LUK 4

1Le Yesu, u gbiin Uwumbɔr Aafuur nyaan na, nyan Jɔɔdan aamɔɔl chee. Le Uwumbɔr Aafuur nyaan cha u buen kipɔɔk ni. 2Le Kinimbɔŋ tɔŋ u nima, iwiin imonko ilee. Iwiin imonko ilee ngbaan Yesu aa jin nibaa. Le iwiin ngbaan aah jer na, nkon chuu u. 3Le Kinimbɔŋ bui u, "Aa yaa ye Uwumbɔr Aajapɔɔn kan, bui litakpal limina li kpaln tijikaar." 4Le Yesu bui u, "Ni ŋmee Uwumbɔr aagbaŋ ni ke 'Tijikaar baanja aan ŋma tii unii limɔfal."' 5Le Kinimbɔŋ di u buen lijool li fɔk na paab, le ki mɔk u dulnyaa aanaan mɔmɔk libuul ngbaan ni, 6le ki bui u, "M ga tii si mpɔɔn mumina mɔmɔk ni mu aanyaan. Bi nan di ni mɔmɔk ki tii mi. M mu ga di ni ki tii unii u m lee u na. 7Aa yaa gbaan nnimbiin ni ki pak mi kan, sin le ga li yeh ni mɔmɔk." 8Le Yesu bui u, "Ni ŋmee Uwumbɔr aagbaŋ ni ke, 'Unii li pak Udindaan Uwumbɔr ki dii uma baanja."' 9Le Kinimbɔŋ di u di buen Jerusalem, le ki di u tɔŋ Uwumbɔr aadichal paab, le ki bui u, "Aa yaa ye Uwumbɔr Aajapɔɔn kan, lir ni kitiŋ; 10ni ŋmee Uwumbɔr aagbaŋ ni ke 'U ga tuk waatuuntiib ke bi li lik si. 11Le bi ga li joo si biŋaal ni, aataal taa gbeer litakpal."' 12Le Yesu bui u, "Uwumbɔr len ke 'Unii taa tɔŋ Udindaan Uwumbɔr."' 13Kinimbɔŋ aah tɔŋ Yesu ntɔŋ mɔmɔk ki doo na, le u siir cha u n-yoonn siib. 14N-yoonn ngbaan le Yesu gir kun Galilee aatiŋ ni. Uwumbɔr Aafuur nyaan aapɔɔn mu bi u ni. Le waayimbil moon Galilee aatingbaan mɔmɔk ni. 15Le u koo mmeen aadir ni, ki tuk binib Uwumbɔr aabɔnyaan. Le binib mɔmɔk nyuŋ u. 16Le Yesu fuu Nasaret aatiŋ, baah nan kpiin u nin chee na. Juu yaab aakpakool daal, le u koo mmeen aadiik ni, waah ŋani pu n-yoonn mɔmɔk na. Le u fii sil un karn Uwumbɔr aagbaŋ ni. 17Le kidiik ni aatotoor di Uwumbɔr aabɔnabr Aisaya aagbaŋ ki di tii Yesu. Le u kpar kigbaŋ ngbaan, ki kan nin chee ŋmee ke 18"Tidindaan Uwumbɔr Aafuur nyaan bi m ni; u lee mi ke m tuk bigiim tibɔnyaan tee. U tun ni mi ke m sɔŋ binib bi kpa mpombiin na aasui, ki tuk binaagbiib ke m gaa bi lii la, ki tuk bijoom ke m likr bi, ki nyan bifalaadam baafalaa ni, 19ki tuk binib ke libiln lee Tidindaan Uwumbɔr ga gaa bi lii." 20Le Yesu ki kpab kigbaŋ ngbaan, ki ki giin ki di tii mmeen aadiik ni aatotoor ngbaan, le ki kal. Le binib bimɔk bi mmeen aadiik ni na aanimbil kal u pu. 21Le u bui bi, "Buyoonn ni pel Uwumbɔr aagbaŋ aaliin imina dandana na, i gbiin la." 22Le bi mɔmɔk pak u. Waah len iliin nyaan pu na, le ni gar bi pam. Le bi baa tɔb, "Waa ye Josef aajapɔɔn la aa?" 23Le u bui bi, "M bee ke ni ga bui mi liyaataŋakl limina, 'Dɔkta, tem aabaa.' Ni ga ki bui mi, 'Ti ŋun saah tun lijinjiir aatun Kapenaum aatiŋ ni pu na. Tun kena du