MATIU 10

1Le Yesu yin waakpambalb kipiik ni bilee ke bin dan u chee, le ki tii bi mpɔɔn ke bin ti nyan tiyaayar binib ni ki teei bibum bi kpa iween aaboŋ mɔmɔk na, ni bimɔk kaa pɔɔ na. 2Waakpambalb kipiik ni bilee ngbaan aayimbil sɔ: njan, Simon u bi yi u Piita na, ni Andru u ye Simon aanaal na; Jems u ye Sebedee aajapɔɔn na, ni Jɔnn u ye Jems aanaal na; 3Filip, ni Batolomiu; Tomas, ni Matiu u nan gaa lampuu na; Jems u ye Alfeus aajapɔɔn na, ni Tadeus; 4ni Simon u nan ban un kuln waatiŋ aadim na, ni Judas Iskariot u ga nan kooh Yesu na. 5Le Yesu tun waakpambalb kipiik ni bilee ngbaan bin ti moon Uwumbɔr aaliin le ki bui bi, "Ni taa buen bin kaa ye Juu yaab na aatiŋ ni, ki taa buen Samaria yaab aatiŋ kibaa ni. 6Li cha man Israel yaab bi yenn Uwumbɔr aasan ni na aatim ni, 7ki li mooni Uwumbɔr aaliin ke waanaan peen ni a, 8ki li teei bibum, ki li fikr binib bi kpo na, ki li teei bikɔndam, ki nyan tiyaayar ni bininkpiib binib ni. Ni kan mpɔɔn ngbaan la, kaa pa nibaa. Ni mu li teei binib, ki taa li ban tipar. 9Ni taa li joo ŋimombil tikpalɔl ni, 10ki taa li tun lituln, ki taa li joo libɔkul ki kpee naah pee li na pu, ki taa li joo ŋinaatak, ki taa li joo tijangbar; ba pu? ututuln mɔmɔk ŋeer waajikaar la. 11"Ni yaa fuu kitiŋ kibaa ni kan, ni li ban uninyaan u ga gaa nimi waadiik ni na, ki li bi nima ki ti saa buyoonn ni ga nan nyan nima na. 12Ni yaa koo lidichal libaa ni kan, ni doon bi ki bui bi ke Uwumbɔr aanyoor bi bi pu. 13Lidichal ngbaan aanib yaa gaa nimi kan, Uwumbɔr aanyoor ga li bi bi pu. Bi yaa kaa gaa nimi kan, waanyoor aan li bi bi pu. 14Lidichal aanib, bee kitiŋ aanib yaa kaa gaa nimi kan, ki yaa kaa kii nimi aaliin kan, ni nyan nima ki kpaar nitaa aatatan ki lii nima. 15M tuk nimi mbamɔn la, bundaln Uwumbɔr ga nan ji binib tibɔr na, binib ngbaan aatafadaan ga li jer Sodom aatiŋ aanib ni Gomora aatiŋ aanib aatafadaan." 16"M ga tun nimi, ni ti moon Uwumbɔr aaliin. Ni ga li bi ke ipiih i bi ŋisapol aakaasisik ni na la. Ni li kpa nlan ke iwaa aah kpa nlan pu na, ki li bi suuna ke ŋinanjil aah bi pu na. 17Ni li nyi man. Bi ga nan chuu nimi ki ji nimi tibɔr, ki gbaa nimi ŋinaalab mmeen aadir ni. 18M pu, le ntim aaninkpiib ni bibɔrb ga ji nimi tibɔr. Le ni ga tuk Juu yaab, ni bin kaa ye Juu yaab na tibɔnyaan tee. 19Bi yaa chuu nimi kan, ni taa baa nisui ke ni ga len kinye; n-yoonn ngbaan yaa fuu ni kan, Uwumbɔr Aafuur nyaan le ga tuk nimi naah ga len pu na, 20naa ye nimi le ga len, Nite Uwumbɔr Aafuur nyaan le ga cha ni len. 21"Binib ga di binaabitiib, ki di ŋa binib aaŋaal ni, ke bin ti ku bi. Tetiib mu ga di baabim, ki di ŋa binib