MATIU 28

1Juu yaab aakpakool daal aah jin ki woln kitaak na, le Mari Magdalene ni Mari uken buen ti lik likaakul ngbaan kichakpinaanyeek ni. 2Le kitiŋ deŋ saakpen; ba pu? Tidindaan Uwumbɔr aatuun ubaa nyan ni paacham, le ki nan chuu lekr litakpal ngbaan, le ki kal li pu. 3U moor lak lak ke utaal aah moor pu na. Waawanpeenkaan piin chain ke ŋikukuyon na. 4Bikikiirb aah kan u na, le ijawaan chuu bi saakpen a. Le biwon gbaa. Le bi lir fik. 5Le Uwumbɔr aatuun ngbaan bui bipiib ngbaan, "Ni taa san ijawaan man. M nyi ke ni ban Yesu u bi nan kpaa u ndɔpuinkoo pu na. 6Waa bi du. U fikr nkun ni waah nan len pu na. Dan man ki nan lik waah ba dɔ nin chee na, 7aan ki buen mala ki ti tuk waadidiliib ke u fikr nkun ni a, ki luln bi pu nsan ki cha Galilee aatiŋ ni la. Bi ga ti kan u nima. Nimina le m ban m tuk nimi." 8Le bipiib ngbaan san ijawaan, ki mu kpa mpopiin pam. Le bi fii likaakul chee mala, ki san buen ke bin ti tuk Yesu aadidiliib Uwumbɔr aatuun aah tuk bi pu na. 9Baah cha na, le Yesu ton bi nsan ni, le ki doon bi. Le bi gbaan unimbiin ni, le ki joo u le ki doon u. 10Le u bui bi, "Taa san ijawaan man. Li cha ki ti tuk maadidiliib ke bi li cha Galilee. Bi ga kan mi nima chee." 11Bipiib ngbaan aah cha na, le bikikiirb bi kii Yesu aakaakul na buen Jerusalem, ki ti tuk Uwumbɔr aatotoorninkpiib tiwan nimɔk ŋa na. 12Le Uwumbɔr aatotoorninkpiib ni Juu yaab aaninkpiib kuun tɔb chee, le ki kal kpokl, le ki nyan ŋimombil pam, ki di tii bikikiirb ngbaan, 13le ki bui bi, "Li cha man ki ŋmann binib ke naah dɔ geen kinyeek na, waadidiliib dan ki nan nyan u likaakul ni a. 14Kitiŋ aaninkpil yaa ŋun ke ni len ke ni dɔ geen kan, ki yaa ji nimi tibɔr kan, ti ga nyan nimi." 15Le bikikiirb ngbaan gaa ŋimombil ngbaan, le ki buen ti tuk binib ke Yesu aadidiliib dan nan nyan waawon likaakul ni a. Nima pu na le Juu yaab beenin len kena le ki nan saa din. 16Le Yesu aadidiliib kipiik ni ubaa buen lijool libaa paab Galilee aatiŋ ni, Yesu aah nan mɔk bi nin chee na. 17Le Yesu fuu ni bi chee. Baah kan u na, le bi gbaan unimbiin ni ki doon u. Le bibaa mu joo beeni. 18Le Yesu bui bi, "Uwumbɔr tii mi mpɔɔn mɔmɔk paacham ni taab. 19Li cha man ŋinibol mɔmɔk chee, ki ŋa bi maadidiliib, ki muin bi nnyun ni, Nte Uwumbɔr, ni min Ujapɔɔn, ni Mfuur nyaan aayimbil pu, 20ki tuk bi ke bi li kii maah tuk nimi pu na mɔmɔk. Teer man, m bi ni chee n-yoonn mɔmɔk, ki nan saa dulnyaa aadoon."

will be added

X\