pu na kigbaŋ ni. Le m ŋun nneel len Uwumbɔr do, "Taa ŋmee utaal aah len tibɔr ti na, ki taa kpiir ti." 5Uwumbɔr aatuun u m kan u si nnyusaakpem ni kitiŋ pu na le yoor uŋaaŋgii paacham 6ki puu Uwumbɔr u bi n-yoonn mu kaa kpa ndoon na ki nan naan paacham ni tiwan nimɔk bi ni ponn ni na, ni kitiŋ ni tiwan nimɔk bi kitiŋ na, ni nnyusaakpem ni tiwan nimɔk bi mu ponn ni na, ke Uwumbɔr aan ki taan. 7Buyoonn Uwumbɔr aatuun lulule ga pii waakaakaan na, n-yoonn ngbaan le Uwumbɔr ga tun waatuln nyaan li bɔr na ki doo, waah nan tuk waabɔnabtiib bi ye waatutuliib na ke u ga tun lituln nyaan pu na. 8Nneel mu m ŋun paacham na, nneel ngbaan ki len m chee ki bui mi ke m li cha ti gaa kigbaŋ ki kpar ki bi Uwumbɔr aatuun u si nnyusaakpem ni kitiŋ pu na aaŋaal ni na. 9Le m buen Uwumbɔr aatuun ngbaan chee, le ki bui u ke un tii mi kigbaŋ waatiir ngbaan. Le u bui mi, "Gaa ki ŋma. Ni ga li mɔ aamɔb ni ke tisiir na la, ki ga li to aaponn ni." 10Le m gaa kigbaŋ waatiir ngbaan uŋaal ni, ki ŋman ki. Maah ŋman ki na, le ni mɔ mmɔb ni ke tisiir na. Le maah nab na, ni to mponn ni. 11Le bi bui mi, "See aa ki tuk ŋitimbol mɔmɔk aanib bi bi dulnyaa wee ni ki len iliin imɔk bi dulnyaa wee ni na, ni baabɔrb, tibɔr ti ga ŋa bi n-yoonn mu choo na."

will be added

X\