MAK 10

1Le Yesu siir nima, le ki buen Judea, le ki puur Jɔɔdan aamɔɔdaapuul. Le kinipaak ki kuuni u chee. Le u tuk bi Uwumbɔr aaliin, waah ŋani pu n-yoonn mɔmɔk na. 2Le Farisii yaab bibaa dan u chee, le ki ban bi tɔŋ u, le ki baa u, "Uja yaa jenn upuu lii kan, timi aakaal kii kena aa?" 3Le u baa bi, "Moses nan len kinye?" 4Le bi bui ke, "Moses nan len ke uja yaa ban un jenn upuu kan, u ga ŋma ŋmee kigbaŋ pu ke u jenn u a, ki di tii u, le ki nin jenn u." 5Le Yesu bui bi, "Nitafal aah pɔɔ pu na, nima le Moses nan ŋmee nkaal mue ki di tii nimi. 6Uwumbɔr le aa len kena. Buyoonn u nan naan dulnyaa wee na, u nan naan uja ni upii. 7Nima pu na, uja yaa yoor upii kan, bi ga nyan bite ni bina chee, u ni upuu ti kpaan tɔb chee, 8ki ŋa unibaan. Nima pu na, baa ki ye binib bilee, bi ye unibaan la. 9Uwumbɔr aah kpaan bi na, unibɔn taa yakr bi." 10Le Yesu ni waadidiliib koo lidichal ni. Baah bi kidiik ni na, le waadidiliib ki baa u tibɔr ngbaan. 11Le u bui bi, "Uja umɔk jenn upuu lii, ki ki yoor upii uken na, uja ngbaan ye udaagoor la. 12Upii mu yaa yii uchal, ki ki mɔn uja uken kan, upii ngbaan ye udaagoor la." 13N-yoonn ngbaan, le binib bibaa nan joo ni mbim, ki di dan Yesu chee, ki ban ke un di uŋaal ki di paan bi pu. Le waadidiliib kae bi. 14Waah kan ke bi kae bi na, le u gee liŋuul, le ki bui waadidiliib, "Cha mbim ngbaan dan m chee man. Taa ki jenn bi man. Binib biyaabimbin bi ke mbim aah bi pu na, bima le yeh Uwumbɔr aanaan. 15M tuk nimi mbamɔn la, unii umɔk kaa gaa Uwumbɔr aanaan ke ubo aah gaar tiwan pu na, waan koo mu ni." 16Le u yoor mbim ngbaan, ki di puin utaa pu, le ki di uŋaal paan bi pu, ki ŋa Uwumbɔr aanyoor ŋa bi pu. 17Le Yesu aah nyan nima chee na, le uja ubaa san choo u chee, le ki nan gbaan unimbiin ni, le ki baa u, "Tiicha nyaan, m ga ŋa kinye ki kan limɔfal li kaa kpa ndoon na?" 18Le Yesu baa u, "Ba pu aa yi mi ke tiicha nyaan? Ubaa aa ŋan, see Uwumbɔr baanja. 19Aa nyi Uwumbɔr aakaal la: 'Taa ku binib; taa gɔr kidaagook; taa su kinaayuk; taa li ye nnyaamɔn aasiiraadaan; taa ji binib durm; li pak aate ni aana."' 20Le uja ngbaan bui u, "Tiicha, m joo ikaal imina mɔmɔk tibir ni la." 21Le Yesu lik u, ki gee u, le ki bui u, "Tiwan nibaa le gur. Buen ti kooh saah kpa tiwan nimɔk na, ki di ŋimombil ngbaan ki di tii bigiim, aan ki li kpa liwangol paacham, aan ki dan nan dii mi." 22Yesu aah len kena na, le uja ngbaan aanimbil wɔb ŋa gbilngbiln. Ni ŋa u mpombiin; ba pu? u kpa liwankpal saakpen a. Le u siir nima. 23Le Yesu fenn lik waadidiliib, le ki bui bi, "Ni pɔɔ saakpen binib bi kpa liwankpal na koo Uwumbɔr aanaan ni." 24Waah len kena na, le ni gar waadidiliib pam. Le u ki bui bi, "Maabim, ni pɔɔ saakpen binib bi tii liwankpal naadii na koo Uwumbɔr aanaan ni. 25Uwankpadaan aah ga koo Uwumbɔr aanaan ni pu na, ni pɔɔ ki jer laakumii aah ga koo seerkaa aameer ni pu na." 26Le ni gar bi ki ti nyaŋ. Le bi baa tɔb, "Ni yaa ye kena kan, ŋmaa ga tee ŋmar?" 27Le Yesu lik bi, le ki bui bi, "Ni pɔɔ binib le chee. Naa pɔɔ Uwumbɔr chee; nibaa aa pɔɔ Uwumbɔr chee." 28Le Piita bui u, "Tima kan, ti nan di tiwan mɔmɔk di lii, ki dii si la." 29Le Yesu bui bi, "M tuk nimi