LUK 22

1N-yoonn ngbaan, naan yunn le bi ga ji Lakr-jer aajim, ki ŋmɔ boroboro u kaa kpa nnyɔk na. 2Le Uwumbɔr aatotoorninkpiib ni Uwumbɔr aakaal aamɔmɔkb nan kpokl baah ga ŋa pu ki ku Yesu na. Bi mu san binib ijawaan la. 3Le Kinimbɔŋ koo Judas Iskariot aasui ni. U ye Yesu aadidiliib kipiik ni bilee ponn ni ubaa. 4Kinimbɔŋ aah koo Judas aasui ni na, le u buen Uwumbɔr aatotoorninkpiib ni Uwumbɔr aadichal aakikiirb aaninkpiib chee, un ti kpokl bi waah ga ŋa pu ki di Yesu di ŋa biŋaal ni na. 5Le bi kpa mpopiin, le ki puu tipuul ke bi ga tii u ŋimombil la. 6Le u kii, le ki ban nsan mu u ga di Yesu ki di ŋa biŋaal ni buyoonn kinipaak ngbaan aah kaa bi u chee na. 7Bundaln bi ŋmɔ boroboro u kaa kpa nnyɔk na ki kɔr upihbo na, 8le Yesu bui Piita ni Jɔnn, "Li cha ti gor njim ngbaan aajikaar aan ti ji." 9Le bi baa u, "Aa ban ke ti gor ti la chee?" 10Le u bui bi, "Ni yaa koo kitiŋ ngbaan ni kan, uja u tun nnyun na ga ton nimi nsan ponn ni. Ni li dii u man, ki koo waah ga koo lidichal li ponn ni na, 11ki bui udichaldaan na, 'Tiicha bui ke u ni waadidiliib ga ji njim ngbaan aajikaar kiladiik ni?' 12Le u ga mɔk nimi paacham aadisaakpeŋ ki bi puen toor ki na la. Ni li gor njim ngbaan aajikaar nima chee." 13Le bi buen, le ki kan Yesu aah tuk bi ke bi ga kan pu na. Le bi gor njim ngbaan aajikaar. 14Tijikaar aajim yoonn aah fuu ni na, le Yesu ni waadidiliib dan nan kal. 15Le u bui bi, "Nnimbil nan man ke m ni nimi kpaan ji njim mue waahr aan m nin ji maafalaa ngbaan. 16M tuk nimi la, maan ki ji njim mue ki ti saa buyoonn Uwumbɔr ga gaa waanib mɔmɔk lii ki doo, ki di bi koon waanaan ni na." 17Le Yesu yoor kiyinyook, le ki doon Uwumbɔr, le ki bui bi, "Gaa man ki yakr tɔb. 18M tuk nimi la, maan ki nyu ŋisubil aanyun ngbaan ki ti saa buyoonn Uwumbɔr aanaan ga fuu ni na." 19Le u yoor boroboro, le ki doon Uwumbɔr, le ki gii, ki di tii waadidiliib le ki bui bi, "Maawon le na. Nimi aatunwambir pu le bi ga ku tiwon tee. Ni li ŋani kena aan ki li teer maabɔr." 20Baah jin tijikaar ngbaan ti doo na, le u yoor kiyinyook le ki doon Uwumbɔr, le ki di tii bi, le ki bui bi, "Tiwanyukaan ngbaan ye maasin aamɔkl la. Maasin ga nyan nimi aatunwambir pu. Maasin pu, le Uwumbɔr puu tipuupɔln ki tii nimi. 21"Lik, un ga kooh mi na, m ni uma le aaŋaal kpaan ki bi teebl paab. 22Min Unibɔn Aabo ga sil kpo, Uwumbɔr aah nan len ke m ga kpo pu na. Tibɔbil mu ga li bi uja u ga kooh mi na pu." 23Le waadidiliib baa tɔb, "Ti ponn ni, ulau ga tee ŋa kena?" 24Tɔ, le Yesu aadidiliib kpak tɔb kinikpakpak ke ulau tee ye uninyuun bi ponn ni. 25Le