LUK 6

1Juu yaab aakpakool libaa daal, le Yesu ni waadidiliib bɔɔ dii kisaak ponn ni. Le waadidiliib chur geei tijikaar ki per ki ŋmɔ. 2Le Farisii yaab bibaa nan baa bi, "Ba ŋa ni ŋani kena? Timi aakaal aa kii ke ni ŋa kena likpakool daal." 3Le Yesu baa bi, "Naa karn Ubɔr David aah nan ŋa pu na aa? Nkon nan joo u ni waanib. 4Le u koo Uwumbɔr aadichal ni, ki di Uwumbɔr aaboroboro, ki di ŋman, ki di tii waanib mu, bin ŋman. Baah ŋa kena na, le bi bii Moses aakaal mu len ke Uwumbɔr aatotoortiib baanja le ga ŋmɔ boroboro ngbaan. 5"Tɔ, min Unibɔn Aabo le ye likpakool daal mu Aadindaan." 6Juu yaab aakpakool liken daal, le Yesu ki koo mmeen aadiik ni, le ki tuk binib Uwumbɔr aaliin. Le uja uyaaŋaaŋgii faan na bi nima. 7Le Uwumbɔr aakaal aamɔmɔkb ni Farisii yaab lik Yesu, ke u ga teb u likpakool daal aan waan teb u. Bi ban bi kan nsan aan ki galn u, ke u bii likpakool daal. 8Le Yesu bee baalandak. Le u bui uja uyaaŋaal faan na, "Dan nan sil du binib aanimbiin ni." Le u fii ti sil nima. 9Le Yesu baa bi, "Likpakool daal kan, ti ŋa ni ŋan na aan ni kaa ŋan na? Ti tii unii limɔfal aan ti ku u? Timi aakaal mɔk timi kinye?" 10Le u lik bi mɔmɔk, le ki bui uja uyaaŋaal faan na, "Taln aaŋaal." Le u taln uŋaal. Le mu pɔɔk. 11Le bi gee liŋuul pam Yesu pu, le ki kpokl baah ga ŋa u pu na. 12N-yoonn ngbaan le Yesu jon lijool paab, un ti mee Uwumbɔr, le ki mee u kinyeek ngbaan mɔk. 13Le ni woln kichakpinaanyeek ni, le u yin waadidiliib bin dan u chee, le ki nyan bi ponn ni bijab kipiik ni bilee, le ki yin bi ke waakpambalb. 14Baayimbil sɔ; Simon u Yesu duln u ke Piita na, ni unaal Andru; ni Jems, ni Jɔnn, ni Filip, ni Batolomiu, 15ni Matiu, ni Tomas, ni Jems u ye Alfeus aajapɔɔn na; ni Simon u nan ban un kuln waatiŋ aadim na; 16ni Judas u ye Jems aajapɔɔn na; ni Judas Iskariot u ga nan kooh Yesu na. 17Le Yesu sunn ni lijool ngbaan paab, le ki sil nin chee ŋak na. Waakpambalb ngbaan mu dii ni. Binib bi dii u na mu bi u chee ki wiir. Kinipaak bi nyan ni Judea aatingbaan mɔmɔk ni, ni Jerusalem, ni nnyusaakpem aatim Taya ni Saidon aatingbaan ni na, mu bi nima. 18Bi dan ke bi nan ŋun waaliin, ki ban ke un teb bi ponn ni bi ye bibum na. Le u teei bi, ki teei binib bi tiyaayar joo bi na mu. 19Le kinipaak ngbaan mɔmɔk ban ke bin di biŋaal ki di meeh u; ba pu? mpɔɔn nyan u ni, ki teei bi mɔmɔk. 20Le Yesu lik waadidiliib le ki bui ke "Nimi bi ji m pu falaa na, Uwumbɔr aanyoor bi ni pu; nimi le yeh Uwumbɔr aanaan. 21"Nimi bi nkon joo nimi dandana na, Uwumbɔr aanyoor bi ni pu; ni ga nan ji ki bab. "Nimi bi wii dandana na, Uwumbɔr aanyoor bi ni pu; ni ga nan laa. 22"Binib yaa nan nimi, ki yakr ni chee, ki sii nimi, ki yi nimi mbiindam, min Unibɔn Aabo pu kan, Uwumbɔr aanyoor bi ni pu. 23Bi yaa ŋa nimi kena kan, ni li kpa mpopiin saakpen ki li mɔɔni; ba pu? ni ga kan tinyoor saakpen paacham. Kena le biyajatiib nan ŋa Uwumbɔr aabɔnabtiib falaa. 