MATIU 18

1N-yoonn ngbaan le Yesu aadidiliib dan nan baa u, "Uwumbɔr aanaan ni, ulau tee ye uninyuun?" 2Le u yin ubo un dan u chee, ki di u siin bikaasisik ni, 3le ki bui bi, "M tuk nimi mbamɔn la, ni yaa kaa kpeln ki li bi ke bibilb waatiir aah bi pu na kan, naan koo Uwumbɔr aanaan ni. 4Unii umɔk sunn ubaa taab ki bi ke ubo waatiir umina aah bi pu na, udaan ngbaan le ye uninyuun Uwumbɔr aanaan ni. 5Unii umɔk gaa ubo umina aaboln maayimbil pu na, u gaa mi le na." 6"Mbim bi gaa mi ki kii na, unii yaa tɔŋ bi ponn ni ubaa ke un tun titunwambir kan, tibɔbil ga li bi u pu. Bi yaa ba tee di kinaak saakpeŋ ki di tul leen uneen ni, ki tur u lii nnyusaakpem ni, nin chee nyoo na kan, ni soor ki tii u, ni u tɔŋ ubo ubaa. 7Ntɔŋ pu, tibɔbil bi dulnyaa aanib pu. See ntɔŋ li bi. Tibɔbil mu bi unii u tɔŋ binib ke bin tun titunwambir na pu. 8"Aa yaa gee tiwan ke saah gee aaŋaal bee aataal pu na kan, tiwan ngbaan yaa tɔŋ si ke aa tun titunwambir kan, di ni lii. Aa yaa lann ŋŋaal mbaa aan litaal libaa, ki kan limɔfal li kaa kpa ndoon na kan, ni soor ni aa li kpa iŋaal ilee ni ŋitaa ŋilee ki ti li bi mmii mu kaan junn na ni. 9Aa yaa gee tiwan ke saah gee aanimbil pu na kan, tiwan ngbaan yaa tɔŋ si ke aa tun titunwambir kan, di ni lii. Aa yaa lann linimbil libaa, ki kan limɔfal li kaa kpa ndoon na kan, ni soor ni aa li kpa ŋinimbil ŋilee, ki ti li bi mmii mu kaan junn na ni." 10"Li nyi man ki taa lik bibilb ponn ni ubaa fam. M tuk nimi la, baatuuntiib bi paacham Nte Uwumbɔr aanimbiin ni n-yoonn mɔmɔk. [ 11Min Unibɔn Aabo dan dulnyaa wee ni ke binib bi waŋ na ŋmar.] 12"Unii yaa kpa ipiih nkub, i ponn ni ubaa yaa waŋ kan, ni dak ke u ga ŋa kinye? U ga di cha ipiih imonko inaa ni kipiik ni iwae, ki buen ŋijoo paab, ki ti ban upiih u waŋ na la. 13M tuk nimi mbamɔn la, u yaa ti kan u kan, u ga li mɔɔni upiih ngbaan pu, ki jer waah ga li mɔɔni ipiih imonko inaa ni kipiik ni iwae i kaa waŋ na pu. 14Kena le Nite Uwumbɔr u bi paacham na aa ban ke bibilb waatiib ngbaan ponn ni ubaa waŋ." 15"Aana aabo yaa ŋa si bakaa kan, pɔɔn aabaa ki buen ti kan u ngbaan suuna ki tuk u waataani. U yaa ŋun tii si kan, aa giin u ki siin waabuul ni la. 16U yaa yii, kaa kii tii si kan, pɔɔn aabaa ki yoor unii ubaa bee bilee, ki ki buen u chee ki ti kan u, aan binib bilee bee bitaa ŋun tibɔr ngbaan mɔmɔk ki li ye saasiiraadam. 17U yaa yii, kaa kii tii bi mu kan, nyan ti mpaan pu ki tuk Uwumbɔr aanib. U yaa yii, kaa kii tii bi mu kan, ni lik u ke ulampuugaar aan unii u kaa dii Uwumbɔr aasan na. 18"M tuk nimi mbamɔn la, tiwan ni, ni ga buu dulnyaa wee ni na, nima le buu paacham. Tiwan ni, ni ga buur lii dulnyaa wee ni na, nima le buur lii paacham mu. 19"Cha m moo tuk nimi, ni ponn ni bilee yaa kpaa kimɔbaan dulnyaa wee ni, ki mee Nte Uwumbɔr u bi paacham na kan, u ga ŋa naah ban pu na ki tii nimi. 20Binib bilee bee bitaa yaa kuun tɔb chee maayimbil pu kan, m ga li bi bikaasisik ni." 21Le Piita dan nan baa Yesu, "Ndindaan, nna aabo yaa ŋani mi bakaa kan, m ga di cha pinn u mfim muŋa? Mfim mulule ee?" 22Le Yesu bui u, "Maa tuk si ke mfim mulule. Cha pinn u imonko itaa ni kipiik mfim mulule. 23Ba pu? Uwumbɔr aanaan naahn ubɔrkpaan ubaa u ban un bee waatutuliib aah joo waapɔln pu na. 24Waah piin ki bi lik kena na, le bi joo ni waatutuln ubaa u joo waapɔln pɔŋ ŋichur ŋichur kipiik. 25Waah kaa kpa ŋimombil ŋibaa ki ga pa lipɔln ngbaan na, nima pu na le udindaan bui ke bin di u ni upuu ni waabim ni waah kpa tiwan ni na mɔmɔk, ki di kooh, aan ki di ŋimombil ngbaan ki di pa lipɔln ngbaan. 26Le ututuln ngbaan gbaan udindaan aanimbiin ni, le ki gaŋni u, 'Ndindaan, pɔɔn aabaa ki ji limɔr. M ga pa si maah jin saapɔln li mɔk na.' 27Le udindaan san u kinimbaak, le ki di cha pinn u lipɔln ngbaan, le ki di u lii. 28"Le ututuln ngbaan nyan lipaal, ki kan waatutuŋeer ubaa u joo waapɔln kpakpaln nkub na, le ki chuu u, le ki chuu uneen ni, le ki bui u, 'Pa mi saah joo maapɔln li na.' 29Le waatutuŋeer ngbaan gbaan unimbiin ni, ki gaŋni u, 'Pɔɔn aabaa ki ji limɔr. M ga pa si.' 30Le waa kii, le ki chuu u ki ti di ŋa kiyondiik ni, u li bi nima ki ti saa buyoonn u ga pa lipɔln na. 31Waatutuŋeertiib aah kan kena na, le ni bii bisui saakpen a. Le bi dan nan tuk bidindaan waah ŋa pu na mɔmɔk. 32Le bidindaan yi u, le ki bui u, 'Aa ye bakadaan la. Saah gaŋ mi na, le m di cha pinn si saapɔln mɔmɔk. 33Aa mu ba ga san saatutuŋeer kinimbaak ke maah san si pu na.' 34Le udindaan gee liŋuul u pu, le ki cha bi daa utafal ki di ŋa kiyondiik ni, u li bi nima ki ti saa buyoonn u ga pa lipɔln ngbaan mɔmɔk ki doo na. 35"Tɔ, unii umɔk kaa di cha pinn una aabo usui ponn ni na kan, Nte Uwumbɔr u bi paacham na mu ga daa utafal kena la."

will be added

X\