MATIU 8

1Le Yesu sunn ni lijool taab. Le kinipaak saakpeŋ dii u. 2Le ukɔndaan dan u chee le ki gbaan unimbiin ni, le ki doon u, le ki bui u, "Ndindaan, aa yaa gee kan, aa ga ŋma teb mi." 3Le Yesu taln uŋaal, ki meeh u, le ki bui u, "M gee. Aa pɔɔk." Libuul ngbaan ni le u pɔɔk. 4Le Yesu bui u, "Li nyi, ki taa tuk unii ubaa. Li cha Uwumbɔr aatotoor chee ki di aabaa ki di mɔk u, ki toor kitork ki tii Uwumbɔr ke Moses aakaal aah len pu na. Nima le ga mɔk binib ke aa pɔɔk a." 5Le Yesu koo Kapenaum aatiŋ ni. Le sujatiib nkub aaninkpil dan u chee ki gaŋ u ki bui u, 6"Ndindaan, maatutuln dɔ linampal. Uwon faan ki wu saakpen a." 7Le Yesu bui u, "M ga dan ki nan teb u." 8Le u bui u, "Ndindaan, maa ŋeer aa dan ndo ki koo maadiik ni. Aa yaa po len ke 'Pɔɔk' kan, maatutuln ngbaan ga pɔɔk. 9Min mbaa kii maaninkpil aamɔb, ki mu ye sujatiib aaninkpil la, le ki bui ubaa, 'Li cha,' le u buen; le ki bui ubaa mu, 'Dan,' le u dan; le ki bui maanaagbiija, 'Ŋa kena,' le u ŋa." 10Yesu aah ŋun waah len kena na, le ni gar u pam. Le u bui binib bi dii u na, "M tuk nimi mbamɔn la, maa kee kan unii ubaa bi Israel yaab ponn ni ki gaa mi ki kii mbamɔm kena. 11M tuk nimi la, binib pam ga nyan ni liwipuul wɔb, ni liwilir wɔb, ki kal ki ji Abraham ni Aisak ni Jakob chee tijikaar Uwumbɔr aanaan ni. 12Le Juu yaab bi ba ga koo ni na, Uwumbɔr ga chuu nyan bi lipaal mbɔmbɔɔn aah bi nin chee na. Bi ga wii ki ŋman ŋinyin nima chee." 13Tɔ, le u bui sujatiib aaninkpil ngbaan, "Li dii saasan. Saah gaa mi ki kii mbamɔm pu na, ni ŋa kena ki tii si." Yesu aah len kena na, libuul ngbaan ni le uninkpil ngbaan aatutuln pɔɔk. 14Le Yesu buen Piita aadichal ni, le ki kan Piita aapuu aana bun ki dɔ kidiik ni. Le uwon ton. 15Le Yesu meeh uŋaal. Le uwon sɔŋ. Le u fii, le ki chann u tichann. 16Kijook aah joor na, le binib dan Yesu chee, ki joo ni binib pam bi tiyaayar joo bi na. Le Yesu po len, le tiyaayar nyan bi ni. Le u teei bibum mɔmɔk. 17U ŋa kena ke un gbiin Uwumbɔr aabɔnabr Aisaya aah nan len pu na, ke "Uma ubaa nyan ni iween, ni tibumbun timi aawon ni." 18Le Yesu kan ke kinipaak ki dii u na wiir saakpen a. Nima pu na le u tuk waadidiliib ke u ban un puur limɔɔdaapuul la. 19Le Uwumbɔr aakaal aamɔmɔkr ubaa nan dan u chee le ki bui u, "Tiicha, m ga dii si, saah cha nin chee na mɔk." 20Le Yesu bui u, "Iŋɔk kpa yaa koo ibuu i ponn ni na. Inyoon i laani paacham na mu kpa yaadir. Min Unibɔn Aabo aa kpa maah ga doon nin chee na." 21Le waadidiir ubaa mu bui u, "Ndindaan, m mee si nsan, cha m buen ti sub nte waahr, aan ki nan dii si." 22Le Yesu bui u, "Dii mi dandana wee, ki cha bitekpiib sub tɔb." 23Le Yesu koo buŋɔb ni. Le waadidiliib mu dii u. 24Baah chuun nnyun ni na le kibuŋ ti fii ki bi daar, le tinyunkpeln fii tin ti biin buŋɔb pu. Yesu dɔ geen la. 25Le waadidiliib dan ki nan gbaa finn u ki bui u, "Ndindaan, ter timi. Ti ga bee nnyun ni." 26Le u bui bi, "Ba ŋa ni san ijawaan? Naa gaa mi ki kii mbamɔm." Le u fii le ki kae kibuŋ ni nnyun. Le kibuŋ ni nnyun ŋmin chii. 27Le ni gar bi pam. Le bi baa tɔb, "Ba aaniboln le na? kibuŋ ni nnyun kii waamɔb." 28Le bi fuu limɔɔdaapuul, Gadarene yaab aatiŋ ni. Baah fuu nima na le biwaab bilee nyan ni baah sui binib titakpaluln ti ponn ni na, ki tooh u nsan ni. Biwaab ngbaan yaa kan unii kan, bi ga gbaa u la. Nima pu na, ubaa aa ŋma dii nima chee. 29Baah kan Yesu na, le bi teen, "Sin, Uwumbɔr Aajapɔɔn, aa ban ba ti chee? Aa dan du ke aa ŋa timi falaa n-yoonn aa kee ŋeer aa?" 30Le igbeer i wiir na bi dandar ki chuun ji. 31Le tiyaayar ti bi bijab ngbaan ni na gaŋ Yesu, "Aa yaa nyan timi binib ngbaan ponn ni kan, cha ti ti koo igbeer ngbaan ni." 32Le Yesu bui ti, "Li cha man." Le ti nyan binib ngbaan ni, le ki koo igbeer na ni. Libuul ngbaan ni, le igbeer mɔmɔk san sunni limɔɔgongoln taab, le ki koo nnyun ni ki kpo. 33Le bijab bi kiir igbeer ngbaan na san buen kitiŋ ni, le ki ti tuk binib Yesu aah teb biwaab ngbaan pu na, ni tibɔr ngbaan mɔmɔk. 34Kitiŋ ngbaan aanib aah ŋun kena na, le bi mɔmɔk dan ki nan tooh Yesu nsan ni. Baah kan u na, le bi gaŋni u ke un nyan baatiŋ ni.

will be added

X\