LUK 5

1Le Yesu nan sil Genesaret aamɔɔl aagbaan. Le kinipaak gob u, le ki mueni u, bin ŋun Uwumbɔr aaliin. 2Le u kan iŋɔi ilee limɔɔl aagbaan. Bijambaam na aa bi i ponn ni. Bi bi nibaa chee, ki bi finni baapɔr. 3Le Yesu koo buŋɔb bubaa ponn ni, bu ye Simon yaab na, le ki bui u ke un foor nnyun ponn ni siib. Baah foor siib na, le u kal nima chee buŋɔb ponn ni, le ki tuk kinipaak ngbaan Uwumbɔr aaliin. 4Waah tuk bi ti doo na, le u bui Simon, "Buen nnyun aah nyoo nin chee na, ni ti mee tipɔr ngbaan ki chuu ijan." 5Le Simon bui u, "Ndindaan, ti ban ijan kinyeek na mɔk linimaln, kaa kan nibaa. Tɔ, saah len pu na, m ga mee tipɔr na nnyun ni." 6Le bi mee tipɔr, ki chuu ijan i wiir na. Le tipɔr ban ti kar. 7Le bi kab biŋaal ki yin biŋeen aatɔtiib bi bi buŋɔb buken ponn ni na, bin dan nan ter bi. Le bi dan, ki nan nyan ijan ki gbiin iŋɔi ilee ngbaan mɔk. Nima le cha iŋɔi ngbaan ban i muin. 8Simon Piita aah kan kena na, le u gbaan Yesu aanimbiin ni, le ki bui u, "Ndindaan, nyan m chee. M ye titunwambirdaan la." 9Baah chuu ijan saakpen pu na, le ni gar Simon ni binib bimɔk bi u chee na, 10ni Sebedee aajapɔɔtiib Jems ni Jɔnn bi ye Simon aatutuŋeertiib na. Le Yesu bui Simon, "Taa san ijawaan. Dandana ki joo cha, aa ga li ban binib tii Uwumbɔr." 11Le bi dar baaŋɔi cha ngbaan, le ki di ni mɔmɔk ki di lii, le ki dii Yesu. 12Le Yesu nan bi kitiŋ kibaa ni. Le ukɔndaan ubaa mu bi nima. Waah kan Yesu na, le u dan nan gbaan unimbiin ni, ki di unimbil chiŋ kitiŋ, le ki gaŋ u, le ki bui u, "Ndindaan, aa yaa gee kan, aa ga ŋma teb mi." 13Le Yesu taln uŋaal ki meeh u, le ki bui u, "M gee. Aa pɔɔk." Libuul ngbaan ni, le u pɔɔk. 14Le Yesu bui u, "Taa tuk unii ubaa. Li cha Uwumbɔr aatotoor chee, ki di aabaa ki di mɔk u, ki toor kitork ki tii Uwumbɔr ke Moses aakaal aah mɔk pu na. Nima le ga mɔk binib ke aa pɔɔk a." 15Le Yesu aayimbil moo moon ni kookoo. Le kinipaak saakpeŋ kuun u chee, bin ti ŋun waaliin, ki ban ke un teei bi ponn ni bi ye bibum na. 16N-yoonn, n-yoonn kan, le u nyan bi chee, ki cha kipɔɔk ni, un ti mee Uwumbɔr. 17N-yoonn ngbaan le Yesu nan bi tuk binib Uwumbɔr aaliin. Le Farisii yaab ni bimɔmɔkninkpiib bi nyan ni Galilee aatingbaan ni, ni Judea aatingbaan ni, ni Jerusalem na, nan ka u chee. Le Tidindaan Uwumbɔr aapɔɔn bi u chee, le u teei bibum. 