MATIU 26

1Yesu aah len kena ki ti doo na, le u bui waadidiliib, 2"Ni nyi ke iwiin ilee le bi ga ji Lakr-jer aajim. N-yoonn ngbaan le bi ga di min Unibɔn Aabo ki ŋa binib aaŋaal ni, le bin ti kpaa mi ndɔpuinkoo pu." 3Tɔ, n-yoonn ngbaan le Uwumbɔr aatotoorninkpiib ni Juu yaab aaninkpiib nan kuun Uwumbɔr aatotoorninkpil Kayafas aachiln ni, 4le ki kpokl ke bi ga loon chuu Yesu le ki ku u, 5le ki bui tɔb, "Ti taa chuu u njim ngbaan aayoonn man. Ti yaa chuu u n-yoonn ngbaan kan, kinipaak ngbaan ga ŋma tijar." 6Tɔ, le Yesu nan bi Betani aatiŋ ni, ki bi Simon u nan ye ukɔndaan na do, ki ji tijikaar. 7Waah bi ji tijikaar kena na, le upii ubaa joo ni tubalee u kpa kidaak saakpen na, le ki nan di kpir Yesu aayil paab. 8Waadidiliib aah kan kena na, le bi gee liŋuul, le ki len, "Ba ŋa u bii tubalee ngbaan kena? 9Ti ba ga ŋma di u ki kooh ki kan ilik saakpen ki di tii bigiim." 10Le Yesu bee baah len pu na, le ki baa bi, "Ba ŋa ni muk upii ngbaan kena? U tun lituln li ŋan na le ki tii mi. 11Bigiim ga li bi ni chee n-yoonn mɔmɔk. Mma aan li bi ni chee n-yoonn mɔmɔk. 12Waah di tubalee ngbaan ki di kpir nwon pu na, u toor mi ke bin ti sub mi. 13M tuk nimi mbamɔn la, baah ga moon tibɔnyaan tee nin chee itingbaan mɔmɔk ni na, bi ga len waah ŋa pu na, ke binib li teer waabɔr." 14Le Yesu aadidiliib kipiik ni bilee ponn ni ubaa, bi yi u ke Judas Iskariot, buen Uwumbɔr aatotoorninkpiib chee, 15le ki baa bi, "M yaa di Yesu di ŋa niŋaal ni kan, ni ga tii mi ba?" Le bi kahn ŋimombil aakur piitaa le ki di tii u. 16Leyaadaal ngbaan le u piin ki bi ban nsan mu u ga di Yesu ki di ŋa biŋaal ni na. 17Lakr-jer aajim njan aawiindaal le Yesu aadidiliib dan nan baa u, "Aa ban ke ti gor njim ngbaan aajikaar la chee ki tii si?" 18Le u bui bi, "Ni li cha kitiŋ ngbaan ni man uja ubaa chee, ki ti bui u, 'Tiicha bui ke waayoonn fuu a. U ni waadidiliib ga dan nan ji Lakr-jer aajim aado."' 19Le Yesu aadidiliib ŋa waah tuk bi pu na, le ki gor njim ngbaan aajikaar. 20Kijook aah joor na, le Yesu ni waadidiliib kipiik ni bilee nan kal ke bin ji tijikaar ngbaan. 21Baah bi ji na, le u bui bi, "M tuk nimi mbamɔn la, ni ponn ni ubaa ga kooh mi." 22Waah len kena na le bisui bii saakpen a. Le bi mɔmɔk baa u ubaabaa ubaabaa, "Ndindaan, ni ye min la aa?" 23Le u bui bi, "M ni unii u kpaan lisambil libaa na le ga kooh mi. 24Min Unibɔn Aabo ga kpo ke naah ŋmee Uwumbɔr Aagbaŋ ponn ni ke m ga kpo pu na. Uja u ga kooh mi na ma kan, tibɔbil ga li bi u pu; bi yaa kaa ba ma u kan, ni ba soor ki tii u." 25Le Judas, u ga kooh u na, baa u, "Tiicha, ni ye min la aa?" Le Yesu bui u, "Ni ye saah len pu na." 26Baah bi ji tijikaar na, le Yesu yoor boroboro, le ki doon Uwumbɔr, le ki gii, ki di tii waadidiliib, ki bui bi, "Gaa ki li ŋma man. Nwon le na." 27Le u yoor kiyinyook, le ki doon Uwumbɔr, le ki di tii bi, le ki bui bi, "Ni mɔmɔk nyu man. 28Maasin