LUK 18

1Le Yesu ŋak bi liyaataŋakl, un ti mɔk bi ke ni ŋan bi li mee Uwumbɔr n-yoonn mɔmɔk, ki taa cha bitaakpab yɔl. 2"Ubɔjir ubaa nan bi kitiŋ kibaa ni, kaa san Uwumbɔr, ki mu aa pak binib. 3Ukpopii ubaa mu nan bi kitiŋ ngbaan ponn ni, le ki choo u chee n-yoonn mɔmɔk, ki bui u ke un nyan u waadin aaŋaal ni. 4N-yoonn mɔmɔk le u yii ni yunn. Ni joo cha kena na, le u len usui ni, 'Maa san Uwumbɔr, ki mu aa pak binib. 5Tɔ, ukpopii wee mu aah choo m chee n-yoonn mɔmɔk ki muk mi saakpen pu na, m ga tii u waabamɔn, u taa ki beenin choo nan muk mi kena le nsui ti nyan mbaa ponn ni."' 6Le Yesu ki bui waadidiliib, "Li ŋun man ubɔjir u kaa ŋan na aah len pu na. 7Waah len ke u ga tii u waabamɔn pu na, Uwumbɔr aan tii waanileekaan bi mee u n-yoonn mɔmