MAK 8

1N-yoonn ngbaan le kinipaak ngbaan ki kuuni Yesu chee. Baa kpa nibaa bin ji. Le u yin waadidiliib ke bin dan u chee, le ki bui bi, 2"M san kinipaak ngbaan kinimbaak la; bi bi m chee iwiin itaa, kaa kpa nibaa bin ji. 3Bibaa nyan ni dandar la. M yaa kaa tii bi tijikaar, ki bui bi ke bi li cha kun kan, bi ga ti fik nsan ponn ni." 4Le waadidiliib bui u, "Ti bi kipɔɔk ni la. Ti ga kan tijiir la chee aan ki di tii binib ngbaan mɔmɔk aan bi ji bab?" 5Le u baa bi, "Ni kpa ŋiboroboro kpin ŋiŋa?" Le bi bui ke, "Ŋilule." 6Le u bui kinipaak ngbaan, "Kaln kitiŋ man." Le u yoor ŋiboroboro kpin ŋilule ngbaan, le ki doon Uwumbɔr, le ki gii gii, le ki di tii waadidiliib, bin ti yakr siin kinipaak ngbaan aanimbiin ni. Le bi yakr ki siin binimbiin ni. 7Le bi kpa njambim siib mu. Le u yoor ijan ngbaan mu, ki doon Uwumbɔr, le ki bui bi ke bin di i mu ki di yakr siin binimbiin ni. 8Le bi mɔmɔk ŋman ki bab. 9Bi ga nan li fuu ŋichur ŋinaa la. Baah ŋman ki gur na, le waadidiliib peei ki gbiin tibɔɔkur tilule. Le u bui kinipaak ngbaan ke bi li cha kun. 10Libuul ngbaan ni, le u ni waadidiliib koo buŋɔb ni, ki buen Dalmanuta aatiŋ ni. 11Le Farisii yaab dan, ki nan kpak Yesu kinikpakpak. Bi ban bi tɔŋ u la, le ki bui u ke un tun lijinjiir aatuln Uwumbɔr aapɔɔn pu, bin kan. 12Le Yesu fuur lii uponn ni, le ki baa bi, "Nimi dandana aanib, ba ŋa ni ban ke m tun lijinjiir aatuln aan ni kan? M tuk nimi mbamɔn la, maan tun lijinjiir aatuln aan ni kan." 13Le u siir nima ki cha bi. Le u ni waadidiliib ki gir koo buŋɔb ngbaan ni, bin ti puur limɔɔdaapuul. 14Le waadidiliib sunn kaa joo boroboro. Boroboro kpiln libaa baanja le bi baaŋɔb ni. 15Le u bui bi, "Ni li nyi man Farisii yaab ni Ubɔr Herod aaboroboro aanyɔk." 16Le bi bui tɔb, "Taah kaa joo boroboro na, nima le cha u len kena." 17Le Yesu bee baah len tɔb chee pu na, le ki baa bi, "Ba ŋa ni len tɔb chee ke naa joo boroboro? Naa kee bee maabimbin aa? Naa bee maah len pu na aatataa aa? Nitafal pɔɔ la aa? 18Ni kpa ŋinimbil, kaa waa aa? ki kpa ŋitafal, kaa ŋun aa? 19Maah nan di ŋiboroboro kpin ŋiŋmu ki gii yakr binib ŋichur ŋiŋmu na, ni peei nin gur na tibɔɔkur tiŋa? Naa teer la aa?" Le bi bui u, "Kipiik ni tilee." 20Le u ki gir baa bi, "Maah nan di ŋiboroboro kpin ŋilule ki gii yakr tii binib ŋichur ŋinaa na, ni pee nin gur na tibɔɔkur tiŋa?" Le bi bui u, "Tilule." 21Le u baa bi, "Naa kee nin bee maah len pu na aatataa aa?" 22Le bi fuu Betseda aatiŋ ni. Le binib bibaa joo ni ujoon Yesu chee, le ki gaŋ u ke u nan di uŋaal ki di meeh u. 23Le Yesu chuu uŋaal, le ki dar u ki di nyan kitiŋ ni, le ki tii timɔɔtan, ki di ŋa ujoon ngbaan aanimbil ni, le ki di uŋaal ki di paan u pu, le ki baa u, "Aa waa aa?" 24Le u lik, le ki bui ke, "M waa binib chuun, ki naahn isui la." 25Le Yesu ki gir di uŋaal ki di paan unimbil pu. Le u lik mbamɔm, le ki pɔɔk, le ki waa tiwan mɔmɔk chain. 26Le Yesu bui u ke u li tak nsan cha kun. U taa bɔɔ dii kitiŋ ngbaan ni. 27Le Yesu ni waadidiliib siir nima ki ti buen Siisarea Filipi aatingbaan ni. Baah cha na, le u baa bi, "Binib bui ke m ye ŋmaa?" 28Le bi bui u, "Bibaa len ke aa ye Jɔnn u nan muin binib nnyun ni na. Biken mu len ke aa ye Uwumbɔr aabɔnabr Elaija u nan bi n-yaayoonn na la. Biken mu len ke aa ye n-yaayoonn na aabɔnabtiib ponn ni ubaa la." 29Le u baa bi, "Nimi, ni len ke m ye ŋmaa?" Le Piita bui u, "Aa ye Kristo u Uwumbɔr lee u na la." 30Le Yesu sur bi ke bi taa tuk unii ubaa. 31Le u piin ki tuk waadidiliib, "Min Unibɔn Aabo ga ji falaa saakpen. Juu yaab aaninkpiib, ni Uwumbɔr aatotoorninkpiib, ni Uwumbɔr aakaal aamɔmɔkb ga yii mi, ki ku mi. Iwiin itaa daal le m ga fikr nkun ni." 32U tuk bi tibɔr ngbaan chain la. Le Piita di u ki di nyan ngbaan, le ki kae u, ke u taa len kena. 33Le Yesu fenn ki toŋ waadidiliib biken, le ki kae Piita, le ki bui ke, "Kinimbɔŋ, siir foor m chee. Saa dak ke Uwumbɔr aah dak pu na. Aa dak ke binib aah dak pu na la." 34Le Yesu yin kinipaak ngbaan ni waadidiliib, le ki bui bi, "Unii yaa ban un dii mi kan, un yii ubaa, ki yoor waadɔpuinkoo, aan ki li dii mi. 35Unii umɔk kaan ŋma kpo m pu na kan, waamɔfal ga bee yooli la. Unii umɔk ga ŋma kpo m pu, ni tibɔnyaan tee pu na kan, u ga kan limɔfal li kaa kpa ndoon na. 36Unii yaa kan dulnyaa wee ni aawan mɔmɔk, ki lann waamɔfal kan, ba aanyoor le u kan? 37Unii tee ga di ba ki daa waamɔfal? 38Dandana aanib ye titunwambirdam la, kaa dii Uwumbɔr. Unii yaa san inimɔɔn m ni maaliin chee, un tuk bi kan, min Unibɔn Aabo ga nan yii udaan ngbaan. M ga gir ni, ki li kpa Nte Uwumbɔr aapɔɔn. Uwumbɔr aatuuntiib bi ye chain na, mu ga dii mi. N-yoonn ngbaan le m ga yii udaan ngbaan."

will be added

X\