MAK 7

1Le Farisii yaab ni Uwumbɔr aakaal aamɔmɔkb bibaa nyan Jerusalem, ki dan nan kuun Yesu chee. 2Le bi kan ke waadidiliib bibaa aah ji tijikaar pu na, bi bii baakaal; ba pu? baa ŋir biŋaal. 3Farisii yaab ni Juu yaab biken dii biyajatiib aakaal la. Bi yaa kaa ŋir biŋaal mbamɔm kan, baan ji tijikaar. 4Bi yaa nyan kinyaŋ ni kan, baan ji nibaa see bi puen fu nnyun waahr, le ki dii ikaal aaboŋ aaboŋ ke nimina na, ki ŋir ŋisambil, ni ŋibuu, ni tiyir, ni tiwandɔkaan, baakaal aah dii pu na. 5Le Farisii yaab, ni Uwumbɔr aakaal aamɔmɔkb ngbaan baa Yesu ke, "Ba ŋa saadidiliib aa dii tiyajatiib aakaal? Bi ji tijikaar kaa ŋir biŋaal." 6Le u bui bi, "Nimi biŋmaŋmannim, Uwumbɔr aabɔnabr Aisaya aah nan len nimi aabɔr na, u len mbamɔn la, ke 'Binib ngbaan pak Uwumbɔr bumɔb ni la. Bisui daa u chee. 7Bi dooni u yooli la, ki mɔk binib biyajatiib aakaal, ke ni ye waakaal la."' 8Le Yesu nan ki tuk bi, "Ni di Uwumbɔr aakaal di lii a, le ki joo binib yaan. 9"Ni tee yii Uwumbɔr aakaal, le ki dii niyajatiib aakaal. 10Moses nan len ke, 'Aa li pak aate ni aana,' ki ki len ke 'Unii yaa sii ute bee una kan, bin ku u.' 11Nimi, ni len ke unii yaa bui ute bee una 'Maah ba ga tii si ni na, maan ki ŋma tii si. M di tii Uwumbɔr la,' 12ki yaa kaa tii ute ni una nibaa kan, ni kii kena la. 13Nimina ponn ni, ni yii Uwumbɔr aaliin, le ki dii niyajatiib aakaal, ki tuk binib ke bi mu li dii kena. Ni ŋani tiwan nimina mɔmɔk aaboŋ pam." 14Le u ki yin kinipaak ngbaan, le ki bui bi, "Ni mɔmɔk li pel man, aan ki bee maah ga tuk nimi pu na aatataa. 15Tiwan ni unii di ŋa umɔb ni un di nab na nibaa aan ŋma ŋa u titunwambirdaan. Tiwan ni nyan umɔb ni na, nima le ŋani u titunwambirdaan. [ 16Un kpa litafal na kan, un ŋun.]" 17Le u siir kinipaak ngbaan chee, ki kun. Waah koo kidiik ni na, le waadidiliib baa u waayaataŋakl aatataa. 18Le u baa bi, "Ni mu aa kee bee maaliin aatataa aa? Naa nyi ke unii aah ji tiwan ni na aan ŋma ŋa u titunwambirdaan aa? 19Waah ji ni na aa koo usui ni. Ni koo lipuul ni, le u ti sɔnn." Yesu aah len kena na, ni mɔk ke tijikaar tibaa aa kɔ. 20Le u nan ki tuk bi, "Tiwan ni nyan unii aamɔb ni na, nima le ŋani u titunwambirdaan. 21Ni nyan ni binib aasui ni na le ye ilandak i kaa ŋan na, ni kidaagook aatuln, ni kinaayuk, ni linikur, 22ni iniman, ni mbiin, ni linyaamɔngee, ni inimpoo, ni lipiipoln, ni ŋisiibil, ni kalmbaani, ni kijɔrk aatuln. 23Tiwambir nimina mɔmɔk nyan ni unii aasui ni la, le ki ŋani u titunwambirdaan." 24Le Yesu siir nima, le ki buen Taya ni Saidon aatingbaan ni, le ki koo lidichal libaa ni, kaa gee ke unii ubaa li nyi ke u bi nima. U mu aa ŋma bɔr. 25Upii ubaa bi nima chee. Waa ye Juu yaab aanii ponn ni ubaa. Bi nan ma u Fonisia aatiŋ ni, Siria aatingbaan ni. Le tiyaayar joo ubisal. Le upii ngbaan ŋun Yesu pu, le ki dan nan gbaan unimbiin ni, le ki gaŋ u ke un nyan tiyaayar ti joo waabo na. 27Le Yesu bui u, "Cha ti kpiin mbim waahr. Ti yaa di mbim aajikaar ki di tii ibɔ kan, naa ŋan." 28Le u bui u, "Ndindaan, ni ye mbamɔn la; ibɔ mu tee dɔ teebl taab ki ji mbim aajikaabur ŋi lir kitiŋ na." 29Le Yesu bui u, "Saah len mbamɔn pu na, nima le cha m nyan tiyaayar ngbaan saabo ni. Aa ga ŋma gir kun." 30Le u gir kun linampal, le ki ti kan ke tiyaayar ngbaan sil nyan waabo ni. U dɔ kidiik ni la. 31Le Yesu ki nyan Taya aatingbaan ni, ki di bɔn dii Saidon aatiŋ ni, le ki di bɔn dii kitiŋ ki bi yi ki ke Ntimkipiik, le ki fuu Galilee aamɔɔl ni. 32Le binib bibaa joo ni ubir u chee. Utafal mu kpaa. Le bi gaŋ Yesu ke un di uŋaal ki di paan u pu. 33Le Yesu di u nyan kinipaak ngbaan ponn ni, ki di buen ngbaan, le ki di uŋaambim ki di meeh utafakpaa ngbaan aatafal, le ki tii timɔɔtan le ki di meeh utafakpaa ngbaan aalambil, 34le ki waan lik paacham, le ki fuur lii uponn ni, le ki bui u ke "Efata." Efata aatataa le ye ke "Kpaar." 35Libuul ngbaan ni, le u ŋun. Le ulambil mu lɔkr. Le u piin ki bi len tibɔr mbamɔm. 36Le Yesu bui bi ke bi taa tuk ubaa. U yaa bui bi ke bi taa tuk ubaa kan, le bi moo mooni ti. 37Le ni gar binib ki ti nyaŋ. Le bi len ke, "Waah ŋani nimɔk na, ni ŋan. U cha bitafakpaab ŋun, ki cha bibirb mu len."

will be added

X\