le na. Maasin pu, le Uwumbɔr puu tipuupɔln ki tii nimi. Maasin ga nyan binib pam aatunwambir pu, aan Uwumbɔr di cha pinn bi. 29M tuk nimi la, maan ki nyu ŋisubil aanyun ngbaan, ki ti saa bundaln m ni nimi ga kpaan nyu ŋisubil aanyunpɔm Nte Uwumbɔr aanaan ni na." 30Le bi gaa Uwumbɔr aalahn, le ki buen Olif aasui aajool paab. 31Le Yesu bui bi, "Kinyeek kee ni mɔmɔk ga san ki cha mi. Ni ŋmee Uwumbɔr Aagbaŋ ni ke 'Uwumbɔr ga ku upihdaan, le ipiih yaa.' 32Buyoonn Uwumbɔr ga fikr mi nkun ni na, le m ga luln ni pu nsan ki buen Galilee aatiŋ ni." 33Le Piita bui u, "Bi mɔmɔk yaa san ki cha si kan, mma aan san ki cha si." 34Le Yesu bui u, "M tuk si mbamɔn la, kinyeek kimina, aa ga len mfim mutaa ke saa nyi mi le ukooja nin wii." 35Le Piita bui u, "Bi yaa po ban bin ku m ni si kan, maan len ke maa nyi si." Le waadidiliib mɔmɔk mu len kena. 36Le u ni waadidiliib fuu nibaa chee, le bi yi nima chee Getsemane. Le u bui bi, "Kaln du man, m buen nibaa chee ki ti mee Uwumbɔr." 37Le u di Piita ni Sebedee aajapɔɔtiib bilee, ki di buen. Le usui bii saakpen ki ti nyaŋ. 38Le u bui bi, "Nsui bii ki ti nyaŋ. Ni wu ke nkun aah wu pu na. Kaln du man, ki li lik man." 39Le u foor siib, le ki doon lichichikr, le ki mee Uwumbɔr, "Nte, aa yaa ŋma kii kena kan, nyan mi falaa u choo na ni. Amaa ŋa saageehn, ki taa ŋa maageehn." 40Le u gir buen waadidiliib bitaa ngbaan chee, le ki ti mui bi dɔ geen, le ki baa Piita, "Naa ŋma kal lik kikurk kibaa aa? 41Ni li ka lik man, aan ki li mee Uwumbɔr, aan ki taa koo ntɔŋ ni. Nisui ban ni ŋa ni ŋan na. Nimi aapɔɔn le par." 42Le u ki foor siib, ki mee Uwumbɔr, le ki bui, "Nte, ni yaa kaa ye m nyan falaa u choo na ni kan, cha saageehn ŋa." 43Le u ki gir buen waadidiliib chee, le ki ti mui bi ki dɔ geen; ngeen joo bi saakpen a. 44Le u cha bi, le ki ki foor siib, le ki mee Uwumbɔr taatar, ki ki bui u tibɔr tichachaan ngbaan. 45Le u ki gir buen waadidiliib chee, le ki baa bi, "Ni beenin fuur ki dɔ geen la aa? Lik, n-yoonn fuu a. U kooh min Unibɔn Aabo ki di ŋa titunwambirdam aaŋaal ni la. 46Fiin, ti li cha man. Lik, uja u kooh mi na peeni a." 47Waah laa bi len kena na, le Judas u ye waadidiliib kipiik ni bilee ponn ni ubaa na, fuu ni a. Le kinipaak dii u. Bi joo kpaacha mam ni jagbaali mam. Bi nyan ni Uwumbɔr aatotoorninkpiib ni Juu yaab aaninkpiib chee la. 48Judas u kooh Yesu na, nan bui kinipaak ngbaan ke bi yaa ti kan u moor unii uyaatakpiln na kan, uma le na. Bin chuu u. 49Baah fuu ni Yesu ni waadidiliib aah bi nin chee na, le Judas kpaan buen Yesu chee, le ki bui u, "Tiicha, aa doon aa?" le ki moor utakpiln. 50Le Yesu bui u, "Njɔ, aa chuun kinye?" Le bi dan nan chuu Yesu mpɔɔn. 51Le Yesu aadidiliib ponn ni ubaa yoor waakpaacha ki gii nyan Uwumbɔr aatotoorninkpil aatutuln aatafal. 