u bui bi, "Dulnyaa wee aaniboln aabɔrb yoor bibaa paacham la. Bin kpa tininkpil na, baanib yi bi baateterm la. 26Nimi, ni taa li bi kena man. Un ye uninyuun ni ponn ni na kan, un ŋa ubaa ke uwaatiir na. Un ye usanluln na kan, un ŋa ubaa ke nimɔk aatutuln na. 27Un ŋa tijikaar na, ni un ji na, ŋmaa jer uken? Naa ye un ji na aa? Mma kan, m bi ke ututuln na ni ponn ni. 28"Tɔ, maah bi ntɔŋ ni na, nimi le sil nchaŋ ni. 29M ga tii nimi nnaan ke Nte Uwumbɔr aah tii mi nnaan pu na. 30Le ni ga ji tijikaar ki nyu nnyun m chee maanaan ni, ki kal ŋibɔrjal pu, ki ji Israel yaab aanibol kipiik ni ŋilee tibɔr." 31Le Yesu bui Simon Piita, "Simon, Simon, lik, Kinimbɔŋ kan nsan ke un tɔŋ nimi, ni lir. 32Le m mee Uwumbɔr tii si aa taa di cha maasan. Aa yaa ki gir ni ki dii mi kan, pɔɔn aanaabitiib aataakpab." 33Le Piita bui u, "Ndindaan, m ga ŋma kpaan aa chee kiyondiik ni. M ni si ga ŋma kpaan ki kpo." 34Le Yesu bui u, "Piita, m tuk si la, din, aa ga len mfim mutaa ke saa nyi mi, le ukooja nin wii." 35Tɔ, le Yesu baa bi, "Maah nan tun nimi na, ki nan bui nimi ke ni taa li joo ŋimombil aataakɔr, ki taa li joo litaakɔr mu, ki taa li joo ŋinaatak na, ni nan lann nibaa aa?" Le bi bui u, "Taa nan lann nibaa." 36Le u bui bi, "Dandana wee, naa ki bi ke naah nan bi pu na. Un kpa ŋimombil aataakɔr na kan, u li joo li. Un kpa litaakɔr mu na kan, u li joo li. Un kaa kpa kpaacha na kan, un di waabɔkul ki di kooh, ki daa kpaacha. 37M tuk nimi la, ni ŋmee Uwumbɔr aagbaŋ ponn ni, ke bi ga ŋa mi ke baah ŋani titunwambirdam pu na. Le bi ga sil ŋa mi kena. Baah nan ŋmee maabɔr pu na, ni mɔmɔk bi gbiini la." 38Le bi bui u, "Ndindaan, lik, ti kpa kpaacha mam bilee la." Le u bui bi, "Ni ŋeer la." 39Le u nyan nima, le ki buen Olif aasui aajool paab, waah cha nima n-yoonn mɔmɔk pu na. Waadidiliib mu dii u. 40Waah fuu nima na, le u bui bi, "Ni li mee Uwumbɔr man, aan ki taa koo ntɔŋ ni." 41Le u cha bi, ki foor siib, le ki gbaan kitiŋ ki mee Uwumbɔr ke 42"Nte, ni yaa ye saageehn kan, nyan mi falaa u choo na ni. Tɔ, ŋa saageehn, ki taa ŋa maageehn." 43Le Uwumbɔr aatuun nyan paacham ki dan u chee ki pɔɔk utaakpab. 44Le Yesu aasui ponn ni wu ki ti nyaŋ. Le u ki mee Uwumbɔr linimaln. Le kitotoŋ naan u, le ki ye nsin ki tuu lir kitiŋ. 45Le u mee Uwumbɔr doo, le ki fii, ki gir buen waadidiliib chee, le ki ti mui bi dɔ geen mpombiin pu. 46Le u baa bi, "Ba ŋa ni dɔ geen? Fiin, aan ki li mee Uwumbɔr man, aan ki taa koo ntɔŋ ni." 47Waah laa bi len kena na, le kinipaak fuu ni bi chee. Judas u ye waadidiliib kipiik ni bilee ponn ni ubaa na, luln kinipaak ngbaan pu nsan, le ki duun Yesu, ke un ti moor utakpiln. 