MATIU 19

1Yesu aah len kena ti doo na, le u nyan Galilee aatiŋ ni, le ki buen Judea aatiŋ ki bi Jɔɔdan aamɔɔdaapuul na ni. 2Le kinipaak saakpeŋ dii u. Le u teb bi ponn ni bi ye bibum na. 3Le Farisii yaab bibaa nan dan u chee, le ki ban bin tɔŋ u, le ki baa u, "Uja yaa jenn upuu lii waageehn pu kan, timi aakaal kii kena aa?" 4Le Yesu baa bi, "Naa karn Uwumbɔr aagbaŋ aah len pu na aa? Ni ŋmee ke Uwumbɔr u naan bi na, u nan naan uja ni upii, 5le ki len ke waah naan uja ni upii na, uja yaa yoor upii kan, bi ga nyan bite ni bina chee, u ni upuu ti kpaan tɔb chee, ki ŋa unibaan. 6Nima pu na baa ki ye binib bilee, bi ye unibaan la. Uwumbɔr aah kpaan bi na, unibɔn taa yakr bi." 7Le Farisii yaab baa u, "Ni yaa ye kena kan, ba pu Moses nan len ke uja yaa ban un jenn upuu kan, un ŋmee kigbaŋ ponn ni ke u jenn u, ki di tii u, le ki nin jenn u?" 8Le Yesu bui bi, "Nitafal aah pɔɔ pu na, nima le cha Moses tii nimi nsan ke ni jenn nipuutiib. N-yoonn mu Uwumbɔr naan tiwan mɔmɔk ki nan saa dandana wee, waa tii bi nsan kena. 9M tuk nimi la, upii yaa kaa gɔr kidaagook kan, uchal yaa jenn u lii ki ki yoor upii uken kan, uja ngbaan ye udaagoor la. Upii aachal yaa jenn u lii, uja uken yaa yoor upii ngbaan kan, uja ngbaan ye udaagoor la." 10Le Yesu aadidiliib bui u, "Uja ni upuu aabɔr yaa ye kena kan, uja yaa kaa yoor upii kan, ni soor." 11Le Yesu bui bi, "Bijab mɔmɔk aan ŋma ŋa saah len pu na ki yii bipiib mɔmɔk. Bijab bi Uwumbɔr tii bi mpɔɔn ke bin yii bipiib na, bima le ga ŋma yii bi. 12Bibaa bi, baah ma bi na, baa ye bijab. Bibaa mu bi, bi lee bi. Bibaa mu bi, ki yii bipiib mɔmɔk Uwumbɔr aanaan aatuln pu. Uja umɔk ga ŋma gaa iliin ngbaan ki yii bipiib mɔmɔk na, un gaa i." 13Le binib joo ni mbim ki di dan Yesu chee, ke u nan di uŋaal ki di paan bi pu, ki mee Uwumbɔr tii bi. Le waadidiliib kae bi. 14Le Yesu bui bi, "Cha mbim ngbaan dan m chee man. Taa ki jenn bi man. Binib biyaabimbin bi ke mbim aah bi pu na, bima le yeh Uwumbɔr aanaan." 15Le u di uŋaal ki di paan bi pu, le ki siir nima. 16Le unachipɔɔn ubaa nan dan Yesu chee le ki nan baa u, "Tiicha nyaan, m ga tun lituln nyaan bayaar aan ki kan limɔfal li kaa kpa ndoon na?" 17Le Yesu baa u, "Ba pu aa yi mi ke Tiicha nyaan? Uwumbɔr baanja le ŋan. Aa yaa ban limɔfal li kaa kpa ndoon na kan, kii Uwumbɔr aakaal." 18Le u ki baa u, "Mulakaal?" Le Yesu bui u, "Taa ku binib; taa gɔr kidaagook; taa su kinaayuk; taa li ye nnyaamɔn aasiiraadaan; 19li pak aate ni aana; li gee aana aabo ke saah gee aabaa pu na." 20Le unachipɔɔn ngbaan bui u, "M joo ikaal imina mɔmɔk tibir ni la. Ba gur?" 21Le Yesu bui u, "Aa yaa ban ke aa li bi mbamɔm kan, buen ti kooh saah kpa tiwan nimɔk na, ki di ŋimombil ngbaan ki di tii bigiim, aan ki li kpa liwangol paacham, aan ki dan nan dii mi." 22Unachipɔɔn ngbaan aah ŋun kena na, le ni ŋa u mpombiin; ba pu? u kpa liwankpal saakpen a. Le u siir nima. 23Le Yesu bui waadidiliib, "M tuk nimi mbamɔn la, ni pɔɔ uwankpadaan koo Uwumbɔr aanaan ni. 24Cha m moo tuk nimi, uwankpadaan aah ga koo Uwumbɔr aanaan ni pu na, ni pɔɔ ki jer laakumii aah ga koo seerkaa aameer ni pu na." 25Waadidiliib aah ŋun kena na, le ni gar bi pam. Le bi baa u, "Ni yaa ye kena kan, ŋmaa ga tee ŋmar?" 26Le Yesu lik bi le ki bui bi, "Ni pɔɔ binib le chee. Nibaa aa pɔɔ Uwumbɔr chee." 27Le Piita bui u, "Lik, ti nan di taawan mɔmɔk di lii ki dii si. Ti ga kan ba aanyoor?" 28Le Yesu bui bi, "M tuk nimi mbamɔn la, min Unibɔn Aabo ga kal libɔrjal pu, ki kan mpakm saakpen dulnyaapɔɔn ponn ni. N-yoonn ngbaan, nimi bi dii mi na mu ga kal ŋibɔrjal kipiik ni ŋilee pu, ki ga ji Israel yaab aanibol kipiik ni ŋilee tibɔr. 29Unii umɔk di cha waadichal, aan ukpitiib, aan unaatiib, aan uninkpatiib, aan ute, aan una, aan waabim, aan tisar, maayimbil pu na kan, u ga kan mfim nkub, ki ga li kpa limɔfal li kaa kpa ndoon na. 30Tɔ, binib pam bi ye bisanlulm na, le ga nan ŋa puwɔb yaab. Binib pam bi ye puwɔb yaab na, le ga nan ŋa bisanlulm."

will be added

X\