TIBƆKPIIRKAAN 1

1Tibɔr tee le Uwumbɔr nan tuk Yesu Kristo ke u nan kpiir ki tuk waatutuliib. Ti ye tibɔr ti ga ŋa wɔween na. Le Yesu nan tun waatuun ke un buen waatutuln Jɔnn chee ki ti tuk u tibɔr tee. 2Uwumbɔr ni Yesu Kristo aah tuk Jɔnn tibɔr ti na, ki mɔk u tiwan ni na, le u ŋmee ni mɔmɔk kigbaŋ ponn ni. 3Unii u karn Uwumbɔr aaliin imina binib aanimbil ni na, Uwumbɔr aanyoor bi u pu. Binib bi ŋun ki ŋa yaah len pu na, Uwumbɔr aanyoor bi, bi mu pu. Ba pu? buyoonn tibɔr tee ga ŋa na, naa ki daa. 4Min Jɔnn le ŋmee kigbaŋ kee ke m tii Yesu aanib bi bi Asia aatim mulule ni na. Uwumbɔr u nan bi, ki beenin bi, ki ga li bi n-yoonn mu kaa kpa ndoon na, ni Waafuur nyaan mu bi waabɔrjal chee na, ni Yesu Kristo, ŋa tinyoor ki ŋa ni pu, ki tii nimi nsuudoon. Yesu Kristo len mbamɔn, ki puen fikr nkun ni, ki ye dulnyaa wee ni aabɔrb aayidaan. U gee timi la, ki di waasin ki finn timi, ki nyan timi titunwambir ni, ki gaa timi lii, 6ki ŋa timi waanaan ni aanib, ti li tun lituln ki tii Ute Uwumbɔr. Uma Yesu le ye uyimbidaan, ki kpa mpɔɔn mɔmɔk n-yoonn mu kaa kpa ndoon na. Amii. 7Lik, u ga dii ntaalangbam ni ki dan. Binib mɔmɔk aanimbil ga kan u. Binib bi nan kpaa u ndɔpuinkoo pu na, bi mu ga kan u. U pu, le dulnyaa aanib mɔmɔk ga wii. Ni ye mbamɔn. Amii. 8Tidindaan Uwumbɔr, u yeh mpɔɔn mɔmɔk, ki nan bi, ki beenin bi, ki ga li bi n-yoonn mu kaa kpa ndoon na, le len ke uma le ye Alfa ni Omega, mpiin ngbaan ni ndoon ngbaan. 9Min Jɔnn u ye nina aabo na, m ni nimi kpaan ki ji falaa ni suklaa Yesu pu, ki ye waanaan ni aanib la. Uwumbɔr aaliin ni Yesu aabɔnyaan tee pu, le bi nan di mi ki kaan lidikl li bi yi li ke Patmos na pu. 10Tidindaan aakpakool daal le Uwumbɔr Aafuur nyaan fir m pu. Le m ŋun nneel saakpiin len mpuwɔb ke kaakaan na, 11ki bui mi, "Ŋmee saah ga kan pu na kigbaŋ ni, ki di tun kigbaŋ ngbaan Yesu aanib bi bi Asia aatim mulule ni na chee, bi bi Efesus aatiŋ ni, ni Smina aatiŋ ni, ni Pegamum aatiŋ ni, ni Tiataira aatiŋ ni, ni Sadis aatiŋ ni, ni Filadelfia aatiŋ ni, ni Laodisea aatiŋ ni na." 12Le m fenn m bee udaan u len m chee kena na. Maah fenn na, le m kan salmaa aakaryaa mam bilule, 13ni unii u naahn Unibɔn Aabo na, bi bikaasisik ni, ki pee libɔkul li pii utaafar na, ki buu salmaa aagbapapaln ubiŋ chee. 14Uyil ni waayikpir piin chain, ke tikokonn na. Unimbil wiin ke mmii na. 15Utaafar mu wiin ke baah pur tikur mmii ni na aah wiin pu na. Uneel mu fuk ke bunyɔb saakpem aanyun na. 16Le u joo iŋmabi ilule uŋaaŋgii ni. Waaliin geei binib aasui ke kpaacha aah kaar ŋipepel mɔmɔk ŋilee pu na aah geei pu na. Unimbil wɔb wiin chain, ke nwiin aah wiin chain pu nwiin pu na. 17Maah kan u na, le m lir gbaan unimbiin ni ke maah kpo le na. Le u di uŋaaŋgii di paan m pu, ki bui mi, "Taa san ijawaan. Min le ye mpiin ngbaan ni ndoon ngbaan. 18Min le ye umɔfaldaan. M nan kpo, le ki fikr, ki ga li bi n-yoonn mu kaa kpa ndoon na, ki joo nkun ni kitekpiitiŋ aasaafii mam. 19Nima pu na, ŋmee saah kan pu na, ki ŋmee naah bi pu dandana wee na, ki ŋmee naah ga ŋa pu n-yoonn mu choo na. 20Saah kan iŋmabi ilule ŋŋaaŋgii ni na, ki kan salmaa aakaryaa mam bilule na, naatataa le ye ke iŋmabi ilule ngbaan si maanib bi bi ntim mulule ngbaan na aatuuntiib aasisiiyaan. Karyaa mam bilule ngbaan mu si maanib bi bi ntim mulule ngbaan na aasisiiyaan.

will be added

X\