MATIU 21

1Le bi peen Jerusalem, le ki fuu Betfej aatiŋ, ki bi lijool libaa chee na, bi yi li ke Olif aasui aajool. Baah ti fuu nima chee na, 2le Yesu bui waadidiliib ponn ni bilee, "Li cha man naah si gbak kitiŋ ki na. Ni yaa koo ki ponn ni kan, libuul ngbaan ni, ni ga kan ubon si gbin, waabo si u chee. Chuu gbiln ubon ngbaan, ki li joo ni u ni waabo m chee man. 3Unii ubaa yaa len tibaa kan, ni bui u, 'Tidindaan le ban i.' Le u ga cha ni li joo ni i." 4Nimina le gbiin Uwumbɔr aabɔnabr aah nan len pu na, ke 5"Tuk Sion aatiŋ aanib ke Baabɔrkpaan choo. U bi suuna ki dik ubon pu." 6Le Yesu aadidiliib buen le ki ŋa waah len pu na, 7ki joo ni ubon ngbaan ni waabo, le ki di baakeken ki di paan u pu. Le Yesu diŋ u pu. 8Kinipaak ngbaan di baakeken ki di ter nsan ponn ni. Bibaa mu bar tisufar ki di ter nsan ponn ni. 9Le kinipaak bi luln nsan na, ni bin paan puwɔb na, nan bi tar, "Hosana, pakn Ubɔr David Aayabil man. Uwumbɔr aanyoor bi un choo Tidindaan Uwumbɔr aayimbil ni na pu. Pak Uwumbɔr paacham man." 10Yesu aah fuu Jerusalem ni na, le kitiŋ ngbaan aanib mɔmɔk fii ki bi baa tɔb, "Ŋmaa ye umina?" 11Le kinipaak ngbaan bui bi, "U ye Uwumbɔr aabɔnabr Yesu u nyan ni Nasaret aatiŋ ki bi Galilee aatiŋ ponn ni na." 12Le Yesu koo Uwumbɔr aadichal ni, le ki jenn nyan binib bimɔk kooh tiwan ki daa tiwan na li ponn ni, ki labr bilikpelm aateebl mam ki di chiŋ, le ki labr bin kooh ŋinanjil na mu aajal ki di chiŋ, 13le ki bui bi, "Ni ŋmee Uwumbɔr Aagbaŋ ni ke Uwumbɔr len ke bi ga yi waadichal mmeen aadichal; nimi le ŋani li bififiirb aakakaa chee." 14Le bijoom ni biwɔb dan Yesu chee Uwumbɔr aadichal ni. Le u teb bi. Le mbim mu bi Uwumbɔr aadichal ni na tar, "Hosana, pakn Ubɔr David Aayabil man." 15Le Uwumbɔr aatotoorninkpiib ni Uwumbɔr aakaal aamɔmɔkb aah ŋun kena na, ki kan Yesu aah tun lijinjiir aatun pu na, le bi gee liŋuul, 16le ki baa Yesu, "Saa ŋun mbim ngbaan aah len pu na aa?" Le Yesu bui bi, "M ŋun. Naa kee karn Uwumbɔr aagbaŋ ni ke 'Mbim ni mbipɔm ga pak Uwumbɔr mbamɔm."' 17Yesu aah len kena na, le u siir cha bi, le ki nyan Jerusalem, le ki buen Betani aatiŋ ni, un ti doon nima. 18Le ki woln kitaak le u gir buen Jerusalem. Waah cha na, le nkon joo u. 19Le u kan likaakaln si nsan aamɔgbiln, le ki buen bu taab, le kaa kan ŋisubilbaa bu pu, see tifar ŋmeen. Le u bui busub ngbaan, "Saan ki lu ŋisubil n-yoonn mu kaa kpa ndoon na." Libuul ngbaan ni le busub ngbaan mɔmɔk kuur. 20Waadidiliib aah kan kena na, le ni gar bi pam. Le bi baa ke, "Ba pu busub ngbaan kuur mala kena?" 21Le Yesu bui bi, "M tuk nimi mbamɔn la, ni yaa gaa Uwumbɔr ki kii, kaa joo beeni kan, ni mu ga ŋma ŋa kena. Naa ye nimina baanja le ni ga ŋa. Ni yaa po bui lijool limina ke li fii ki ti lir nnyusaakpem ni kan, ni ga ŋa kena. 22Ni yaa mee Uwumbɔr ki yaa pak ke u ga ŋa naah mee u pu na kan, u ga ŋa kena ki tii nimi." 23Le Yesu koo Uwumbɔr aadichal ni, le ki tuk binib Uwumbɔr aaliin. Waah ŋani kena na, le Uwumbɔr aatotoor-ninkpiib ni Juu yaab aaninkpiib dan u chee le ki nan baa u, "Aa kpa nsan ke aa ŋa saah ŋani pu na aa? Ŋmaa tii si nsan ngbaan?" 