24"Nimi biwankpadam, tibɔbil ga li bi ni pu; ba pu? ni puen kan ni mɔ na la. 25"Nimi bi ji bab dandana na, tibɔbil ga li bi ni pu. Nkon ga nan chuu nimi. "Nimi bi laa dandana na, tibɔbil ga li bi ni pu. Ni ga nan li kpa mpombiin ki li wii. 26"Binib mɔmɔk yaa pak nimi kan, tibɔbil ga li bi ni pu. Kena le biyajatiib nan pak biŋmaŋmannim bi ŋmann ke bi ye Uwumbɔr aabɔnabtiib na." 27"M tuk nimi bi pel na, ni li gee nimi aadim man, ki ŋa binib bi nan nimi na tiŋann, 28ki ŋa Uwumbɔr aanyoor ki ŋa binib bi seei nimi na pu, ki mee Uwumbɔr ki tii binib bi ŋa nimi bakaa na. 29Unii yaa faa si kitaapak kibaa kan, cha u faa kiken mu. Unii yaa gaa saakekeln aa chee kan, di saabɔkul mu ki kpee u. 30Unii umɔk mee si tiwan ni na, tiin u. Unii yaa yoor saawan kan, taa bui u ke un giini ni. 31Naah ban ke binib li ŋa nimi pu na, ni mu li ŋani bi kena. 32"Ni yaa gee binib bi gee nimi na baanja kan, ni kpa tinyoor Uwumbɔr chee ee? Titunwambirdam mu gee binib bi gee bi na la. 33Ni yaa ter binib bi ter nimi na baanja kan, ni kpa tinyoor Uwumbɔr chee ee? Titunwambirdam mu ŋani kena la. 34Ni yaa pinn binib bi ga giin tii nimi na baanja kan, ni kpa tinyoor Uwumbɔr chee ee? Titunwambirdam mu pinni titunwambirdam, ke bin ki giin ki tii bi baah pinn bi pu na. 35Nimi, ni li gee nimi aadim, ki ŋa bi tiŋann, ki pinn binib tiwan, ki taa ki li ban ni. Le Uwumbɔr ga tii nimi tinyoor saakpen. Ni ga li ye Uwumbɔr u kaa kpa ŋeen aatɔ na aabim. Uma le ŋani titunwambirdam ni binib bi kaa dooni u na tibulchin. 36Ni li kpa linimbaasaln ke Nite Uwumbɔr aah kpa pu na." 37"Ni taa galni binib, le Uwumbɔr mu aan galn nimi. Ni taa bii binib, le Uwumbɔr mu aan bii nimi. Ni di cha pinn binib man, le Uwumbɔr mu ga di cha pinn nimi. 38Tiin binib man, le Uwumbɔr mu ga tii nimi. U ga tii nimi saakpen. Ni naahn ke u ga di lisambil, ki di gbiin, ki yek yek, aan ki moo kpee, aan ki nyii ki ki kpee, li gbii ki kpir, aan ki di tii nimi. Naah tii binib pu na, Uwumbɔr mu ga giin kena, le ki tii nimi." 39Le Yesu ŋak bi liyaataŋakl ke, "Ujoon ga ŋma mɔk ujoon nsan aa? Bi mɔmɔk bilee aan lir libuul ponn ni ii? 40Un bae mbaen na aa jer waatiicha. Unii umɔk bae mbaen ki chikr na ga li bi ke waatiicha aah bi pu na. 41"Ba ŋa aa lik ki waa lidɔchɔl li bi aana aabo aanimbil ni na, kaa tee waa jaatɔlk u bi aayaan ni na? 42Aa yaa kaa waa jaatɔlk u bi aa mamaŋ aanimbil ni na kan, aa ga tee ŋa kinye ki bui aana aabo ke 'Nna aabo, cha m nyan lidɔchɔl li bi aanimbil ni na?' Sin uŋmaŋmann, chuu nyan jaatɔlk u bi aanimbil ni na waahr, aan ki li waa mbamɔm, aan ki nan nyan aana aabo yaan ni lidɔchɔl." 43"Busub bu ŋan na aan lu ŋisubil ŋi kaa ŋan na. Busub bu kaa ŋan na mu aan lu ŋisubil ŋi ŋan na. 44Busub aasubil pu, le aa ga bee bu aah ye busub bu na. Binib aa ker saasaa bikokom ni, kaa ker nkaakan ichakpeejaagar ni. 45Ilandak nyaan bi uninyaan aasui ni, le ki cha u len ni ŋan na. Ilandakbir bi mbiindaan aasui ni, le ki cha u len ni bir na. Ba pu? ilandak i gbii unii aasui ni na, ima le u ga len." 46"Ba pu ni yi mi ke 'Dindaan, Dindaan,' kaa ŋani maah tuk nimi ke ni ŋa pu na? 47Unii umɔk dan m chee, ki ŋun maaliin, ki ŋani kena na, m ga mɔk nimi waah naahn udaan u na. 48U naahn uja u ban un maa kidiik, ki gbii ni nyoo, le ki maa lidinyikl ŋitakpal pu na. Le ŋwɔm nyan, ki puu ki yur kidiik ngbaan, le kaa deŋ ni; ba pu? u maa ki mbamɔm. 49Unii u ŋun maaliin, kaa ŋani kena na, u naahn uja u maa kidiik kitiŋ pu, kaa puen gbii mbuu ki maa lidinyikl na. Le ŋwɔm nyan ki puu yur ki. Libuul ngbaan ni le ki lir kookoo."

will be added

X\