LUK 24

1Juu yaab aakpakool daal aah jin ki woln kitaak na, le bipiib ngbaan di tubalee ni nkpan ngbaan bin ti toor Yesu aawon, ki di buen likaakul ngbaan chee kichakpinaanyeek ni. 2Baah ti fuu nima na, le bi kan ke litakpal li bi nan di leŋ kitakpaluŋ aamɔb na, aa ki bi. 3Le bi koo, le kaa kan Tidindaan Yesu aawon. 4Baa nyi baah ga dak pu na. Libuul ngbaan ni le bijab bilee biyaawanpeenkaan wiin chain na, si bi chee. 5Le ijawaan chuu bipiib ngbaan, le bi gbaan kitiŋ binimbiin ni. Le bijab ngbaan baa bi, "Ba pu ni ban unifuur bitekpiib ponn ni? 6Waa bi du. U fikr nkun ni a. Teer man waah nan tuk nimi pu buyoonn u laa bi Galilee ni na, 7ke Uwumbɔr siin ke bi ga di uma Unibɔn Aabo, ki di ŋa titunwambirdam aaŋaal ni, bin ti kpaa u ndɔpuinkoo pu, ke iwiin itaa daal u ga fikr nkun ni." 8Le bipiib ngbaan teer waaliin imina. 9Le bi nyan kitakpaluŋ ngbaan chee, le ki gir kun, le ki di tibɔr timina ki tuk waakpambalb kipiik ni ubaa, ni waadidiliib bi gur na mɔmɔk. 10Bipiib ngbaan aayimbil ye Mari Magdalene, ni Joana, ni Mari u ye Jems aana na. Bi ni bipiib bi dii bi na, di tibɔr timina, ki tuk waakpambalb. 11Le waakpambalb aa pak baah len pu na. Bi dak ke ni ye kijɔrk aaliin la. 12Le Piita fii ki san buen kitakpaluŋ chee, ki boon ki gbuun lik, le ki mui ŋikeken ngbaan baanja le dɔ. Ni gar u pam. Le u gir kun. 13Leyaadaal ngbaan le bi ponn ni bilee cha kitiŋ kibaa, bi yi ki ke Emaus. Kitiŋ ngbaan ni Jerusalem daa tɔb mal bilule la. 14Baah cha na, le bi gbaa tɔb chee tibɔr, le ki len tiwan nimɔk ŋa na. 15Baah gbaa tɔb chee tibɔr kena na, le Yesu ubaa pii bi nsan ni, le ki dii bi. 16Le Uwumbɔr doŋ binimbil ke bi taa bee u. 17Le u baa bi, "Naah chuun gbaa tɔb chee tibɔr ti na, ti ye bɔr bayaar, aan ninimbil wɔb bi gbilngbiln kena?" 18Le bi ponn ni ubaa, bi yi u ke Kleopas, baa u, "Bicham bi bi Jerusalem ponn ni na, si baanja le aa nyi tibɔr ti ŋa nima chee dandana na aa?" 19Le u baa bi, "Tilabɔr?" Le bi bui u, "Yesu u nan ye Nasaret aatiŋ aanii na aabɔr. U nan ye Uwumbɔr aabɔnabr la. U nan kpa mpɔɔn ki tun lijinjiir aatun; waaliin mu nan kpa mpɔɔn. U piir Uwumbɔr ni binib mɔmɔk aasui. 20Le Uwumbɔr aatotoorninkpiib ni timi Israel yaab aaninkpiib di u di ŋa binib aaŋaal ni, bin ti len ke u ŋeer nkun. Le bi kpaa u ndɔpuinkoo pu. 21Ti nan kpa limakl ke uma le ga gaa timi Israel yaab ki lii. Baah nan ŋa u kena na, din le ye iwiin itaa. 22Ti ponn ni bipiib bibaa mu tuk timi tibɔr ti gar timi saakpen na. Bi buen kitakpaluŋ ngbaan chee kichakpinaanyeek ni, 23kaa kan waawon, le ki gir ni ki nan tuk timi ke bi kan Uwumbɔr aatuuntiib bi tuk bi ke u fikr a. 24Le ti ponn ni bibaa buen kitakpaluŋ ngbaan chee, ki kan ni bi bipiib ngbaan aah len pu na. Uma le baa kan." 25Le Yesu bui bi, "Nimi aalan par la. Naa gaa Uwumbɔr aabɔnabtiib aah nan len pu na mɔmɔk mala. 26Uwumbɔr le nan siin ke Waanileekoo Kristo na ga ji falaa kena, le ki nin kan mpɔɔn." 