chee na, saatiŋ ponn ni.' 24M tuk nimi mbamɔn la, binib aan nyuŋ Uwumbɔr aabɔnabr ubaa udo aatiŋ ni. 25Li pel man, Elaija aayoonn, utaal aa nan nun ŋibin ŋitaa ni iŋmal iluub. Le nkon saakpem lir kitiŋ ngbaan ni. N-yoonn ngbaan Israel yaab ponn ni bikpopiib nan bi ki wiir. 26Uwumbɔr mu aa tun Elaija un ti ter bi ponn ni ubaa. U tun u Sarefat aatiŋ, ki bi Saidon aatiŋ ni na, un ti ter ukpopii u bi nima na. 27Uwumbɔr aabɔnabr Elaisha aayoonn, bikɔndam nan bi Israel yaab ponn ni ki wiir; le Uwumbɔr aa teb bi ponn ni ubaa. Neemann, u nan ye Siria aatiŋ aanii na baanja le u teb." 28Yesu aah len kena na, le binib bimɔk bi mmeen aadiik ni na gee liŋuul saakpen a, 29le ki fii, ki chuu nyan u kitiŋ ngbaan ni, ki di u buen baatiŋ aah bi lijool li paab na, bin ti di u lii lijool aataab. 30Le u bɔɔ dii bikaasisik ni le ki buen. 31Le u fuu Kapenaum, kitiŋ ki bi Galilee aatiŋ ni na. Le Juu yaab aakpakool daal u koo mmeen aadiik ni, ki tuk binib Uwumbɔr aaliin. 32Waah tuk bi iliin i na, le ni gar bi pam. Ba pu? waaliin kpa mpɔɔn. 33Le uja u tiyaayar joo u na bi mmeen aadiik ngbaan ni, le ki teen mpɔɔn pu, 34"Sin Yesu u ye Nasaret aatiŋ aanii na, aa ban ba ti chee? Aa dan aa nan ŋa timi yooli la aa? M nyi si. Aa ye Uwumbɔr aanii u ye chain na la." 35Le Yesu kae tiyaayar ngbaan, le ki len, "Ŋmim. Di uja ngbaan lii." Le tiyaayar ngbaan di u lii kitiŋ, ki nyan cha u. Taah lii u kitiŋ na, naa ŋa u nibaa. 36Le ni gar bi mɔmɔk pam. Le bi baa tɔb, "Ba aaliin boln sɔ? U kpa yiko ni mpɔɔn le ki tuk tiyaayar ke ti di binib lii. Le ti kii waamɔb." 37Le Yesu aayimbil moon ni kookoo nima chee. 38Le Yesu nyan mmeen aadiik ni, le ki buen Simon aadichal ni. Le Simon aapuu aana aawon ton saakpen a. Le bi mee Yesu ke un ter u. 39Le Yesu dan nan sil jon u pu, le ki kae iween i joo u na. Le uwon sɔŋ. Libuul ngbaan ni le u fii, le ki chann bi tichann. 40Tɔ, nwiin aah bi lir na, le binib bimɔk kpa bibum bido na, bi joo ni bi Yesu chee. Le iween aaboŋ aaboŋ joo bi. Le u di uŋaal paan bi mɔmɔk pu, ki teb bi. 41Le tiyaayar mu di binib pam di lii, le ki teen, "Aa ye Uwumbɔr Aajapɔɔn la." Tiyaayar ngbaan bee ke u ye Uwumbɔr Aanileekoo Kristo. Nima pu na le u kae ti, kaa cha ti len tibaa. 42Le ni woln kichakpinaanyeek ni, le u nyan nima, ki buen nibaa chee, ki ti bi ubaa. Le kinipaak ngbaan bi ban u. Baah kan u na, le bi gaŋ u ke u taa buen cha bi. 43Le u bui bi, "See m buen ntim muken ponn ni, ki ti tuk bi mu Uwumbɔr aanaan aabɔnyaan. Nima le cha Uwumbɔr tun ni mi." 44Le u bɔɔ dii Juu yaab aatim ni, le ki koo mmeen aadir ni, ki tuk binib Uwumbɔr aaliin.

will be added

X\