aaŋaal ni, ke bin ti ku bi. Binib mu ga yii bitetiib ni binatiib, ki cha binib ku bi. 22Le binib mɔmɔk ga li nan nimi m pu. Unii umɔk ji limɔr ki dii mi ki ti saa limɔfal aadoon na, uma le ga ŋmar. 23Bi yaa ŋa nimi falaa kitiŋ kibaa ni kan, ni san buen kitiŋ kiken ni. M tuk nimi mbamɔn la, buyoonn min Unibɔn Aabo ga nan gir ni na, naan kee bɔɔ dii Israel yaab aatim mɔmɔk ni, ki doo. 24"Un bae mbaen na aa jer waatiicha. Ututuln ubaa mu aa jer udindaan. 25Un bae mbaen na yaa bi ke waatiicha aah bi pu na kan, cha unimbil gbiin kena. Ututuln yaa bi ke udindaan na kan, cha unimbil gbiin kena. Bi yaa yin udichaldaan Kinimbɔŋ-daan kan, baan yi waachiln ni aanib mu Kinimbɔŋ-daan aa?" 26"Ni taa san binib ijawaan man. Tibɔbɔrkaan mɔmɔk ga kpiir. Tibɔr timɔk bɔɔ na, ti ga nyan mpaan pu. 27Maah tuk nimi tibɔr ti libɔɔl ni na, ni li mooni ti nwiihn pu. Maah loo tibɔr ti nitafal ni na, ni li mooni ti mpaan pu. 28Ni taa san binib ijawaan man. Bi ga ŋma ku nimi aawon baanja. Baan ŋma ku nimi aawiin. Ni li san Uwumbɔr u ga ŋma bii tiwon ni nwiin mɔmɔk na mmii mu kaan junn na ponn ni. 29Bi kooh iyaar ilee janjan ubaa la. Nite Uwumbɔr yaa kaa kii kan, uyaar ubaa aan lir kitiŋ. 30Uwumbɔr nyi nimi aayikpir aakahm. 31Nima pu na, ni taa san ijawaan man. Ni jer iyaar pam." 32"Unii umɔk len binib aanimbil ni ke u ye miyoo na, m mu ga len Nte Uwumbɔr u bi paacham na aanimbil ni ke udaan ngbaan le ye miyoo. 33Unii umɔk len binib aanimbil ni ke waa ye miyoo na, m mu ga len Nte Uwumbɔr u bi paacham na aanimbil ni ke udaan ngbaan aa ye miyoo." 34"Maah dan dulnyaa wee ni na, ni taa dak ke nima le ga cha binib mɔmɔk li kpaa kimɔbaan. M pu, le butɔb ga li bi. 35M pu, uja ga kpak ute kinikpakpak, usaapɔɔn mu ga kpak una, upii mu ga kpak uchapii. 36Unii aadim ga li ye waachiln ni aanib la. 37"Unii umɔk gee ute bee una ki jer mi na, waa ŋeer mi. Unii umɔk gee ujapɔɔn bee ubisal ki jer mi na, u mu aa ŋeer mi. 38Unii umɔk kaan ŋma kpo m pu na kan, waa ŋeer mi. 39"Unii yaa kaa kii ke u kpo m pu kan, waamɔfal ga bee yooli la. Unii yaa kpo m pu kan, u ga kan limɔfal li kaa kpa ndoon na." 40"Unii yaa gaa nimi maanib kan, u gaa mi le na. Unii yaa gaa mi kan, u gaa Uwumbɔr u tun ni mi na le na. 41Unii yaa gaa Uwumbɔr aabɔnabr kan, waah ye Uwumbɔr aabɔnabr na pu le cha u gaa u, nimana u ga kan Uwumbɔr aabɔnabr aapal. Unii yaa gaa uninyaan kan, waah ye uninyaan na le cha u gaa u, nimana u ga kan uninyaan aapal. 42M tuk nimi mbamɔn la, unii umɔk tii maadidiir waatiir ubaa nnyunyunkoo baanja na kan, waah ye maadidiir pu na le cha u tii u, nimana u ga kan tiyaapal."

will be added

X\