48Le Yesu baa u, "Judas, aa moor ntakpiln ke aa kooh min Unibɔn Aabo oo?" 49Yesu aadidiliib aah kan ke binib ngbaan ban bin chuu u na, le bi baa u, "Tidindaan, ti di kpaacha mam ki jaa bi ii?" 50Le waadidiliib ponn ni ubaa di kpaacha ki gii nyan Uwumbɔr aatotoorninkpil aatutuln aatafalgiir. 51Le Yesu bui bi, "Di cha kena man," le ki di uŋaal ki meeh utafal le ki teb u. 52Le u baa Uwumbɔr aatotoorninkpiib, ni Uwumbɔr aadichal ni aakikiirb, ni Juu yaab aaninkpiib bi dan bi nan chuu u na, "Ni joo kpaacha mam ni jagbaali mam, ke ni nan chuu mi, ke maah ye ufifiir le na aa? 53M nan bi ni chee Uwumbɔr aadichal ni iwiin mɔmɔk, le naa nan chuu mi. Tɔ, dandana wee le ye n-yoonn mu Uwumbɔr siin ki tii nimi ni Kinimbɔŋ u tun mbɔmbɔɔn aatuln na." 54Le bi chuu Yesu ki di u di buen Uwumbɔr aatotoorninkpil aadichal ni. Le Piita paan u pu ki bi dandar. 55Le bi tuur mmii lichiln ngbaan ni, le ki ka gob mu. Piita mu kpaan bi chee ki kal bikaasisik ni. 56Le mmii aah woln unimbil wɔb na, le usaapɔɔn ututuln na kan u, le ki kal lik u sulm, le ki bui ke, "Uja umina mu nan bi Yesu chee." 57Le u nee, le ki bui u, "Upii, maa nyi u." 58Le ni kpee siib, le unii uken mu kan u, le ki bui u, "Aa mu ye bi ponn ni ubaa la." Le Piita bui u, "Uja, maa ye." 59Le ni ki kpee siib, le uja uken bui ke "Ni ye mbamɔn, uja wee mu nan bi u chee. U mu ye Galilee aatiŋ aanii la." 60Le Piita bui u, "Uja, maa nyi saah len pu na aatataa." Libuul ngbaan ni, waah laa bi len kena na, le ukooja wii. 61Le Tidindaan fenn ki lik Piita. Le Piita teer Tidindaan aah tuk u pu na, "Din, aa ga len mfim mutaa ke saa nyi mi le ukooja nin wii." 62Le Piita nyan lipaal, le ki wii pam. 63Le bijab bi joo Yesu na, bi ŋa u mbɔɔnyun, le ki gbaa u, 64le ki di likekeln ki poo unimbil, le ki baa u, "Uwumbɔr aabɔnabr, ulau faa si?" 65le ki sii u ŋisiibil pam. 66Ki woln kitaak kichakpiik ni, le Juu yaab aaninkpiib, ni Uwumbɔr aatotoorninkpiib, ni Uwumbɔr aakaal aamɔmɔkb, kuun tɔb chee, le ki di Yesu ki di siin binimbiin ni, 67le ki baa u, "Aa ye Uwumbɔr Aanileekoo Kristo la aa? Tuk timi." Le u bui bi, "M yaa tuk nimi kan, naan li pak maah len pu na. 68M mu yaa baa nimi mbaan kan, naan giin tii mi, [kaan di mi lii.] 69Dandana ki joo cha, min Unibɔn Aabo ga kal Uwumbɔr u yeh mpɔɔn mɔmɔk na aaŋaaŋgii wɔb." 70Le bi mɔmɔk baa u, "Aa ye Uwumbɔr Aajapɔɔn la aa?" Le u bui bi, "Ni ye naah len pu na la." 71Le bi bui ke, "Taa ki ban siiraadam. Timi tibaa ŋun waah len umɔb ni pu na."

will be added

X\