MAK 11

1Le bi peen Jerusalem, le ki fuu Betfej ni Betani aatim, mu bi lijool libaa chee na, bi yi li ke Olif aasui aajool. 2Baah ti fuu nima chee na, le u bui waadidiliib ponn ni bilee, "Li cha man naah si gbak kitiŋ ki na. Ni yaa koo ki ponn ni kan, libuul ngbaan ni, ni ga kan ubombo si gbin. Ubaa aa kee diŋ u pu. Chuu gbiln u, ki li joo ni u m chee man. 3Unii ubaa yaa baa nimi, 'Ba ŋa ni chuu gbiln u?' ni bui u, 'Tidindaan le ban u. U ga giin ni u dandana wee."' 4Le bi buen ti kan ubombo ngbaan gbin lipaal mbisamɔb chee ki mal nsan. Le bi chuu gbiln u. 5Le binib bi si nima chee na bibaa baa bi, "Ba ŋa ni chuu gbiln ubombo ngbaan?" 6Le bi tuk bi Yesu aah tuk bi baah ga bui bi pu na. Le binib ngbaan cha bi buen. 7Le bi joo ni ubombo ngbaan Yesu chee, le ki di baakeken ki di biin u pu. Le Yesu diŋ u pu. 8Le binib pam di baakeken ki di ter nsan ponn ni. Le bibaa mu koo timoor ni, ki bar tisufar ki di ter nsan ponn ni. 9Le binib bi luln nsan na, ni bin paan puwɔb na nan tar, "Hosana, Uwumbɔr aanyoor bi un choo Tidindaan Uwumbɔr aayimbil ni na pu. 10Uwumbɔr aanyoor bi tiyaja David aanaan mu choo na pu. Pak Uwumbɔr paacham man." 11Le Yesu fuu Jerusalem, le ki koo Uwumbɔr aadichal ni, ki lik tiwan mɔmɔk. Le nwiin ban mu lir. Nima pu na le u nyan, le u ni waadidiliib buen Betani aatiŋ ni. 12Le ki woln kitaak, le bi nyan Betani aatiŋ ni. Baah cha na, le nkon joo u. 13Le u kan likaakaln li kpa tifar na si dandar. Le u buen un ti lik ke ŋisubil bi aan ŋaa bi. Waah fuu ni bu taab na, waa kan nibaa see tifar ŋmeen. Naa kee ŋeer ŋikaakan lu. 14Le u bui busub ngbaan, "Ubaa aan ki kan lisubil libaa aa pu ki ŋmɔ n-yoonn mu kaa kpa ndoon na." Le waadidiliib ŋun waah len pu na. 15Le bi fuu Jerusalem. Le u koo Uwumbɔr aadichal ni, le ki jenn nyan binib bi kooh tiwan ki daa tiwan na li ponn ni, ki labr bilikpelm aateebl mam ki di chiŋ, ki labr binib bi kooh ŋinanjil na mu aajal ki di chiŋ. 16Waa cha unii ubaa tun tiwan ki dii jer Uwumbɔr aadichal ponn ni. 17Le u bui bi, "Ni ŋmee Uwumbɔr aagbaŋ ni ke Uwumbɔr len ke waadichal ga li ye mmeen aadichal ki tii ŋinibol mɔmɔk; nimi le ŋa li bififiirb aakakaa chee." 18Le Uwumbɔr aatotoorninkpiib, ni Uwumbɔr aakaal aamɔmɔkb ŋun Yesu aah ŋa pu na. Nima le bi kpokl baah ga ŋa pu ki ku u na; ba pu? bi san u ijawaan. Waah tuk kinipaak ngbaan Uwumbɔr aaliin na, ni gar bi mɔmɔk pam. 19Nwiin aah ban mu lir na, le Yesu ni waadidiliib ki nyan kitiŋ ngbaan ni. 20Le ki woln kitaak kichakpinaanyeek ni, le bi chuun nsan ni ki jer likaakaln ngbaan aah bi nin chee na, le ki mui busub ngbaan kuur ki nan saa taab. 21Le Piita teer Yesu aah fon ŋa pu na, le ki bui u, "Tiicha, lik, saah fon puun lii busub bu pu na, bu kuur a." 22Le Yesu bui bi, "Gaa Uwumbɔr ki kii man. 23M tuk nimi mbamɔn la, unii umɔk ga bui lijool limina ke li fii ki lir nnyusaakpem ni na, u yaa pak ke ni ga ŋa waah len pu na, ki yaa kaa joo beeni usui ni kan, ni ga ŋa kena ki tii u. 24M tuk nimi la, naah ga mee Uwumbɔr tiwan nimɔk na, tii u naadii man ke ni kan, le ni ga sil kan. 25Ni yaa bi mee Uwumbɔr kan, di cha pinn binib bimɔk tun nimi taani na. Ni yaa di cha pinn bi kan, Nite Uwumbɔr u bi paacham na, mu ga di cha nimi aatunwambir pinn nimi. [ 26Ni yaa kaa di cha pinn biken kan, Nite Uwumbɔr u bi paacham na, mu aan di cha nimi aatunwambir pinn nimi.]" 27Le bi ki fuu Jerusalem. Waah chuun Uwumbɔr aadichal ni na, le Uwumbɔr aatotoorninkpiib, ni Uwumbɔr aakaal aamɔmɔkb, ni Juu yaab aaninkpiib, dan u chee, 28le ki nan baa u, "Aa kpa nsan ke aa ŋa saah ŋani pu na aa? Ŋmaa tii si nsan ngbaan ke aa ŋa kena?" 29Le u bui bi, "M mu ga baa nimi mbaan. Ni yaa ŋma gar kan, m mu ga tuk nimi maah kpa nsan pu ki ŋa maah ŋani pu na. 30Jɔnn aah nan muin binib nnyun ni na, ŋmaa tii u nsan? Uwumbɔr aan binib? Tuk mi man." 31Le bi kpokl tɔb, "Ti yaa bui ke Uwumbɔr le tii u nsan kan, u ga baa timi, ba ŋa taa gaa u ki kii? 32Ti yaa ki len ke binib le tii u nsan kan, ti san kinipaak ngbaan ijawaan baah ga ŋa timi pu na; bi mɔmɔk len ke Jɔnn nan ye Uwumbɔr aabɔnabamɔnn la." 33Nima le bi bui Yesu, "Taa nyi." Le Yesu bui bi, "M mu aan tuk nimi maah kpa nsan pu ki ŋani maah ŋani pu na."

will be added

X\