LUK 2

1N-yoonn ngbaan le Ubɔrkpaan Siisa Augustus len ke binib mɔmɔk kuuni ki nan ŋmee baayimbil, un lik baah wiir pu na. 2Baah kahn binib kena njan pu na, le Kirinius ye Siria aatiŋ aaninkpil. 3Le binib mɔmɔk buen bido aatiŋ ni, bin ti ŋmee baayimbil. 4Josef ye Ubɔr David aamaal ponn ni aanii ubaa la. Nima pu na le u nyan Nasaret, kitiŋ ki bi Galilee aatiŋ ni na, le ki buen Ubɔr David aatiŋ, bi yi ki ke Betlehem, ki bi Judea aatiŋ ni na. 5Le u ni upuu Mari, u kpa lipuul na, buen bin ti ŋmee baayimbil. 6Baah bi Betlehem aatiŋ ni na, le ni ŋeer un ma ubo. 7Le u ma waajan aabijabo, le ki di u poo likekeln ni, le ki di u di ŋa tiwankur aah ŋmɔ timoor dakaa u ponn ni na; mpaan aa bi tichaandir ngbaan ponn ni, baah ga koo ni na. 8Le bipihdam bibaa bi nima chee timoor ni, ki kpaa baapiih, ki lik i kinyeek. 9Le Tidindaan Uwumbɔr aatuun fuu ni bi chee. Le Tidindaan aawiihn woln bi pu. Le ijawaan chuu bi saakpen a. 10Le Uwumbɔr aatuun ngbaan bui bi, "Taa san ijawaan man. M joo ni tibɔnyaan ti ga tii binib mɔmɔk mpopiin saakpen na. 11Kinyeek kee bi ma Uŋmaŋmardaan, Ubɔr David aatiŋ ni. Uma le ye Uwumbɔr Aanileekoo Kristo u ye Tidindaan na. 12Ni ga kan ubo ngbaan aah poo ŋikeken ni na, ki dɔ tiwankur aah ŋmɔ timoor dakaa u ponn ni na. Nima le ga li ye limɔkl ki tii nimi." 13Libuul ngbaan ni le Uwumbɔr aatuuntiib bi wiir saakpen na fuu ni utuun ngbaan chee, le ki pak Uwumbɔr, ki len ke 14"Cha ti nyuŋ Uwumbɔr u bi paacham na. Lifuur ga li bi dulnyaa wee ni. Uwumbɔr san binib kinimbaak la." 15Le Uwumbɔr aatuuntiib ngbaan gir buen paacham. Le bipihdam ngbaan bui tɔb, "Cha ti buen Betlehem dandana, ki ti lik Tidindaan Uwumbɔr aah tuk timi ke tiwan ni ŋa nima na." 16Le bi buen mala, le ki ti kan Mari ni Josef ni ubo ngbaan. Ubo ngbaan dɔ tiwankur aah ŋmɔ timoor dakaa u ponn ni na. 17Bipihdam aah kan u na, le bi tuk binib pam Uwumbɔr aatuun ngbaan aah tuk bi ubo ngbaan aabɔr pu na. 18Binib bimɔk ŋun bipihdam aah len pu na, le ni gar bi. 19Mari le teer tibɔr timina mɔmɔk, ki dakl lik taatataa usui ni. 20Le bipihdam ngbaan gir buen baapiih chee timoor ni. Baah cha na, le bi nyuŋni Uwumbɔr ki pak u, baah kan ki ŋun pu na mɔmɔk pu; bi kan ki ŋun Uwumbɔr aatuun ngbaan aah tuk bi pu na. 21Ubo ngbaan aawiin iniin daal le ni ŋeer bin gii uchakpaln. Le bi yi u ke Yesu. Buyoonn Mari aa nan kee dek lipuul na, Uwumbɔr aatuun ngbaan bui u ke bin yi u kena. 22Buyoonn ni ŋeer bin ŋa Mari chain, Moses aakaal aah mɔk pu na, le bi di ubo ngbaan ki buen Jerusalem, bin ti di u ki di tii Tidindaan Uwumbɔr. 23Ni ŋmee Tidindaan Uwumbɔr aakaal aagbaŋ ni ke bin di njan aabim, mbijabim mɔmɔk ki di tii Uwumbɔr. 24Le Josef ni Mari toor kitork ki tii Uwumbɔr, waakaal aah len pu na. Nkaal ngbaan len ke bin di ŋinanjil ŋilee, bee mbɔrnanjibim mulee ki di toor kitork ngbaan. 