52Le Yesu bui u, "Di saakpaacha ngbaan ki di fu kijuchook ni. Binib bimɔk yoor kpaacha na, kpaacha le ga ku bi. 53Saa nyi ke m yaa mee Nte Uwumbɔr kan, u ga tun ni bituuntiib jer ŋichur kipiik ni ŋilee na m chee dandana aa? 54M mu yaa ŋa kena kan, maan gbiin Uwumbɔr aagbaŋ aah len pu na ke m ga ji falaa u choo na." 55N-yoonn ngbaan le u baa kinipaak ngbaan, "Ni joo kpaacha mam ni jagbaali mam, ni nan chuu mi, ke maah ye ufifiir le na aa? Iwiin mɔmɔk m nan bi Uwumbɔr aadichal ni, ki tuk binib Uwumbɔr aaliin, le naa chuu mi. 56Tɔ, nimina mɔmɔk ŋa ke ni gbiin Uwumbɔr aabɔnabtiib aah nan ŋmee pu na." Le waadidiliib mɔmɔk san ki cha u. 57Le binib bi chuu Yesu na, bi di u ki di buen Uwumbɔr aatotoorninkpil Kayafas aadichal ni, Uwumbɔr aakaal aamɔmɔkb ni Juu yaab aaninkpiib aah kuun nin chee na. 58Le Piita paan Yesu pu, ki bi dandar, le ki ti fuu Uwumbɔr aatotoorninkpil aachiln ni, le ki koo ni, le ki ti kal sujatiib chee, ke un lik naah ga doo pu na. 59Le Uwumbɔr aatotoorninkpiib ni kooti ni aaninkpiib mɔmɔk ban binib bi ga mɔn inyaamɔn ki paan Yesu na, aan bi kan waataani, ki ti ku u na. Le bisiiraadam pam dan nan mɔn inyaamɔn paan u. 60Bi mu aa kan waataani. Kookooyaan le binyamɔndam bilee dan nan bui bi 61ke uja ngbaan bui ke u ga ŋma gbaa wii Uwumbɔr aadiik, ki ki maa ki iwiin itaa. 62Le Uwumbɔr aatotoorninkpil fii sil, ki baa Yesu, "Saan len tibaa aa? Binib ngbaan aah bii si pu na, ti gbii aan taa gbii?" 63Le Yesu si ŋmin. Le Uwumbɔr aatotoorninkpil bui u, "Puun Uwumbɔr u fu na, aa ye Uwumbɔr Aajapɔɔn Kristo u Uwumbɔr lee u na aan saa ye?" 64Le Yesu bui u, "Ni ye saah len pu na. M tuk nimi la, n-yoonn mu choo na, ni ga kan min Unibɔn Aabo ka Uwumbɔr aaŋaaŋgii wɔb, ki ga kan mi ntaalangbam ni paacham ki choo." 65Waah len kena na, le Uwumbɔr aatotoorninkpil chuu kar ubaa aawanpeenkaan, le ki bui, "U di ubaa ŋaŋ Uwumbɔr la. Taa ki ban siiraadam. Ni ŋun waah sii Uwumbɔr pu na. 66Ni dak kinye?" Le bi bui, "U ŋeer ti ku u la." 67Le bi teei timɔɔtan ŋa unimbil wɔb, le ki gbaa u. Bibaa mu gbaa u ntaapalm, 68ki bui u, "Kristo ngbaan, lem Uwumbɔr aabɔnabr aaliin ki tuk timi ulau faa si." 69Le Piita ka lichiln ni. Le usaapɔɔn ututuln na dan nan bui u, "Aa mu nan bi Yesu u ye Galilee aatiŋ aanii na chee." 70Le u nee bi mɔmɔk aanimbil ni le ki bui u, "Maa nyi saah len pu na aatataa," le ki buen kikaakpaak ni. 71Le usaapɔɔn uken kan u, le ki bui binib bi bi nima chee na, "Uja wee mu nan bi Yesu u ye Nasaret aatiŋ aanii na chee." 72Le u ki nee ki puu Uwumbɔr ke waa nyi u. 73Le ni kpee siib, le binib bi si nima chee na dan nan bui u, "Ni ye mbamɔn, aa ye waadidiliib ponn ni ubaa la; saaliin ni baaliin kpaan la." 74Le u ki puu Uwumbɔr, le ki bui, "Maa nyi uja ngbaan. M yaa mɔn nnyaamɔn kan, Uwumbɔr daa ntafal." Libuul ngbaan ni le ukooja wii. 75Le Piita teer Yesu aah tuk u pu na, "Aa ga len mfim mutaa ke saa nyi mi, le ukooja nin wii." Le Piita nyan lipaal, le ki wii saakpen.

will be added

X\