LUK 20

1Kitaak kibaa daal le waah bi Uwumbɔr aadichal ni ki tuk binib Uwumbɔr aaliin, ki mooni tibɔnyaan tee na, le Uwumbɔr aatotoorninkpiib, ni Uwumbɔr aakaal aamɔmɔkb, ni Juu yaab aaninkpiib dan u chee, 2le ki nan baa u, "Aa kpa nsan ke aa ŋa saah ŋani pu na aa? Ŋmaa tii si nsan ngbaan? Tuk timi." 3Le u bui bi, "M mu ga baa nimi mbaan. 4Jɔnn aah nan muin binib nnyun ni na, ŋmaa nan tii u nsan? Uwumbɔr aan binib? Tuk mi man." 5Le bi kpokl tɔb, "Ti yaa bui ke Uwumbɔr le tii u nsan kan, u ga baa timi, ba ŋa taa gaa u ki kii. 6Ti yaa ki len ke binib le tii u nsan kan, binib ngbaan mɔmɔk ga mae timi ŋitakpal la; bi mɔmɔk len ke Jɔnn nan ye Uwumbɔr aabɔnabr la." 7Nima le bi bui Yesu ke baa nyi udaan u tii Jɔnn nsan na. 8Le Yesu bui bi, "M mu aan tuk nimi maah kpa nsan pu ki ŋa maah ŋani pu na." 9Le u ŋak binib ngbaan liyaataŋakl, "Uja ubaa le nan naan kisaak, ki ŋum isui i lu ŋisubil na ki ponn ni, le ki yin bikpaab bibaa, le ki di kisaak ngbaan ki di ŋa biŋaal ni, ke bi li lik ki. Isui ngbaan yaa nan lue ŋisubil kan, bin ker ki di tii u, aan ki ker bibaa mu. Waah ŋa kena na, le u siir ki buen kitiŋ ki daa na ni, ki ti yunn nima. 10Buyoonn ŋisubil ngbaan nan puir na, le u di ututuln ubaa, ki di tun bikpaab ngbaan chee, ke bin tii ni u ŋisubil kisaak ngbaan ponn ni. Le bi gbaa u, le ki giin ni u, kaa tii u nibaa. 11Le u ki di ututuln uken tun bi chee. Le bi gbaa u mu, ki yook u, le ki giin ni u, kaa tii u nibaa. 12Le u ki tun ututuln taatar bi chee. Le bi gbaa u mu, ni ti ŋa u iween, le ki jenn nyan u nima. 13Le usaakdaan ngbaan bui, 'M ga ŋa kinye? M ga di maabogeen le ki di tun bi chee. Nibaakan, bi ga pak uma la.' 14Le bikpaab ngbaan aah kan waabo ngbaan choo na, le bi kpokl tɔb, 'Uma le ye waafaajil. Cha ti ku u man, aan ki ji waafaal.' 15Le bi chuu u, le ki di nyan ngbaan, le ki ti ku u. "Kena pu na, usaakdaan ngbaan ga ŋa bi kinye? 16U ga dan nan ku bikpaab ngbaan, ki di kisaak ngbaan ki di tii bikpaab biken." Kinipaak ngbaan aah ŋun kena na, le bi bui ke, "Uwumbɔr taa cha ni pii bi." 17Le Yesu lik bi, le ki bui bi, "U yaa kaa ŋa bi kena kan, Uwumbɔr aagbaŋ aah len pu na aatataa ye kinye? ke 'Litakpal li bidimaab yii li na, lima le ye litakpayil.' 18Unii umɔk lir litakpal ngbaan pu na, u ga koor. Unii u litakpal ngbaan lir u pu na, li ga nan u, un ŋa ke kitangbaak na." 19Le Uwumbɔr aakaal aamɔmɔkb ni Uwumbɔr aatotoor-ninkpiib bee ke Yesu di liyaataŋakl ngbaan ki ŋaŋ bima la. Nima pu na le bi ban bin chuu u libuul ngbaan ni, ki mu san kinipaak ngbaan ijawaan. 