MATIU 5

1Yesu aah kan kinipaak ngbaan na, le u jon lijool paab, le ki kal. Le waadidiliib kuun u chee. 2Le u waar umɔb ki bui bi: 3"Binib bi bee ke bi ye bigiim Uwumbɔr wɔb na, waanyoor bi bi pu. Bima le yeh Uwumbɔr aanaan. 4"Binib bi kpa mpombiin baatunwambir pu na, Uwumbɔr aanyoor bi bi pu; u ga sɔŋ bisui. 5"Binib bi sunn bibaa taab na, Uwumbɔr aanyoor bi bi pu. Bima le ga li yeh dulnyaa wee. 6"Binib biyaanimbil man ke bi li ye bininyaan na, Uwumbɔr aanyoor bi bi pu. Binimbil ga gbiin. 7"Binib bi kpa linimbaasaln na, Uwumbɔr aanyoor bi bi pu. U mu ga san bi kinimbaak. 8"Binib bi dii Uwumbɔr ni bisui mɔmɔk na, waanyoor bi bi pu. Bima le ga kan uma Uwumbɔr. 9"Binib bi par kijaak na, Uwumbɔr aanyoor bi bi pu. U ga len ke bi ye waabim. 10"Binib bi ji falaa Uwumbɔr aasan pu na, waanyoor bi bi pu. Bima le yeh uma Uwumbɔr aanaan. 11"Binib yaa sii nimi ki ŋa nimi falaa ki mɔn inyaamɔn mɔmɔk aaboŋ ki paan nimi, ki bii nimi, min Yesu pu kan, Uwumbɔr aanyoor bi ni pu. 12Ni li kpa mpopiin saakpen. Ba pu? ni ga kan tinyoor saakpen paacham. Kena le bi nan ŋa Uwumbɔr aabɔnabtiib bi nan bi n-yaayoonn na falaa." 13"Nimi maadidiliib le ye dulnyaa wee ni aayaan. N-yaan yaa bii, ki yaa kaa ki mɔ kan, nibaa aa bi ki ga ki ŋma ŋa mu aan mu mɔɔk. Mu aa ki bi tibɔr tibaa ni. Bi ga di kpir. Le binib ga taan mu pu ki jer. 14"Nimi le ye dulnyaa wee ni aawiihn, ni woln binib aanimbil. Kitisaakpeŋ ki bi ligongol paab na aan ŋma bɔr. 15Unii yaa see karyaa kan, waan di lisambil ki di chiŋ u pu. U ga di u tɔŋ tiwan paab la, le u woln kidiik mɔmɔk ponn ni nwiihn. 16Ni li bi kena man. Cha binib mɔmɔk kan nimi aawiihn aah wiin pu na, bin kan nimi aatuln nyaan aan ki pak Nite Uwumbɔr u bi paacham na." 17"Ni taa dak ke m dan m nan kuln Uwumbɔr aakaal ni Waabɔnabtiib aaliin. Maa dan ke m nan kuln i. M dan ke m nan ŋa yaah len pu na mɔmɔk chub. 18M tuk nimi mbamɔn la, nkaal ngbaan mubaa aan jer, see ni mɔmɔk ŋa. Buyoonn paacham ni dulnyaa ga li bi na, nkaal ngbaan mɔmɔk ga li beenin bi. 19Nima pu na, unii umɔk yii nkaal ngbaan ponn ni siib na, ki mɔk binib kena na, u ga li ye uwaatiir Uwumbɔr aanaan ni. Unii umɔk kii nkaal ngbaan, ki mɔk binib kena na, u ga li ye unikpaan Uwumbɔr aanaan ni. 20M tuk nimi la, nimi aabimbin yaa kaa ŋan ki jer Uwumbɔr aakaal aamɔmɔkb ni Farisii yaab aabimbin kan, naan koo ni Uwumbɔr aanaan ni." 21"Ni ŋun ke bi nan tuk n-yaayoonn na aanib, 'Taa ku unii, ke unii ubaa yaa ku uken kan, bi ga ji u tibɔr.' 22Min le tuk nimi ke unii umɔk gee liŋuul una aabo pu na, bi ga ji u tibɔr. Unii umɔk tuk una aabo, 'Saa bi tibɔr tibaa ni,' kooti ni aaninkpiib ga ji u tibɔr. Unii umɔk tuk una aabo, 'Si ujɔr,' u ŋeer un koo mmii mu kaan junn na ni. 23Aa yaa bi Uwumbɔr aadichal ni ki ban aa tii Uwumbɔr ipiin, ki teer ke aa koo aana aabo ubaa aataani ni kan, 24di saapiin di bil nima, ki buen ti chuu utaal waahr, aan ki nin gir ni ki nan tii Uwumbɔr ipiin ngbaan. 