MAK 5

1Le bi fuu limɔɔdaapuul, Gerasiin yaab aatiŋ ni. 2Le uwaar ubaa bi nima. 3Waakookooyaan ye baah sui binib titakpaluln ti ponn ni na la. Ubaa aa ŋma joo u. Bi yaa buu u tikululn kan, u keei ti la. 4Bi nan joo idɔribi ni tikululn ki buu u kpaala kpaala. Le u kii tikululn ngbaan, ki gbaa wii idɔribi mu. Ubaa aa ŋma tiŋ u. 5Kinyeek ni nwiin pu, u po bi ŋikaakul ngbaan ni, ni ŋigongon paab, ki tar, ki joo ŋitakpal geei ubaa. 6Yesu aah nyan buŋɔb ni na, le uwaar ngbaan bi dandar, le ki kan u, ki san nan tooh u nsan ni, le ki nan gbaan unimbiin ni, ki doon u. 7Le Yesu bui ke, "Tiyaayar, nyan uja ngbaan ni." Le u teen le ki len mpɔɔn pu, "Yesu, si u ye Uwumbɔr u kaa kpa ŋeen aatɔ na Aajapɔɔn na, aa ban ba m chee? M gaŋ si Uwumbɔr pu, taa ŋa mi falaa." 9Le Yesu baa u, "Bi yi si ke ba?" Le u bui u, "Ti ye tiyaayar ti wiir na, nima le bi yi mi ke Kipaak," 10le ki gaŋ u saakpen ke u taa jenn nyan ti kitiŋ kee ni. 11Le igbeer bi nima chee, ki wiir, ki chuun ji limɔɔgongoln paab. 12Le tiyaayar ngbaan gaŋ Yesu, "Cha ti ti koo igbeer ngbaan ni." 13Le u kii. Le ti nyan uja ngbaan ni, le ki koo igbeer na ni. Le igbeer mɔmɔk san sunni limɔɔgongoln taab, le ki koo nnyun ni, le ki bee nnyun ni. I ga nan li fuu ŋichur ŋilee la. 14Le bijab bi kii igbeer ngbaan na san buen kitiŋ ni, ni itingbaan ni, le ki ti tuk binib tibɔr ngbaan. Binib aah ŋun kena na, le bi dan bi nan lik budabu ŋa na, 15le ki fuu ni Yesu chee, ki kan uja u tiyaayar ti wiir na nan joo u na, ka nima. U cheer, ki pee tiwanpeenkaan, kaa ki chuun u ŋmeen. Le ijawaan chuu bi. 16Le binib bi kan Yesu aah teb uja ngbaan pu na, tuk bi Yesu aah ŋa pu ki teb u na, ki tuk bi naah ŋa igbeer ngbaan pu na. 17Le bi gaŋ Yesu ke un nyan baatiŋ ni. 18Le u gir ti koo buŋɔb na ni. Waah gir un ti koo buŋɔb ni na, le uja u tiyaayar nan joo u na gaŋni u ke u cha un dii u. 19Le u yii, le ki bui u, "Gir kun, ki ti tuk aadoyaab Aadindaan aah san si kinimbaak ki tun litukpaan ki tii si pu na." 20Le u buen, le ki bɔɔ dii kitiŋ ki bi yi ki ke Ntimkipiik, le ki tuk binib Yesu aah tun litukpaan pu ki tii u na. Le ni gar binib mɔmɔk pam. 21Le Yesu ki gir puur limɔɔdaapuul buŋɔb na ni. Waah fuu nima na, le kinipaak saakpeŋ kuuni u chee. Le u si nnyun aagbaan. 22Le uja ubaa dan u chee. U ye mmeen aadiik ni aaninkpil ubaa la. Le bi yi u ke Jairus. Waah kan Yesu na, le u nan gbaan unimbiin ni, 23le ki gaŋ u saakpen le ki bui u, "Ni kpee siib na, mbisal ga kpo. M gaŋ si la, dan nan di aaŋaal ki di paan u pu, aan u pɔɔk ki taa kpo." 24Le Yesu dii u ki buen. Le kinipaak ngbaan mu dii Yesu, le ki mueni u. 25Le upii u fuu tipiir ŋibin kipiik ni ŋilee taa door na, mu bi nima chee. 26U nan cha dɔktatiib chee, ki kan falaa aaboŋ mɔmɔk, ki jin waamombil mɔmɔk doo, le naa soor. U moo buŋni la. 27Le u ŋun Yesu aabɔr, le ki len usui ni ke u yaa po meeh waawanpeenkaan kan, u ga pɔɔk. Le u dii Yesu kinipaak ngbaan ponn ni, le ki nan dan upuwɔb, le ki taln uŋaal, ki meeh waawanpeenkaan. 29Libuul ngbaan ni, le u pɔɔk, le ki bee uwon ponn ni ke iween ngbaan doo a. 30Le Yesu bee usui ni ke ntebm aapɔɔn ngem nyan u ni a. Le u fenn kinipaak ngbaan ni, le ki baa ke, "Ŋmaa meeh maawanpeenkaan?" 31Le waadidiliib bui u, "Aa kan kinipaak ngbaan aah kpei si pu na, le aa baa ke ŋmaa meeh si?" 32Le u fenn, ki lik ni kookoo, un kan udaan u meeh u na. 33Le upii ngbaan bee tiwan ni ŋa u na. Ijawaan chuu u, le uwon gbaa. Le u dan nan gbaan Yesu aanimbiin ni, le ki tuk u mbamɔn mɔmɔk. 34Le Yesu bui u, "Mbisal, saah gaa mi ki kii mbamɔm pu na, nima le cha aa pɔɔk. Li cha ni mpopiin. Saaween ngbaan aan ki fii." 35Yesu aah len kena na, le binib bibaa nyan ni Jairus do, ki tooh bi nsan ni, le ki nan bui Jairus, "Aabisal kpo a. Taa ki cha Tiicha ngbaan ŋani falaa ki cha aado." 36Le Yesu ŋun baah len pu na, le ki bui Jairus, "Gaa mi ki kii, ki taa san ijawaan." 37Le Yesu aa cha ubaa dii u, see Piita ni Jems, ni Jems aanaal Jɔnn. 38Le Yesu fuu Jairus do le ki ŋun kifuuk. Binib bi nima ki wiir, ki wii ikpowiil, ki kaani. 39Le u koo lidichal ngbaan ni. Waah koo ni na, le u baa bi, "Ba ŋa ni kpa kifuuk kena, ki wii? Ubo ngbaan aa kpo. U geen la." 40Le bi laa u saakpen. Le u jenn nyan bi mɔmɔk lipaal, 41le ki di ubo ngbaan aate ni una, ni waadidiliib bitaa na, le ki koo waah bi kidiik ki ponn ni na, le ki chuu uŋaal, le ki bui u, "Upiibo, m bui si la, fiin." 42Libuul ngbaan ni, le u fii sil, ki chuun gonni. U nan ye ŋibin kipiik ni ŋilee aabo la. Le ni gar bi ki ti nyaŋ. 43Le Yesu bui bi ke bi taa tuk unii ubaa, le ki bui bi ke bin tii upiibo ngbaan tijikaar un ji.

will be added

X\