20Le bi ban nsan mu pu bi ga chuu u na, le ki di bipepekb, ki di tun u chee, bin ti ŋmann ke bi ye bininyaan la, aan ki pen u nlan, aan ki chuu u ki di ŋa kitiŋ ngbaan aayidaan aaŋaal ni. 21Le bi dan nan bui u, "Tiicha, ti bee ke aa len mbamɔn, ki tuk binib Uwumbɔr aaliin mbamɔm, kaa pak ubaa ki jer uken. Aa po mɔk bi Uwumbɔr aasan mbamɔm la. 22Tuk timi, ni ŋan ti pa lampuu ki di tii Ubɔrkpaan Siisa aan naa ŋan?" 23Le Yesu bee ke bi pen u nlan la, le ki bui bi, 24"Mɔk mi limombil." Baah mɔk u na le u baa bi, "Ŋmaa aanaŋ ni liyimbil bi li pu?" Le bi bui u, "Siisa yaan." 25Le u bui bi, "Nima pu na, ni di ni ye Siisa yaan na ki di tii u man, ki di ni ye Uwumbɔr yaan na ki di tii Uwumbɔr." 26Yesu aah len kena na, le ni gar bi pam. Baa ŋma chuu u taani waaliin pu binib aanimbil ni. Le bi ŋmin. 27Le Sajusii yaab bibaa dan u chee. Bima le len ke binib aan fikr nkun ni. 28Le bi bui u, "Tiicha, Moses nan ŋmee nkaal ki tii timi, ke 'Uja yaa kpa puu ki yaa kpo, kaa kpa ubo kan, unaal n di ukpopii ngbaan di kpan, ki ma mbim ki tii ukpil.' 29Tɔ, naabitiib bilule nan bi. Upol na nan yoor upii, le ki kpo, kaa kpa ubo. 30Le unaal di ukpopii ngbaan ki di kpan, ki mu kpo, kaa kpa ubo. 31Le un paa u pu na mu ŋa kena. Le bijab bilule ngbaan mɔmɔk mu ŋa kena, ki kpo doo, kaa kpa ubo. 32Kookoo yoo le upii ngbaan mu kpo. 33Kena pu na, binib yaa nan fikr nkun ni kan, upii ngbaan ga li ye ŋmaa aapuu? Bi mɔmɔk bilule nan joo u la." 34Le Yesu bui bi, "Dulnyaa wee ponn ni bijab yoor bipiib la. Bipiib mu mɔn bijab la. 35Binib bi ŋeer bi ga fikr nkun ni ki li bi dulnyaa u choo na ni na, baan yoor bipiib. Bipiib mu aan mɔn bijab. 36Bi ga li bi ke Uwumbɔr aatuuntiib aah bi pu na, kaan ki kpo. Baah ga fikr nkun ni na, bi ga li ye Uwumbɔr aabim la. 37Tɔ, Moses aah nan ŋmee pu na le mɔk timi ke bin kpo na ga fikr nkun ni. Waah nan ŋmee busub ngbaan aabɔr na, u yi Tidindaan Uwumbɔr ke Abraham ni Aisak ni Jakob Aawumbɔr la. 38Uwumbɔr yaa len ke u ye binib bi kpo na Aawumbɔr kan, nima le ŋmɔk ke bi kpa limɔfal. Bi mɔmɔk ye binifuub Uwumbɔr le chee." 39Le Uwumbɔr aakaal aamɔmɔkb bibaa bui Yesu, "Tiicha, saah len pu na, ni ŋan la." 40Le baa kaar bi ki baa u mbaan. 41Le Yesu baa bi, "Binib ŋa kinye pu le ki bui ke Uwumbɔr Aanileekoo Kristo ye Ubɔr David aayabil? 42David ubaa nan len Uwumbɔr aalahn aagbaŋ ponn ni ke 'Tidindaan Uwumbɔr tuk Ndindaan: Kaln ŋŋaaŋgii wɔb, 43ki ti saa buyoonn m ga nyaŋ saadim mɔmɔk na.' 44David aah nan yi Kristo ngbaan ke Udindaan kena na, Kristo ga li ŋma ye uyabil aa?" 45Kinipaak ngbaan aah pel Yesu aah len pu na, le u bui waadidiliib, 46"Ni li nyi man Uwumbɔr aakaal aamɔmɔkb aabɔr. Baageehn le ye ke bi li pee ŋibɔkur fɔfɔk, ki gee ke binib doon bi kinyaŋ ni, ki gee bin kal bininyuun aakakaa chee mmeen aadir ni, ni njim chee. 47Bi ji bikpopiib durm la, le ki mee Uwumbɔr ni yunn, bin ti ŋmann ke bi ye bininyaan la. Uwumbɔr ga daa bitafal ki jer waah ga daa binib biken aatafal pu na."

will be added

X\