MAK 16

1Juu yaab aakpakool daal aah jer na, le Mari Magdalene ni Salome, ni Mari u ye Jems aana na, buen ti daa tubalee, bin ti di ŋa Yesu aawon pu. 2Le ki woln kitaak kichakpinaanyeek ni, nwiin aah laa puu na, le bi buen likaakul ngbaan chee. 3Tɔ, litakpal li lek kitakpaluŋ aamɔb na ye lisaakpiln na. Nima pu na, baah cha na, le bi baa tɔb, "Ŋmaa ga ti binn litakpal na ki tii timi?" 4Le bi lik, le ki kan ke litakpal na aa ki lek. 5Le bi koo likaakul na ponn ni le ki kan unachipɔɔn ubaa ka ŋŋaaŋgii wɔb ki pee libɔkupiln fɔfɔk. Le ni gar bi pam. 6Le u bui bi, "Ni taa cha ni gar nimi man. Ni ban Yesu u ye Nasaret aatiŋ aanii na, u bi nan kpaa u ndɔpuinkoo pu na la. U fikr nkun ni a. Waa bi du. Lik man baah nan di u bil nin chee na. 7Ni li cha ti tuk Piita ni waadidiliib biken ke u luln bi pu nsan, ki cha Galilee aatiŋ la. Bi ga ti kan u nima, waah nan tuk bi pu na." 8Le ni gar bipiib na pam, le biwon gbaa. Le bi nyan likaakul na ni, le ki san. Ijawaan aah chuu bi na, le baa tuk unii ubaa. 9Juu yaab aakpakool daal aah jin ki woln kitaak na aachakpitaawoln, Yesu aah fikr nkun ni na, le u puen di ubaa mɔk Mari Magdalene. Mari le ye upii u Yesu nan nyan tiyaayar tilule u ni na. 10Le Mari buen binib bi nan dii Yesu na chee. Bi kpa mpombiin ki ka wii. Le Mari tuk bi ke u kan Yesu, u fikr nkun ni a. 11Baah ŋun kena na, le baa pak ti. 12Nimina aapuwɔb, le bi ponn ni bilee nan chuun cha ntingbaan ni. Baah cha na, le Yesu nan di ubaa mɔk bi. Waa bi ke waah bi pu buyoonn Mari Magdalene kan u na. 13Le bi gir buen biken chee, ki ti tuk bi ke bi kan Yesu. Le baa pak baah len pu na. 14Nimina aapuwɔb le waadidiliib kipiik ni ubaa ka ji tijikaar. Baah ji na, le Yesu di ubaa ki di mɔk bi, le ki kae bi, ke ba ŋa baa pak binib bi kan u waah fikr nkun ni na aah len pu na, ke bitafal le pɔɔ. Baa gaa u ki kii mbamɔm. 15Le u ki tuk bi, "Ni li cha itingbaan mɔmɔk ni, ki di tibɔnyaan tee ki tuk binib mɔmɔk. 16Unii u gaa mi ki kii ki cha bi muin u nnyun ni na, u ga ŋmar. Unii u kaa gaa mi ki kii na, Uwumbɔr ga bui ke waabɔr bii. 17Binib bi gaa mi ki kii na ga tun lijinjiir aatun. Maayimbil pu le bi ga nyan tiyaayar binib ni; bi ga len iliin yaayan; 18bi ga chuu iwaa, le yaan ŋa bi nibaa. Bi yaa nyu liluul kan, laan ŋa bi nibaa. Bi ga di biŋaal paan bibum pu, le bi ga pɔɔk." 19Tidindaan Yesu aah len bi chee tibɔr doo na, le Uwumbɔr di u buen paacham, le u ti kal uŋaaŋgii wɔb. 20Le waadidiliib buen ni kookoo, ki tuk binib tibɔnyaan tee. Le Tidindaan ter bi, le ki cha bi tun lijinjiir aatun. Baah tun lijinjiir aatun na, nima le mɔk binib ke baah len tibɔnyaan tee na, ti gbii. Amii.

will be added

X\