MAK 13

1Le Yesu nyan Uwumbɔr aadichal ngbaan ni. Waah nyan ni na le waadidiliib ponn ni ubaa bui u, "Tiicha, lik ŋitakpal ŋi bi di maa lidichal lee na aah ŋan pu na, tidir tee aah wiir pu na." 2Le Yesu baa u, "Aa kan tidir saakpiin tee la aa? Bi ga nan gbaa wii lidichal limina mɔmɔk. Litakpal libaa aan ki li paa liken pu." 3Le u buen ki ti kal Olif aasui aajool paab, li si gbak Uwumbɔr aadichal chee na. Le Piita ni Jems ni Jɔnn ni Andru dan u chee bibaa, ki nan bui u, 4"Tuk timi, bi ga ŋa kena bayoonn? Ba ga li ye limɔkl ki mɔk timi ke ni ŋeer bin ŋa kena?" 5Le u piin ki bi tuk bi, "Ni li nyi man, ubaa taa ŋmann nimi. 6Binib pam le ga nan dan, ki pur maayimbil, ke bima le ye min Yesu, ki ŋmann binib pam. 7Ni ga ŋun ke binib to butɔb kɔnkɔni du, ni dandar mu. Ni taa cha ni li muk nimi man. Uwumbɔr le siin ke nimina mɔmɔk ga ŋa. Nima le aan mɔk ke dulnyaa wee ga doo libuul ngbaan ni. 8Linibol libaa ga to linibol liken butɔb. Nnaan mubaa aanib ni nnaan muken aanib ga to tɔb butɔb. Kitiŋ ga deŋ ŋipepel, ŋipepel. Nkon le ga lir ntim pam ponn ni. Nimina mɔmɔk le ga li ye njan aafalaa. 9"Nimi, ni li nyi man. Bi ga nan chuu nimi, ki di buen kooti mam ni. Bi ga gbaa nimi mmeen aadir ni. M pu, le ntim aaninkpiib ni bibɔrb ga ji nimi tibɔr. Le ni ga tuk bi tibɔnyaan tee. 10Binib ga di tibɔnyaan tee ki tuk ŋinibol mɔmɔk waahr, aan dulnyaa wee nin doo. 11Bi yaa chuu nimi, ki di buen kooti ni kan, ni taa puen dak nisui ni ke ni ga len kinye. N-yoonn ngbaan yaa nan fuu ni kan, lem Uwumbɔr Aafuur nyaan aah ga tuk nimi pu na. Naa ye nimi le ga len. Uwumbɔr Aafuur nyaan le ga len. 12N-yoonn ngbaan le unii ga di una aabo ki di ŋa binib aaŋaal ni, ke bin ti ku u. Tetiib mu ga di baabim, ki di ŋa binib aaŋaal ni, ke bin ti ku bi. Binib mu ga yii bitetiib ni binatiib, ki cha binib ku bi. 13M pu, le binib mɔmɔk ga li nan nimi. Unii umɔk ji limɔr ki dii mi ki ti saa limɔfal aadoon na, uma le ga ŋmar." 14"Ni ga kan tiwan ni kpa ijawaan ki bii tiwan nimɔk ye chain na, si naah kaa ba ga li si nin chee na." (Nimi bi karni na, ni li bee nimina aatataa.) "N-yoonn ngbaan yaa nan fuu ni kan, binib bi bi Judea aatiŋ ponn ni na, bin san buen ŋijoo paab. 15Unii yaa bi kikaafiik ponn ni kan, u taa ki koo waadiik ni, ke un ti yoor nibaa. 16Unii yaa bi kisaak kan, u taa ki gir kun linampal, ke un ti yoor waakekeln. 17N-yoonn ngbaan bipiib bi kpa ŋipuu na, ni bipiib bi kpa mbim bi ŋaa libiil na, bi ga li kpa kinimbaak. 18Mee Uwumbɔr man, ke u taa cha tibɔr tee ŋa kaakab aayoonn. 19N-yoonn ngbaan binib ga ji falaa saakpen a. Buyoonn Uwumbɔr nan naan dulnyaa na, ki nan saa dandana wee, baa kee ji falaa ngbaan aaboln, ki mu aan ki ji falaa kena. 20Nidindaan Uwumbɔr yaa kaa bar falaa ngbaan aayoonn aawiin kan, ubaa aan ŋmar. Le waanileekaan aanimbaasaln pu na, u ga bar falaa ngbaan aayoonn aawiin. 21"N-yoonn ngbaan unii ubaa yaa bui nimi ke, 'Lik, Kristo ngbaan sɔ,' ki yaa ki bui ke 'U bi nima chee', ni taa gaa waah len pu na man. 22Ba pu? biŋmaŋmannim ga li bi. Bibaa ga bui ke bi ye Kristo la. Biken ga bui ke bi ye Uwumbɔr aabɔnabtiib la. Bi ga tun lijinjiir aatun ki ŋmann binib; bi ga pɔɔn bibaa ke bin ti ŋmann Uwumbɔr aanileekaan mu. 23Ni li nyi man. M puen tuk nimi tibɔr timina mɔmɔk." 24"N-yoonn ngbaan aafalaa aapuwɔb, le paacham aawan aan ki li bi mbamɔm. Nwiin le ga bɔln. Uŋmal mu aan ki li wiin. Iŋmabi mu ga lir. 26N-yoonn ngbaan le ni ga kan min Unibɔn Aabo bi ntaalangbam ni ki choo, ki wiin chain, ki joo mpɔɔn. 27N-yoonn ngbaan le m ga tun ni Uwumbɔr aatuuntiib bin buen dulnyaa wee ponn ni mɔmɔk, liwipuul ni liwilir ni ŋŋaaŋgan ni ŋŋaaŋgii wɔb, bin ti kuuni maanileekaan mɔmɔk, ki di dan m chee." 28"Bikpasɔm le ye liyaataŋakl ki tii nimi. Bu aabon yaa bi ŋani tifar kan, ni bee ke ni kpee siib na kan, kiseek ga seer. 29Kena na, ni yaa kan nimina bi ŋani kan, ni bee ke ni kpee siib na kan, m ga gir ni. 30M tuk nimi mbamɔn la, dandana aanib aan jer le tiwan nimina mɔmɔk puen ŋa. 31Paacham ni taab ga jer. Maaliin ma aan jer." 32"Ubaa aa nyi buyoonn m ga gir ni na. Uwumbɔr aatuuntiib bi bi paacham na, aa nyi. Min Uwumbɔr Aajapɔɔn mu aa nyi. Nte Uwumbɔr baanja le nyi. 33Ni li nyi man, ki li ka lik man, aan ki li mee Uwumbɔr; ba pu? naa nyi buyoonn m ga gir ni na. 34Ni naahn uja u nan ban un chuun nsan, ki tuk waatutuliib ke bi li joo waadichal mbamɔm, ki mɔk bi mɔmɔk baah ga tun lituln li na, le ki tuk ukikiir na ke u li kii, le ki nin buen. 35Ni mu li nyi man. Naa nyi bundaln min Nidindaan ga gir ni na, nibaakan kijoobɔŋ, nibaakan kinyeetaasiik, nibaakan ikooja aah wii buyoonn na, nibaakan lichakpitaawoln. 36Ni li nyi man, aan m yaa lur nimi ki fuu ni kan, maan nan mui ni dɔ geen. 37Maah tuk nimi pu na, m tuk binib mɔmɔk la, li nyi man."

will be added

X\