mbamɔn la, unii umɔk di cha waadichal, bee ukpitiib, bee unaatiib, bee uninkpatiib, bee una, bee ute, bee waabim, bee waasaak, m pu ni tibɔnyaan tee pu na, 30u ga kan tidir, ni kpetiib, ni naatiib, ni ninkpateeb, ni natiib, ni mbim, ni tisar, ni mɔmɔk mfim nkub dandana aayoonn. Binib mu ga ŋa u falaa. N-yoonn mu choo na, u ga kan limɔfal li kaa kpa ndoon na. 31Binib pam mu, bi ye bisanlulm na, le ga nan ŋa puwɔb yaab. Binib pam mu, bi ye puwɔb yaab na, le ga nan ŋa bisanlulm." 32Le Yesu ni waadidiliib dii nsan ki cha Jerusalem. Le Yesu luln nsan. Le ni gar waadidiliib. Binib bi dii bi na mu san ijawaan. Le u di waadidiliib kipiik ni bilee na, ki di nyan ngbaan, le ki tuk bi binib aah ga ŋa u pu na. 33U bui bi, "Li pel man, ti yaa fuu Jerusalem kan, bi ga di min Unibɔn Aabo ki di ŋa Uwumbɔr aatotoorninkpiib ni Uwumbɔr aakaal aamɔmɔkb aaŋaal ni, le bi ji mi tibɔr, le ki ga len ke ni ŋeer bin ku mi, le ki ga di mi ki di ŋa bin kaa ye Juu yaab na aaŋaal ni. 34Le bi ga yook mi, ki teei timɔɔtan ki ŋani m pu, ki lue mi ŋinaalab, le ki nin ku mi. Iwiin itaa daal le m ga fikr nkun ni." 35N-yoonn ngbaan le Sebedee aajapɔɔtiib Jems ni Jɔnn nan dan Yesu chee, le ki bui u, "Tiicha, ti ban ke aa ŋa taah ga mee si pu na le ki tii timi." 36Le u baa bi, "Ni ban ke m ŋa ba le ki tii nimi?" 37Le bi bui u, "Aa yaa ji saanaan ki kan mpɔɔn kan, cha ti ponn ni ubaa li kal aaŋaaŋgii wɔb, uken mu li kal aaŋaaŋgan wɔb." 38Le u bui bi, "Naa nyi naah mee mi pu na aatataa. Ni ga ŋma ji falaa ke maah ga ji falaa pu na aa?" 39Le bi bui u, "Ti ga ŋman." Le u bui bi, "Ni ga sil ji falaa, ke maah ga ji pu na. 40Binib bi ga kal ŋŋaaŋgii ni ŋŋaaŋgan wɔb na ma kan, Uwumbɔr le lee bi; naa ye min le ga lee bi." 41Le waadidiliib kipiik bi gur na ŋun Jems ni Jɔnn aah tuk u pu na. Baah ŋun kena na, le bi gee liŋuul bi pu. 42Le u yin bi mɔmɔk, bin dan u chee, le ki bui bi, "Ni nyi ke dulnyaa ni aanib aayidam yoor bibaa paacham la. Bin kpa tininkpil na mu joo baanib mpɔɔn pu la. 43Nimi, ni taa li bi kena man. Ni ponn ni ubaa yaa ban ke u li ye uninyuun kan, un ŋa ubaa ni mɔmɔk aatutuln. 44Ubaa yaa ban ke u li ye usanluln kan, un ŋa ubaa ni mɔmɔk aanaagbiija. 45Min Unibɔn Aabo, maa dan dulnyaa wee ni ke bi nan tun lituln tii mi. M dan ke m nan tun lituln ki tii binib, ki kpo ke m gaa binib pam ki lii." 46Le Yesu ni waadidiliib fuu Jeriko aatiŋ ni, le ki jer. Le kinipaak saakpeŋ dii bi. Baah cha na, le ujoon u ye uwanmeer na, ka nsan aamɔgbiln, bi yi u ke Batimeus, u ye Timeus aajapɔɔn. 47Le u ŋun ke Yesu u ye Nasaret aatiŋ aanii na, ban un jer. Le u tar, "Yesu, u ye Ubɔr David aayabil na, sam mi kinimbaak." 48Le kinipaak kae u, ke un ŋmin. Le u moo tar, "Ubɔr David aayabil, sam mi kinimbaak." 49Le Yesu sil nsan ni, le ki bui bi, "Yi ni u." Le bi yin u ke un dan, le ki bui u, "Li kpa mpopiin, ki fii sil. U yi si la." 50Le u chuu nyan waakekeln, le ki fii mala, ki dan Yesu chee. 51Le Yesu baa u, "Aa ban ba?" Le u bui u, "Tiicha, m ban ke aa likr nnimbil le tii mi." 52Le Yesu bui u, "Saah gaa mi ki kii na le cha aa likr. Li dii saasan." Libuul ngbaan ni le u likr, le ki dii Yesu nsan ni.

will be added

X\