MAK 2

1Iwiin ilee aah jer na, le Yesu ki gir buen Kapenaum aatiŋ ni. Le binib ŋun ke u bi linampal. 2Le kinipaak kuuni nima chee. Baah wiir pu na, mpaan aa ki gur mbisamɔb chee, ubaa ki sil. Le u tuk bi Uwumbɔr aaliin. 3Waah bi tuk bi Uwumbɔr aaliin na, le binib bibaa fuu ni, ki lulni unii uyaawon faan na. Binib binaa le lulni u. 4Kinipaak ngbaan pu, le baa ŋma koo ni Yesu chee. Le bi jon kidiik aapaacham, le ki chee liboln ki tuur waah si nin chee kidiik ponn ni na, le ki di baah luln unii u na ki ŋa liboln ngbaan ponn ni, ki di bil Yesu aanimbiin ni. 5Le Yesu kan baah gaa u ki kii mbamɔm pu na, le ki bui uja uyaawon faan na, "Maabo, m di cha saatunwambir ki pinn si." 6Le Uwumbɔr aakaal aamɔmɔkb bibaa ka nima, le ki bi dak bisui ni, 7"Ba ŋa uja wee len kena? U sii Uwumbɔr la. Ubaa aan ŋma di cha pinn titunwambir, see Uwumbɔr baanja." 8Le Yesu bee baah dak pu na, le ki baa bi, "Ba ŋa ni dak kena nisui ni? 9Maah bui uyaawon faan na ke m di cha waatunwambir pinn u na, nima le pɔɔ le aan m yaa bui u ke un fiin ki yoor waawandɔkaan ki li chuun, li pɔɔ ɔɔ? 10M ga mɔk nimi ke min, Unibɔn Aabo, kpa mpɔɔn dulnyaa wee ni ke m di cha pinn titunwambir." Waah len kena na, le u bui uyaawon faan na, 11"M bui si la, fiin, ki yoor saawandɔkaan, ki li cha kun." 12Libuul ngbaan ni le u fii sil, le ki yoor waawandɔkaan, ki nyan lipaal bi mɔmɔk aanimbil ni. Le ni gar bi mɔmɔk pam. Le bi nyuŋ Uwumbɔr, le ki bui ke, "Taa kee kan kena." 13Le Yesu ki gir buen limɔɔl ni. Le kinipaak dan u chee. Le u tuk bi Uwumbɔr aaliin. 14Waah cha na, le u kan ulampuugaar ubaa ka baah gaar lampuu nin chee na. Bi yi u ke Liifai, u ye Alfeus aajapɔɔn. Le Yesu bui u, "Li dii mi." Le u fii, le ki dii u. 15Nee aapuwɔb, le Yesu bi Liifai do, ki bi ji tijikaar. Le bilampuugaab ni titunwambirdam nan wiir, le ki dii Yesu. Le bi ponn ni pam mu ka u ni waadidiliib chee, ki bi ji tijikaar. 16Le Uwumbɔr aakaal aamɔmɔkb bibaa, bi ye Farisii yaab na, baah kan ke Yesu bi ji bilampuugaab ni titunwambirdam chee tijikaar na, le bi baa waadidiliib, "Ba ŋa u ji bilampuugaab ni titunwambirdam chee tijikaar?" 17Le Yesu ŋun baah len pu na, le ki bui bi, "Binib bi kpa laafee na aa ban dɔkta, see bi bun na le ban dɔkta. Maa dan ke m nan yi bininyaan. M dan ke m nan yi titunwambirdam bi nan kpeln baabimbin." 18Le Jɔnn aadidiliib ni Farisii yaab nan bi lul bumɔb. Le binib bibaa dan nan bui Yesu, "Jɔnn aadidiliib ni Farisii yaab aadidiliib lul bumɔb la. Ba pu saadidiliib ma aa lul?" 19Le u baa bi, "Bicham bi dan bi nan ji ubɔndinn aajim na ga ŋma lul bumɔb buyoonn upiidinn bi bi chee na aa? Aayii. Buyoonn upiidinn bi bi chee na, baan ŋma lul bumɔb. 20N-yoonn mu choo, le bi ga chuu nyan upiidinn na bi chee mpɔɔn. N-yoonn ngbaan le bi ga lul bumɔb. 21"Ubaa aan di likekepɔln aageln, ki di leŋ libɔkukpokl. U yaa ŋa kena kan, likekepɔln aageln na ga kar libɔkukpokl na. Liboln ngbaan ga jer njan yaan. 22Ubaa mu aan di ndaawiin, ki di ŋa kilookpok ponn ni. U yaa ŋa kena kan, kilookpok na ga puu, ki bii. Ndaan na mu ga kpir. Bi ga di ndaawiin ki di ŋa kiloopɔŋ ni la." 23Juu yaab aakpakool libaa daal, le Yesu ni waadidiliib bɔɔ dii kisaak ponn ni. Baah chuun ki cha na, le waadidiliib joo tijikaar na geei, bi ti ŋmɔ. 24Le Farisii yaab nan baa Yesu, "Ba ŋa saadidiliib ŋani kena? Timi aakaal aa kii ke bi ŋa kena likpakool daal." 25Le u baa bi, "Naa karn Ubɔr David aah nan ŋa pu na aa? Nkon nan joo u ni waanib. Baa nan kpa tijikaar. 26Le u koo Uwumbɔr aadichal ni, buyoonn Abiatar nan ye Uwumbɔr aatotoorninkpil na, le ki di Uwumbɔr aaboroboro, ki di ŋman, ki di tii waanib mu, bin ŋman. Baah ŋa kena na, le bi bii Moses aakaal mu len ke Uwumbɔr aatotoortiib baanja le ga ŋmɔ boroboro ngbaan. 27"M tuk nimi la, Uwumbɔr nan naan likpakool daal ki di tii binib, bin fuur. Waa ban ke likpakool daal ŋa bi falaa. 28Min Unibɔn Aabo le ye likpakool daal mu Aadindaan."

will be added

X\