MATIU 15

1N-yoonn ngbaan le Farisii yaab ni Uwumbɔr aakaal aamɔmɔkb nyan ni Jerusalem le ki dan Yesu chee, le ki nan baa u, 2"Ba ŋa saadidiliib bii tiyajatiib aakaal, kaa ŋir biŋaal aan ki nin ji tijikaar?" 3Le Yesu baa bi, "Ba ŋa ni mu bii Uwumbɔr aakaal nimi aakaal pu? 4Uwumbɔr len ke 'Aa li pak aate ni aana', ki ki len ke 'Unii yaa sii ute bee una kan, bin ku u.' 5Nimi, ni len ke unii yaa bui ute bee una, 'Maah ba ga tii si ni na, maan ki ŋma tii si. M di tii Uwumbɔr la', 6ki yaa kaa pak ute kan, nimi le len ke naa kpa taani. Naah len kena na, le ni yii Uwumbɔr aaliin nimi aakaal pu. 7Ni ye biŋmaŋmannim la. Uwumbɔr aabɔnabr Aisaya aah nan len nimi aabɔr na, u len mbamɔn la, ke 8'Binib ngbaan pak Uwumbɔr bumɔb ni la. Bisui daa u chee. 9Bi dooni u yooli la, ki mɔk binib biyajatiib aakaal ke ni ye waakaal la."' 10Le Yesu yin kinipaak ngbaan, le ki bui bi, "Li pel man, aan ki bee man maah ga tuk nimi pu na aatataa. 11Tijikaar ti koo unii aamɔb ni na aan ŋma ŋa u titunwambirdaan. Tiwan ni nyan umɔb ni na, nima le ŋani u titunwambirdaan." 12Le Yesu aadidiliib dan nan baa u, "Aa nyi ke saah len pu na le cha Farisii yaab gee liŋuul aa?" 13Le u bui bi, "Tisufar timɔk Nte Uwumbɔr aa bun ti, u ga chuu ŋɔi ti la. 14Taa gar bi man. Bi ye bisanmɔkb bi job na la. Ujoon yaa mɔk ujoon nsan kan, bi mɔmɔk bilee ga lir libuul ponn ni la." 15Le Piita bui Yesu, "Tuk timi liyaataŋakl ngbaan aatataa." 16Le Yesu baa bi, "Ni mu aa kee bee maaliin aatataa aa? 17Tiwan ni koo unii aamɔb ni na koo lipuul ni, le u ti sɔnn. Naa nyi kena aa? 18Tiwan ni nyan unii aamɔb ni na, ni nyan usui ni, ki ŋani u titunwambirdaan la. 19Tiwan ni nyan binib aasui ni na le ye ilandak i kaa ŋan na, ni linikur, ni kidaagook aatuln, ni kinaayuk, ni linyaamɔngee, ni ŋisiibil. 20Nimina le ŋani unii titunwambirdaan. U yaa kaa ŋir uŋaal le ki ji tijikaar kan, nima le aan ŋa u titunwambirdaan." 21Le Yesu nyan nima, le ki buen Taya ni Saidon aatingbaan ni. 22Le upii u ye Kanaan aabo na bi nima, le ki dan nan teen, "Ndindaan, si u ye Ubɔr David Aayabil na, sam mi kinimbaak. Tiyaayar le joo mbisal ki muk u saakpen a." 23Le Yesu aa len tibaa. Le waadidiliib dan nan gaŋ Yesu ke un jenn u, u paa bi pu ki kpa kifuuk saakpen a. 24Le Yesu bui bi, "Uwumbɔr tun ni mi ke m ter Israel yaab bi yenn Uwumbɔr aasan ni na baanja." 25Waah len kena na, le upii ngbaan dan ki nan gbaan unimbiin ni ki doon u, le ki bui u, "Ndindaan, ter mi." 26Le Yesu bui u, "Ti yaa di mbim aajikaar ki di tii ibɔ kan, naa ŋan." 27Le u bui u, "Ndindaan, ni ye mbamɔn la; ibɔ mu tee ji ŋijikaabur ŋi nyan ni idindaan aateebl pu ki lir kitiŋ na." 28Le Yesu bui u, "Upii, aa gaa mi ki kii mbamɔm la. Saah ban pu na, ni ŋa kena ki tii si." Libuul ngbaan ni le ubisal pɔɔk, kaa ki bun. 29Le Yesu siir nima ki bɔɔ dii Galilee aamɔɔl ni, le ki ti jon lijool paab, le ki kal kitiŋ. 30Le kinipaak saakpeŋ joo ni biwɔb, ni bijoom, ni bibirb, ni bitaagee, ni bibum aaboŋ, ki di nan di bil Yesu aanimbiin ni. Le u teb bi mɔmɔk. 31Le ni gar kinipaak ngbaan pam; bi kan bibirb len tibɔr, ni bitaagee pɔɔk ki chuun, ni biwɔb mu fii chuun, ni bijoom likr. Le bi pak Uwumbɔr, u ye bima Israel yaab Aawumbɔr na. 32Le Yesu yin waadidiliib ke bin dan u chee, le ki bui bi, "M san kinipaak ngbaan kinimbaak la; bi bi m chee iwiin itaa, kaa kpa nibaa bin ji. Maa ban m tuk bi ke bi li cha kun, kaa puen tii bi tijikaar ke bin ji. Nibaakan bi ga fik nsan ponn ni." 33Le waadidiliib bui u, "Ti bi kipɔɔk ni la. Ti ga kan tijikaar la chee aan ki tii kinipaak ngbaan aan bin ji bab?" 34Le u baa bi, "Ni kpa ŋiboroboro kpin ŋiŋa?" Le bi bui u, "Ti kpa ŋiboroboro kpin ŋilule ni njambim siib." 35Le u bui kinipaak ngbaan, "Kaln kitiŋ man," 36le ki yoor ŋiboroboro kpin ŋilule ni njambim ngbaan, le ki doon Uwumbɔr, le ki gii gii, le ki di tii waadidiliib. Le bi yakr ki siin kinipaak ngbaan mɔk aanimbiin ni. 37Le bi mɔmɔk ŋman ki bab. Baah ŋman ki bab na, le waadidiliib yoor tijikaar ti gur na, ki gbiin tibɔɔkur tilule. 38Bijab bi jin tijikaar ngbaan na, nan ye bijab ŋichur ŋinaa la. Baa kahn bipiib ni mbim kpee. 39Le u bui kinipaak ngbaan, "Li cha kun man," le ki koo buŋɔb ni, le ki buen Magadan aatiŋ.

will be added

X\