MATIU 22

1Le Yesu ki ŋak bi liyaataŋakl ke, 2"Uwumbɔr aanaan naahn ubɔrkpaan u ŋa ubɔndinn aajikaar ki tii ujapɔɔn na, 3le ki tun waatutuliib ke bin yin binib bi u ban ke bin dan nan ji na. Baah yin bi na, le bi yii, kaa dan. 4Le u ki tun bitutuliib biken bi ti yin bi ki tuk bi, 'Ubɔrkpaan len ke u gor tijikaar mɔmɔk doo a. U kɔr inaaja ni tiwankur ti filk na, ki gor tiwan mɔmɔk doo a, ke bin dan.' 5Le baa gar waatutuliib. Bi beenin tun baatuln; ubaa buen kisaak, uken mu buen un ti tiir kitiir. 6Bin gur na chuu bitutuliib ngbaan, ki gbaa bi ki ku bi. 7Le ubɔrkpaan ngbaan gee liŋuul saakpen, le ki tun waasujatiib, le bi ku binikurb ngbaan, le ki see baatiŋ mmii. 8Le u bui waatutuliib, 'Ubɔndinn aajikaar gor a. Binib bi m yin bi na aa ŋeer bin ji tijikaar ngbaan. 9Li cha kitiŋ ponn ni aasan ni man, ki ti yi ni naah ga kan binib bimɔk na, bin dan ki nan ji ubɔndinn aajikaar ngbaan.' 10Le waatutuliib buen kitiŋ ponn ni aasan ni, ki ti yi ni baah kan bi na mɔmɔk, bin ŋan na ni bin kaa ŋan na mɔmɔk. Le bi gbiin kidiik ki bi ji tijikaar ki ponn ni na. 11"Le ubɔrkpaan koo ni un lik binib bi dan bin ji tijikaar ngbaan na, le ki kan uja u kaa pee tibɔndinn aawanpeenkaan na. 12Le ubɔrkpaan baa u, 'Njɔ, aa ŋa kinye ki koo ni du, kaa pee tibɔndinn aawanpeenkaan?' Le u si ŋmin. 13Le ubɔrkpaan bui waatutuliib ke bin chuu u, ki buu uŋaal ni utaa, ki nyan u, ki di mee lii lipaal mbɔmbɔɔn ni. U ga wii ki ŋman ŋinyin nima chee. 14"Liyaataŋakl ngbaan aatataa le ye ke biniyikaan wiir, binileekaan aa wiir." 15Le Farisii yaab buen bin ti kpokl baah ga pe Yesu nlan pu aan ki chuu u na. 16Le bi tun baadidiliib ni Ubɔr Herod aanib bibaa Yesu chee. Le bi bui u, "Tiicha, ti bee ke aa len mbamɔn la, ki mɔk timi Uwumbɔr aasan mbamɔm, kaa san unii ubaa ijawaan, kaa pak ubaa ki jer uken. 17Tuk timi saah dak pu na. Ni ŋan ti paa lampuu ki tii Ubɔrkpaan Siisa aan naa ŋan?" 18Le Yesu bee baah bir pu na, le ki baa bi, "Nimi biŋmaŋmannim, ba ŋa ni tɔŋ mi? 19Mɔk mi lampuu aamombil." Le bi joo ni limombil nan mɔk u. 20Le u baa bi, "Ŋmaa aanaŋ ni liyimbil bi li pu?" 21Le bi bui u, "Siisa yaan." Le u bui bi, "Nima pu na, di ni ye Siisa yaan na, ki di tii u man, ki di ni ye Uwumbɔr yaan na, ki di tii Uwumbɔr." 22Baah ŋun kena na, le ni gar bi pam. Le bi di cha u le ki buen. 23Leyaadaal ngbaan le Sajusii yaab dan u chee. Bima le len ke binib aan fikr nkun ni. 24Le bi bui u, "Tiicha, Moses nan len ke uja yaa kpo, kaa kpa mbim kan, unaal n di ukpopii ngbaan di kpan, ki ma mbim ki tii ukpil. 25Naabitiib bilule nan bi ti ponn ni. Le upol din upii, le ki kpo, kaa kpa ubo. Le unaal di ukpopii ngbaan kpan, 26ki mu kpo, kaa kpa ubo. Le un paa u pu na mu ŋa kena. Le bimɔk bilule kpan upii ubaa, ki kpo doo, kaa kpa ubo. 27Kookooyoo, le ukpopii ngbaan mu kpo. 28Kena pu na, binib yaa nan fikr nkun ni kan, upii ngbaan ga li ye ŋmaa aapuu? Bi mɔmɔk bilule nan joo u la." 29Le Yesu bui bi, "Naa bee Uwumbɔr aagbaŋ aah len pu na, kaa bee Uwumbɔr aah kpa mpɔɔn pu na. Nima le cha ni yenn nimi aaliin ni. 30Binib yaa nan fikr nkun ni kan, baan yoor bipiib, bipiib mu aan mɔn bijab. Bi ga li bi ke Uwumbɔr aatuuntiib bi bi paacham na aah bi pu na la. 31Joo cha binib aah ga fikr nkun ni pu na aabɔr, naa karn Uwumbɔr aah nan len pu na aa? 32ke uma le ye Abraham ni Aisak ni Jakob Aawumbɔr. Uwumbɔr yaa len ke u ye binib bi kpo na Aawumbɔr kan, nima le ŋmɔk ke bi kpa limɔfal." 33Kinipaak ngbaan aah ŋun Yesu aah tuk bi pu na, le ni gar bi pam. 34Le Farisii yaab ŋun ke Yesu len tibɔr ki jin Sajusii yaab. Le bi kuun ki dan Yesu chee. 35Le bi ponn ni ubaa, u bee Uwumbɔr aakaal mbamɔm na, ban ke un pen Yesu nlan, le ki baa u, 36"Tiicha, Uwumbɔr aakaal ponn ni, mulakaal jern ikaal mɔmɔk?" 37Le Yesu bui u, "'Aa li gee Aadindaan Uwumbɔr aasui mɔmɔk, ni saawiin mɔmɔk, ni saalandak mɔmɔk.' 38Nkaal mumina le ye nkaalkpaan ki jer ikaal mɔmɔk. 39Leelee aakaal naahn nkaal ngbaan, 'Aa li gee aana aabo ke saah gee aabaa pu na.' 40Moses aakaal mɔmɔk, ni Uwumbɔr aabɔnabtiib aaliin mɔmɔk sil ikaal ilee yee pu la." 41Farisii yaab aah kuun tɔb chee pu na, le Yesu baa bi mbaan mubaa, 42ke "Uwumbɔr Aanileekoo Kristo aabɔr pu, ni dak kinye? Ŋmaa aayabil ye u?" Le bi bui u, "David aayabil ye." 43Le u baa bi, "Kristo ngbaan yaa ye David aayabil kan, ba pu Uwumbɔr Aafuur nyaan nan cha David yi u ke 'Udindaan'? David nan len ke 44'Tidindaan Uwumbɔr tuk Ndindaan: Kaln ŋŋaaŋgii wɔb, ki ti saa buyoonn m ga nyaŋ saadim mɔmɔk na.' 45Tɔ, David aah nan yi Kristo ngbaan ke Udindaan kena na, Kristo ga li ŋma ye uyabil aa?" 46Yesu aah baa bi kena na, le ubaa aa ŋma gar mbaan ngbaan, ki mu aa ki kaar bin baa u mbaan muken daalbaadaal.

will be added

X\