27Le Yesu ŋeer tuk bi waabɔr ti ŋmee Uwumbɔr aagbaŋ mɔmɔk ni na. Njan u tuk bi Moses aah nan ŋmee ti pu na, le ki nin tuk bi Uwumbɔr aabɔnabtiib mɔmɔk aah nan ŋmee ti pu na. 28Le bi duun baah cha kitiŋ ki na ni. Le Yesu ŋa ke waah ga piln jer le na. 29Le bi gaŋ u, "Doon ti chee. Kijook joor a. Naan yunn le ni ga mue." Le u koo ni bi chee. 30Le bi kal bin ji tijikaar. Waah kal bi chee ke un ji tijikaar na, le u yoor boroboro na, le ki doon Uwumbɔr, le ki gii, le ki di tii bi. 31Le Uwumbɔr likr binimbil ke bin bee u. Libuul ngbaan ni le u lil ki nyan bi chee. 32Le bi bui tɔb, "Waah dii timi nsan ni ki len ti chee ki ŋeer tuk timi Uwumbɔr aagbaŋ aaliin aatataa na, tisui aa piin u pu saakpen aa?" 33Libuul ngbaan ni, le bi fii, ki gir buen Jerusalem, le ki kan Yesu aakpambalb kipiik ni ubaa, ni waadidiliib biken kuun tɔb chee. 34Le bi bui bi, "Tidindaan sil fikr nkun ni. Simon le kan u." 35Le waadidiliib bilee ngbaan mu tuk bi naah ŋa pu nsan ni na, ki tuk bi ke waah gii boroboro pu na, nima le cha bi bee u. 36Baah len tɔb chee tibɔr kena na, libuul ngbaan ni le Yesu ubaa sil bikaasisik ni, le ki bui bi, "Ni li kpa nsuudoon man." 37Le bipoobil yuk a; ijawaan chuu bi saakpen a. Bi dak ke bi kan utekpiir aawiin la. 38Le u baa bi, "Ba ŋa ni san ijawaan ki cha nipoobil yuk? 39Lik ŋŋaal ni ntaa, ke min mbaa ye. Taln niŋaal ki di meeh mi ki lik. Utekpiir aawiin aa kpa tinann ni ŋikpab ke naah kan maah kpa ni na." 40Waah len kena na, le u mɔk bi baah nan kpaa uŋaal ni utaa ponn ni ipiin pu na. 41Le bi kpa mpopiin saakpen, kaa kee gaa kii mbamɔm. Ni gar bi pam. Le u baa bi, "Tijikaar tibaa bi du uu?" 42Le bi tii u lijangeln li bi pul li mmii ni na. 43Le u gaa, le ki ŋman li binimbil ni. 44Le u bui bi, "Maabɔr timɔk ŋmee Moses aakaal ponn ni, ni Uwumbɔr aabɔnabtiib aagbaŋ ni, ni Uwumbɔr aalahn aagbaŋ ni na, Uwumbɔr le siin ke ni mɔmɔk ga gbiin. Maah nan laa bi ni chee na, m nan tuk nimi kena la." 45Le u woln binimbil bin bee Uwumbɔr aagbaŋ aaliin aatataa, 46le ki bui bi, "Ni ŋmee ke min Uwumbɔr Aanileekoo Kristo ga ji falaa, ki fikr nkun ni iwiin itaa daal. 47Ni li mooni binib ke bi yaa kpeln baabimbin kan, Uwumbɔr ga di cha baatunwambir pinn bi m pu. Ni piin ki li mooni Jerusalem aatiŋ aanib, le ki nin moon ŋinibol mɔmɔk. 48Ni ye maasiiraadam ke m kpo ki fikr nkun ni. 49Nte Uwumbɔr aah puu tipuul ti ke u ga tii nimi Waafuur nyaan na, m ga tun Mfuur nyaan ngbaan ni chee. Ni li bi Jerusalem ki ti saa bundaln ni ga kan mpɔɔn mu ga nyan paacham na." 50Le Yesu di bi ki di buen Betani aatiŋ chee. Baah ti fuu nima na, le u yoor uŋaal paacham, le ki ŋa Uwumbɔr aanyoor ki ŋa bi pu. 51Waah laa bi ŋani kena na, le u nyan bi chee, Uwumbɔr di u buen paacham. 52Le bi gbaan kitiŋ ki doon u, le ki nin gir buen Jerusalem, le ki kpa mpopiin saakpen, 53ki pak Uwumbɔr waadichal ponn ni n-yoonn mɔmɔk.

will be added

X\