18Le bijab bibaa lulni uja uyaawon faan na likekeln ni, ki ban bin di u koo ni kidiik ni, ki ti di bil Yesu aanimbiin ni. 19Binib aah wiir pu na, baa kan mpaan bin koo ni. Le bi jon kidiik aapaacham, le ki chee liboln, le ki di u di lulni, le ki di bil kidiik ponn ni Yesu aanimbiin ni. 20Le Yesu kan baah gaa u ki kii pu na, le ki bui uja uyaawon faan na, "Njɔ, m di cha saatunwambir ki pinn si." 21Waah len kena na le Uwumbɔr aakaal aamɔmɔkb ni Farisii yaab dak bisui ni, "U ye ŋmaa ki sii Uwumbɔr? Ubaa aan ŋma di cha pinn titunwambir see Uwumbɔr baanja." 22Le Yesu bee baah dak pu na, le ki baa bi, "Ba pu ni dak kena nisui ni? 23Maah len ke m di cha waatunwambir ki pinn u na le pɔɔ aan m yaa len ke 'Fiin ki li chuun' li pɔɔ? 24M ga mɔk nimi ke min Unibɔn Aabo kpa mpɔɔn dulnyaa wee ni ke m di cha pinn titunwambir." Waah len kena na, le u bui uyaawon faan na, "M bui si la, fiin ki yoor saawandɔkaan ki li cha kun." 25Libuul ngbaan ni le u fii binimbil ni, le ki yoor waawandɔkaan, ki cha kun, le ki chuun nyuŋni Uwumbɔr. 26Le ni gar bi mɔmɔk pam. Le bi nyuŋ Uwumbɔr, ki san ijawaan, le ki bui ke, "Din, le ti kan lijinjiir aawan." 27Nee aapuwɔb le Yesu nyan nima. Waah cha na le u kan ulampuugaar ubaa, le bi yi u ke Liifai. U ka baah gaar lampuu nin chee na. Le Yesu bui u, "Li dii mi." 28Le u di cha waawan mɔmɔk le ki fii, le ki dii u. 29Le Liifai ŋa tijikaar saakpen waadichal ni ki tii Yesu. Le bilampuugaab pam ni binib biken dan nan ka ji bi chee tijikaar. 30Le Farisii yaab ni Uwumbɔr aakaal aamɔmɔkb bi mu ye Farisii yaab na, bi ŋulni le ki baa Yesu aadidiliib, "Ba ŋa ni ji tijikaar ki nyu nnyun bilampuugaab ni titunwambirdam chee?" 31Le Yesu bui bi, "Binib bi kpa laafee na aa ban dɔkta, see bi bun na le ban dɔkta. 32Maa dan ke m nan yi bininyaan. M dan ke m nan yi titunwambirdam, bi nan kpeln baabimbin." 33Le binib bibaa dan ki nan tuk Yesu, "Jɔnn aadidiliib ni Farisii yaab aadidiliib lul bumɔb kpaala kpaala, ki mee Uwumbɔr. Saadidiliib ma ji ki nyu." 34Le u baa bi, "Ni ga ŋma cha bicham bi dan bi nan ji ubɔndinn aajim na lul bumɔb buyoonn upiidinn bi bi chee na aa? Aayii. 35N-yoonn choo la, le bi ga chuu nyan upiidinn na bi chee mpɔɔn. N-yoonn ngbaan le bi ga lul bumɔb." 36Le u ki ŋak bi liyaataŋakl ke, "Ubaa aan chuu gii lekr libɔkupɔln aakekegeln ki ti di leŋ libɔkukpokl. U yaa ŋa kena kan, u ga bii lipɔln na. Libɔkupɔln aageln ni libɔkukpokl ngbaan, naan ŋak. 37Ubaa mu aan di ndaawiin ki di ŋa kilookpok ponn ni. U yaa ŋa kena kan kilookpok ngbaan ga puu ki bii. Ndaan na mu ga kpir. 38See bi di ndaawiin ki di ŋa kiloopɔŋ ni. 39Unii mu yaa nyu ndaankpaan kan, waan ki ban ndaapɔɔn. U ga len ke mu kpok na le mɔ."

will be added

X\