25"Aa ni unii yaa kpa tibɔr, u ban un di ti buen kooti ni kan, chuu utaal mala naa kee fuu kooti ni, u taa di si ki ŋa ubɔjir aaŋaal ni, ubɔjir taa di si ki ŋa kiyondiik aaninkpil aaŋaal ni, un di si ŋa kiyondiik ni. 26M tuk si mbamɔn la, saan nyan nima ki nan saa buyoonn aa ga pa kooti ni aamombil mɔmɔk na." 27"Ni ŋun ke bi nan tuk n-yaayoonn na aanib, 'Taa gɔr kidaagook'. 28Min le tuk nimi ke unii umɔk lik upii ka waalaasab koo u ni kan, u kpaan gɔr kidaagook usui ni. 29Aa yaa gee tiwan ke saah gee aanimbigiil pu na kan, tiwan ngbaan yaa tɔŋ si ke aa tun titunwambir kan, di ni lii. Saawan nibaa yaa bee yooli kan, ni soor ni tiwon mɔmɔk koo mmii mu kaan junn na ni. 30Aa yaa gee tiwan ke saah gee aaŋaaŋgii pu na kan, tiwan ngbaan yaa tɔŋ si ke aa tun titunwambir kan, di ni lii. Saawan nibaa yaa bee yooli kan, ni soor ni tiwon mɔmɔk koo mmii mu kaan junn na ni." 31"N-yaayoonn na aanib nan ki len ke 'Unii yaa jenn upuu kan, un ŋmee kigbaŋ, ki di tii u ki mɔk ke u jenn u.' 32Min le tuk nimi ke upii yaa kaa gɔr kidaagook kan, uchal yaa jenn u lii kan, u ŋa u upiidaagoor le na. Uja u yoor baah jenn upii u ki lii na, u ye udaagoor la." 33"Ni ŋun ke bi nan tuk n-yaayoonn na aanib, 'Taa puu Uwumbɔr nnyaamɔn pu, ke aa yaa puu Uwumbɔr kan, ŋa saah len pu na.' 34Min le tuk nimi: ni taa puu Uwumbɔr. Ni taa puu paacham mu; ba pu? paacham ye Uwumbɔr aabɔrjal la. 35Ni taa puu dulnyaa mu; ba pu? dulnyaa ye Uwumbɔr aataa aajal la. Ni taa puu Jerusalem mu; ba pu? Jerusalem ye Uwumbɔr u ye Ubɔr saakpiin na aatiŋ la. 36Taa puu aayil; ba pu? saan ŋma kpaln kiyikpilk kibaa, ki li ye kiyikpipiin, kaan ŋma kpaln kibaa ki li ye kiyikpibɔŋ. 37Ni po len ke 'Een' ni 'Aayii.' Ni yaa ki puu nibaa kan naa ŋan." 38"Ni ŋun ke bi nan tuk n-yaayoonn na aanib, 'Unii yaa chuu lukr saanimbil kan, bin chuu lukr u mu yaan. Unii yaa gbaa nyan saanyin kan, bin chuu nyan u mu yaan.' 39Min le tuk nimi: unii yaa ŋa si bakaa kan, taa giin u waah ŋa si pu na. Unii yaa faa si aaŋaaŋgii aataapak kan, aa cha u faa aaŋaaŋgan aataapak mu. 40Unii yaa ban un di si buen kooti ni un ti gaa saabɔkul kan, tiin u saakekeln mu. 41Unii yaa muk si ke aa cheen u mal ubaa kan, cheen u mal bilee. 42Unii yaa mee si tiwan kan, tiin u. Unii yaa ban ke aa pinn u tiwan kan, taa yii." 43"Ni ŋun ke bi nan tuk n-yaayoonn na aanib, 'Li gee aana aabo ki nan saadin.' 44Min le tuk nimi: ni li gee nimi aadim man, ki bui binib bi sii nimi na ke Uwumbɔr ŋa tinyoor ki ŋa bi pu; ŋa binib bi nan nimi na tiŋann, ki mee Uwumbɔr ki tii binib bi ŋa nimi falaa ki muk nimi na. 45Ni yaa ŋa kena kan, ni ga li ye Nite Uwumbɔr u bi paacham na aabim; uma le cha waawiin puu ki woln tiniwambir ni bininyaan pu, ki cha utaal nu ki tii binib bi ŋan na, ni bin kaa ŋan na. 46Ni yaa gee binib bi gee nimi na baanja kan, ni kpa tinyoor Uwumbɔr chee ee? Bilampuugaab mu gee binib bi gee bi na la. 47Ni yaa dooni ninaabitiib baanja kan, ni ŋan ki jer biken aa? Aayii. Bin kaa dii Uwumbɔr aasan na mu ŋani kena la. 48Nima pu na, ni li bi mbamɔm, ke Nite Uwumbɔr u bi paacham na, aah bi pu na."

will be added

X\