LUK 21

1Le Yesu yaa lik, ki kan biwankpadam joo ŋimombil pam ki joo ŋa Uwumbɔr aapiin aadakaa ni, 2ki kan ukpopiigiin ubaa mu di janjan mam bilee ki di ŋa u ponn ni. 3Le Yesu bui ke "M tuk nimi mbamɔn la, ukpopiigiin wee tii ŋimombil ki jer bi mɔmɔk aah tii pu na. 4Bi mɔmɔk tii ki gur ŋimombil saakpen. U ye ugiin la, le ki di waamombil mɔmɔk ki di tii, kaa ki gur nibaa." 5Tɔ, le binib bibaa nan bi len Uwumbɔr aadichal aah ŋan pu na, ki kpa ŋitakpal nyaan, ni ipiin i binib tii Uwumbɔr na. 6Le Yesu bui bi, "N-yoonn choo, bi ga nan gbaa wii lidichal limina mɔmɔk. Litakpal libaa aan ki li paa liken pu." 7Le Yesu aadidiliib baa u, "Tiicha, bi ga ŋa kena bayoonn? Ba ga li ye limɔkl ki mɔk timi ke ni ŋeer bin ŋa kena?" 8Le u bui bi, "Ni li nyi man, ubaa taa ŋmann nimi. Binib pam le ga nan dan ki pur maayimbil ke bima le ye min Yesu, ki ga bui ke ni ŋeer a. Ni taa dii bi man. 9Ni yaa ŋun ke ntim mubaa aanib to butɔb, ntim muken aanib kpa tibɔr kan, ni taa san ijawaan man. Uwumbɔr le siin ke nimina mɔmɔk ga ŋa. Nima le aan mɔk ke dulnyaa wee ga doo libuul ngbaan ni. 10"Linibol libaa ga to linibol liken butɔb. Nnaan mubaa aanib ni nnaan muken aanib ga to tɔb butɔb. 11Kitiŋ ga deŋ saakpen ŋipepel ŋipepel. Nkon mu ga lir. Iween mu ga lir, ki ku binib pam ntim ntim ponn ni. Lijinjiir aawan, ni tiwan ni faani binib na mu ga li bi paacham. 12"Nimina mɔmɔk aa kaa kee ŋa buyoonn na, le bi ga chuu nimi, ki ŋa nimi falaa, ki di nimi di ŋa mmeen aadir ni ki ji nimi tibɔr, ki di nimi ki di ŋa kiyondiik ponn ni. M pu, le bi ga di nimi di siin bibɔrb ni ntim aaninkpiib aanimbiin ni, bin ti ji nimi tibɔr. 13Nima le ga tii nimi nsan le ni tuk bi tibɔnyaan tee. 14Ni di ŋa nisui ni man ke naan puen baa nisui ni ke ni ga len kinye? 15M ga tuk nimi naah ga ti len pu na, aan nimi aadin ubaa taa ki ŋma kpak nimi, kaan ki ŋma len tibaa. 16Nitetiib, ni ninatiib, ni ninaabitiib, ni nidoyaab, ni nijɔtiib, ga kooh nimi. Le binib ga ku ni ponn ni bibaa. 17Binib mɔmɔk ga li nan nimi m pu. 18Ni mu aan bee yooli; nimi aayikpirk kibaa le aan bee yooli. 19Ni yaa ji limɔr falaa mɔmɔk ponn ni kan, ni ga kan limɔfal li kaa kpa ndoon na la." 20"Ni yaa kan sujatiib si gob Jerusalem aatiŋ kan, ni li nyi man, naan yunn, le bi ga bii ki doo. 21N-yoonn ngbaan yaa nan fuu ni kan, bin bi Judea aatiŋ ponn ni na, bin san buen ŋijoo paab. Bin bi Jerusalem ponn ni na mu li nyan ki ni. Bin bi itingbaan ni na, bi taa koo Jerusalem aatiŋ ni. 22N-yoonn ngbaan le Uwumbɔr ga daa Jerusalem aatiŋ aanib aatafal, aan ki gbiin waagbaŋ aah ŋmee pu na mɔmɔk. 23N-yoonn ngbaan bipiib bi kpa ŋipuu na, ni bipiib bi kpa mbim bi ŋaa libiil na, bi ga li kpa kinimbaak; ba pu? Uwumbɔr ga gee liŋuul saakpen kitiŋ ngbaan aanib pu. Bi ga ji falaa saakpen a. 24Bi ga ku bibaa kpaacha, ki ga chuu bibaa mu tinaagbiir ki di buen ŋinibol mɔmɔk aakaasisik ni. Le bin kaa ye Juu yaab na ga li joo Jerusalem ki ti saa baayoonn aah ga doo pu na." 25"Lijinjiir aawan ga li bi nwiin, ni uŋmal, ni ŋiŋmabil ponn ni. Nnyusaakpem ga ŋa tinyunkpeln saakpiin, ki faa kifuuk saakpen, ki ŋa binib ilandak. Baan ki li nyi baah ga ŋa pu na. 26Paacham aawan aan ki li bi mbamɔm. Nima le binib ga lik naah ga li bi pu dulnyaa wee ni na, ki ga san ijawaan ki ti fik. 27N-yoonn ngbaan le bi ga kan min Unibɔn Aabo bi kitaalangbaŋ ni ki choo, ki wiin chain, ki joo mpɔɔn. 28Ni yaa kan tiwan nimina mɔmɔk bi ŋani kan, chuu nibaa man, ki pɔɔk nitaakpab. Naan yunn le ni ga ŋmar." 29Le Yesu ŋak bi liyaataŋakl, "Ni lik bikpasɔm ni isui mɔmɔk man. 30Ni yaa kan yaabon bi ŋani tifar kan, ni bee ke ni kpee siib na kan, kiseek ga seer. 31Kena na, ni yaa kan nimina bi ŋani kan, ni bee ke ni kpee siib na kan, Uwumbɔr aanaan ga fuu ni. 32"M tuk nimi mbamɔn la, dandana aanib aan jer le tiwan nimina mɔmɔk puen ŋa. 33Paacham ni taab ga jer. Maaliin ma aan jer." 34"Ni li nyi man, ki taa nyu ndaan gbii ki li kpa ndaan aaween, ki taa cha nimi aabimbin aabɔr gbiin nimi aalandak mɔmɔk, aan maagirndaal taa yuk nipoobil. 35Maagirndaal kan, dulnyaa aanib mɔmɔk aapoobil ga yuk, ke gaawɔb aah chuu upeel kan upoobil yuk pu na. 36Li nyi man n-yoonn mɔmɔk, ki mee Uwumbɔr un tii nimi mpɔɔn ni nyan falaa umɔk choo na ni, ki sil min Unibɔn Aabo aanimbiin ni." 37Iwiin mɔmɔk le Yesu nan bi Uwumbɔr aadichal ni, ki tuk binib Uwumbɔr aaliin. Tinyer mɔmɔk le u buen Olif aasui aajool paab ki ti dɔ geen. 38Kichakpinaanyeek ni mɔmɔk le binib cha u chee Uwumbɔr aadichal ni, bin ti ŋun waaliin.

will be added

X\