MATIU 9

1Le u gir koo buŋɔb ni, le ki ki puur limɔɔdaapuul ki kun udo aatiŋ ni. 2Le bijab bibaa lulni uja uyaawon faan na likekeln ni Yesu chee. Le Yesu kan baah gaa u ki kii mbamɔm pu na, le ki bui uja uyaawon faan na, "Maabo, chuu aabaa, m di cha saatunwambir ki pinn si." 3Waah len kena na, le Uwumbɔr aakaal aamɔmɔkb bibaa dak bisui ni, "Uja wee sii Uwumbɔr la." 4Le Yesu bee baalandak, le ki baa bi, "Ba ŋa ni dak ilandak i kaa ŋan na nisui ni? 5Maah len ke m di cha waatunwambir ki pinn u na le pɔɔ aan m yaa len ke 'Fiin ki li chuun' li pɔɔ? 6M ga mɔk nimi ke min Unibɔn Aabo kpa mpɔɔn dulnyaa wee ni ke m di cha pinn titunwambir." Waah len kena na, le u bui uyaawon faan na, "Fiin ki yoor saawandɔkaan ki li cha kun." 7Libuul ngbaan ni le u fii ki cha kun. 8Kinipaak ngbaan aah kan kena na, le bi san ijawaan, ki nyuŋ Uwumbɔr u tii unibɔn mpɔɔn kena na. 9Le Yesu siir nima ki buen. Waah cha na, le u kan ulampuugaar ubaa bi yi u ke Matiu. U ka baah gaar lampuu nin chee na. Le Yesu bui u, "Li dii mi." Le u fii, le ki dii u. 10Le Yesu ni waadidiliib nan kal udo ji tijikaar. Le bilampuugaab ni titunwambirdam bi wiir na dan nan ji bi chee tijikaar. 11Farisii yaab aah kan kena na, le bi baa waadidiliib, "Ba ŋa nimi aatiicha ji bilampuugaab ni titunwambirdam chee tijikaar?" 12Le Yesu ŋun baah len pu na le ki bui ke "Binib bi kpa laafee na aa ban dɔkta, see binib bi bun na le ban dɔkta. Uwumbɔr aagbaŋ len ke waa ban ke binib toor kitork baanja ki tii u. U ban ke bi li san tɔb kinimbaak. 13Li cha ki ti bae iliin imina aatataa. Maa dan ke m nan yi bininyaan. M dan ke m nan yi titunwambirdam ke bi nan kpeln baabimbin." 14Le Jɔnn aadidiliib dan Yesu chee, le ki nan bui u, "Ti ni Farisii yaab lul bumɔb kpakpaayuk la. Ba pu saadidiliib ma aa lul bumɔb?" 15Le u baa bi, "Bicham bi dan bi nan ji ubɔndinn aajim na ga ŋma li kpa mpombiin buyoonn upiidinn bi bi chee na aa? Aayii. N-yoonn choo, le bi ga chuu nyan upiidinn na bi chee mpɔɔn. N-yoonn ngbaan le bi ga lul bumɔb." 16Le Yesu ki len ke "Ubaa aan di likekepɔln aageln ki di leŋ libɔkukpokl. U yaa ŋa kena kan, likekepɔln aageln na ga kar libɔkukpokl na. Liboln ngbaan ga jer njan yaan. 17Ubaa mu aan di ndaawiin ki di ŋa kilookpok ponn ni. U yaa ŋa kena kan, kilook ngbaan ga puu, ki bii. Ndaan mu ga kpir. Bi ga di ndaawiin ki di ŋa kiloopɔŋ ni la. Le ndaan aan kpir. Kilook ngbaan aan bii." 18Yesu aah bi len kena na, le uninkpil ubaa dan nan gbaan unimbiin ni ki doon u, le ki bui u, "Mbisal kpo a. Dan nan di aaŋaal ki paan u pu, le u ga fikr." 19Le Yesu fii ki dii u. Waadidiliib mu dii u. 20Le upii ubaa u fuu tipiir ŋibin kipiik ni ŋilee taa door na le nan bi nima, ki dan Yesu aapuwɔb, le ki nan meeh waabɔkul aamɔjuul; 21ba pu? u dak usui ni ke u yaa po meeh Yesu aabɔkul kan, u ga pɔɔk. 22Le Yesu fenn ki kan u, le ki bui u, "Mbisal, chuu aabaa. Saah gaa mi ki kii mbamɔm pu na, nima le cha aa pɔɔk." Libuul ngbaan ni le u pɔɔk. Iween ngbaan aa ki fii. 23Le Yesu fuu uninkpil ngbaan aadichal ni, le ki koo ni, ki kan kinipaak nima. Bi wii ikpowiil, ki pii ŋiwul, ki faa kifuuk. 24Le u bui bi, "Nyan lipaal man. Upiibo ngbaan aa kpo. U geen la." Le bi laa u saakpen. 25Baah nyan kinipaak ngbaan lipaal na, le u koo ni upiibo ngbaan aah bi kidiik ki ponn ni na, le ki chuu uŋaal. Le u fii. 26Le bi mooni tibɔr ngbaan itingbaan mɔmɔk ni. 27Le Yesu siir nima. Waah cha na le bijoom bilee dii u, le ki tar, "David Aayabil, sam timi kinimbaak." 28Le u koo kidiik ni. Le bijoom ngbaan mu koo ni u chee. Le u baa bi, "Ni pak ke m ga ŋma likr nimi aanimbil aa?" Le bi kii, "Tidindaan, een." 29Baah len kena na, le u meeh binimbil, le ki bui bi, "Naah gaa mi ki kii pu na, ni ŋa kena ki tii nimi." 30Le bi likr. Le u sur bi mbamɔm ke bi taa tuk unii ubaa. 31Le bi buen ki mooni waayimbil itingbaan mɔmɔk ni. 32Bijoom ngbaan aah nyan ni Yesu chee na, le binib bibaa nan joo ni ubir u tiyaayar joo u na. 33Le Yesu nyan tiyaayar u ni. Le u len kaa ki ye ubir. Le ni gar kinipaak ngbaan pam. Le bi len, "Taa kee kan kena timi Israel yaab aatiŋ ni." 34Le Farisii yaab bui ke tiyaayar aayidaan le tii u mpɔɔn ke un ti nyan tiyaayar binib ni. 35Le Yesu bɔɔ dii ntisaakpem, ni ntiwaatiir ni, le ki koo mmeen aadir ni, ki tuk binib Uwumbɔr aaliin, ki mooni Uwumbɔr aanaan aabɔnyaan tee, le ki teei bibum bi kpa iween aaboŋ mɔmɔk na, ni bimɔk kaa pɔɔ na. 36Waah kan kinipaak ngbaan na, le u san bi kinimbaak saakpen; ba pu? bi naahn ipiih i yɔl ki dɔ kitiŋ, kaa kpa upihkpaal na. 37Le u di tijikaar ki di ŋaŋ kinipaak ngbaan aah bi pu na, ki bui waadidiliib, "Idi biir a, ki wiir. Bidicheeliib aa wiir. 38Nima pu na, ni li mee kisaak Aadindaan man ke un tun bidicheeliib bin ti chee waajikaar."

will be added

X\