25Le uja ubaa bi Jerusalem aatiŋ ni. Bi yi u ke Simeon. U ye uninyaan la, ki dii Uwumbɔr aakaal mɔmɔk mbamɔm, ki lik bundaln Uwumbɔr ga nyan Israel yaab baafalaa ni na. Uwumbɔr Aafuur nyaan bi u chee, 26ki nan mɔk u ke waan kpo, see u kan Kristo u ye Tidindaan Uwumbɔr Aanileekoo na. 27Le Uwumbɔr Aafuur nyaan cha u koo Uwumbɔr aadichal ni, le Yesu aate ni una joo ni Yesu ki koo ni Uwumbɔr aadichal ni, bin ti di u ki di tii Uwumbɔr. Buyoonn bi di u koo ni na 28le Simeon gaa u uŋaal ni, le ki pak Uwumbɔr, le ki bui ke 29"Ndindaan, aa ga ŋma cha m nyan dulnyaa wee ni, le m kpa nsuudoon; ba pu? Dandana aa ŋa saah nan len pu na la, 30ki cha nnimbil kan Uŋmaŋmardaan u nyan aa chee na. 31Aa nan len ke aa ga tun ni u dulnyaa wee ni. Dandana wee u ga nyan, aan binib mɔmɔk bee waabɔr. 32U ye nwiihn ki ga woln bin kaa ye Israel yaab na aanimbil. U pu, le binib ga nyuŋ saanib Israel yaab." 33Simeon aah len ubo ngbaan aabɔr kena na, le ni gar ute ni una. 34Le Simeon ŋa Uwumbɔr aanyoor ki ŋa bi pu, le ki bui ubo ngbaan aana Mari, "Uwumbɔr lee ubo ngbaan ke un sunn timi Israel yaab ponn ni pam taab, ki nyuŋ bi ponn ni pam. U ye limɔkl li binib pam ga yii li na. 35Nima le ga kpiir baah dak pu na bisui ni. Aasui mu ga bii saakpen a, ki ga li wu ke unyoohn na." 36Le upininkpil ubaa, u ye Uwumbɔr aabɔnabpii na, bi yi u ke Ana, mu nan bi. U ye Fanuel aabisal, ki ye Asher aanibol ponn ni aanii ubaa la. U por saakpen a. U nan bi uchal chee ŋibin ŋilule, uchal kpo cha u, le u ye ukpopii. 37U ye ŋibin imonko inaa ni ŋinaa. U bi Uwumbɔr aadichal ni n-yoonn mɔmɔk, ki dooni u nwiin pu ni kinyeek, ki lul bumɔb, ki mee u. 38N-yoonn ngbaan le u mu fuu ni, ki dooni Uwumbɔr ubo ngbaan pu, le ki di waabɔr ki tuk Jerusalem aanib bimɔk lik buyoonn Uwumbɔr ga gaa bi lii na. 39Le Yesu aate ni una ŋa Tidindaan Uwumbɔr aakaal aah len pu na mɔmɔk, le ki gir kun bido aatiŋ Nasaret ni, ki bi Galilee aatiŋ ni na. 40Le ubo ngbaan muun, ki moo kan mpɔɔn, ki gbiin nlan saakpen a. Le Uwumbɔr aanyoor nan bi u pu. 41Libiln mɔmɔk le ute ni una cha Jerusalem buyoonn Juu yaab ji Lakr-jer aajim, bin ti teer bundaln Uwumbɔr aatuun u ku binib na nan jer cha bi na. 42Yesu aah nan ti saa ŋibin kipiik ni ŋilee na, le bi buen Jerusalem bin ti ji njim ngbaan, baah ŋani pu ŋibin mɔmɔk na. 43Bi bi nima ki ti saa buyoonn njim ngbaan aawiin doo na, le ki gir cha kun. Le ubijabo Yesu gur ki bi Jerusalem. Ute ni una mu aa nyi. 44Bi dak ke u bi usachuln ŋeen aatɔtiib ponn ni. Le bi chuun nwiimɔn aasachuln, le ki nin ban u bidoyaab ponn ni, kaa kan u. 45Baah kaa kan u na, le bi gir buen Jerusalem ponn ni, ki chuun ban u. 46Iwiin itaa daal le bi kan u Uwumbɔr aadichal ni. U ka bimɔmɔkninkpiib aakaasisik ni, ki pel baah len pu na, ki mu baa bi mbaan, 47ki kpa nlan ki bee baah len pu na aatataa, ki giin ki kii bi mbamɔm. Nima le ni gar binib bimɔk ŋun na. 48Ute ni una aah kan u na, le ni gar bi pam. Le una baa u, "Maabo, ba ŋa aa ŋa timi kena? M ni aate ban si ni mpombiin." 49Le u baa bi, "Ba pu ni ban mi? Naa nyi ke see m li bi Nte Uwumbɔr aatuln ni ii?" 50Le baa bee waah len pu na aatataa. 51Le u dii bi ki fuu ni Nasaret aatiŋ ni, le ki kii baamɔi. Le una joo tibɔr timina mɔmɔk usui ni. 52Le Yesu muun ki moo kan nlan. Uwumbɔr ni binib mu gee u la.

will be added

X\