24Le u bui bi, "M mu ga baa nimi mbaan. Ni yaa ŋma gar kan, m mu ga tuk nimi maah kpa nsan pu ki ŋani maah ŋani pu na. 25Jɔnn aah nan muin binib nnyun ni na, ŋmaa nan tii u nsan? Uwumbɔr aan binib?" Le bi kpokl tɔb, "Ti yaa bui ke Uwumbɔr le tii u nsan kan, u ga baa timi, ke ba ŋa taa gaa u ki kii. 26Ti yaa ki len ke binib le tii u nsan kan, ti san kinipaak ngbaan ijawaan baah ga ŋa timi pu na; bi mɔmɔk len ke Jɔnn nan ye Uwumbɔr aabɔnabr la." 27Nima le bi bui Yesu, "Taa nyi." Le Yesu bui bi, "M mu aan tuk nimi maah kpa nsan pu ki ŋani maah ŋani pu na." 28"Dakl lik man maah ga tuk nimi pu na aatataa. Uja ubaa nan kpa japɔɔtiib bilee, le ki dan nan bui un ye upol na, 'Maabo, buen kisaak ponn ni din ki ti tun.' Le u bui u, 29'Maan buen.' Ni kpee siib le u jer waalandak ki buen kisaak. 30Le uja ngbaan buen uwaatiir chee le ki bui u, 'Maabo, buen kisaak ponn ni din ki ti tun.' Le u bui u, 'Maaninkpil, m ga buen,' ki mu aa buen. 31Mbim bilee ngbaan ponn ni, ulau ŋa bite aageehn?" Le bi bui u, "Njan yoo." Le u bui bi, "M tuk nimi mbamɔn la, bilampuugaab ni bipiidaagoob koo ni Uwumbɔr aanaan ni, ki cha nimi. 32Ba pu? Jɔnn nan dan ni chee ki nan tuk nimi nsan mu ŋan na. Le naa gaa u ki kii. Bilampuugaab ni bipiidaagoob le gaa u ki kii. Ni nan kan baah gaa u ki kii pu na, le naa kpeln nimi aabimbin, kaa gaa u ki kii." 33"Li pel man liyaataŋakl liken. Udichaldaan ubaa le nan bi le ki naan kisaak, le ki ŋum isui i lu ŋisubil na ki ponn ni, le ki di idɔ ki di gob kisaak ngbaan, le ki gbii libuul li bi ga di ŋisubil li ponn ni na aan ki muen ŋaanyun nyan, le ki ŋa libɔkl kisaak ngbaan ponn ni, le ki yin bikpaab bibaa, le ki di kisaak ngbaan ki di ŋa biŋaal ni, ke bi li lik ki. Isui ngbaan yaa nan lue ŋisubil kan, bin ker ki tii u, aan ki ker bibaa mu. Waah ŋa kena na, le u siir ki buen kitiŋ ki daa na ni. 34Buyoonn ŋisubil nan puir na, le u di waatutuliib ki di tun bikpaab ngbaan chee, bin ti gaa ni waasubil kisaak ngbaan ponn ni, ki li joo ni. 35Le bikpaab ngbaan chuu waatutuliib ngbaan, ki gbaa ubaa, ki ku ubaa mu, ki yur ubaa mu ŋitakpal un ti kpo. 36Le usaakdaan ngbaan ki tun bitutuliib bi wiir ki jer njan yaab na. Le bikpaab ngbaan ŋa bi mu kena. 37Kookooyaan le u di ujapɔɔn ki di tun bi chee, le ki bui ke 'Bi ga pak uma la.' 38Bikpaab ngbaan aah kan waabo ngbaan na, le bi bui tɔb, 'Uma le ye waafaajil. Cha ti ku u man aan ki ji waafaal.' 39Le bi chuu u, le ki di nyan ngbaan, le ki ti ku u. 40"Kena pu na, usaakdaan yaa nan fuu ni kan, u ga ŋa bikpaab ngbaan kinye?" 41Le bitotoorninkpiib ni Juu yaab ngbaan bui ke, "U ga sil ku titunwambirdam ngbaan, ki di kisaak ngbaan ki tii bikpaab biken bi ga li bilni u waasubil ŋibin mɔmɔk na." 42Le Yesu baa bi, "Naah karn Uwumbɔr aagbaŋ ponn ni na, naa bee naatataa aa? ke 'Litakpal li bidimaab yii li na, lima le ye litakpayil. Tidindaan Uwumbɔr le ŋa kena, le ni gar timi pam.' 43M tuk nimi la, Uwumbɔr ga nyan ni chee waanaan, ki di tii linibol li ga dii waah ban pu na. 44Unii u lir litakpal ngbaan pu na, u ga koor. Unii u litakpal ngbaan lir u pu na, li ga nan u ke kitangbaak na." 45Uwumbɔr aatotoorninkpiib ni Farisii yaab aah ŋun kena na, le bi bee ke Yesu di liyaataŋakl ngbaan ki ŋaŋ bima la. 46Le bi ban ke bin chuu u, ki mu san kinipaak ngbaan ijawaan; ba pu? kinipaak ngbaan len ke Yesu ye Uwumbɔr aabɔnabr la.

will be added

X\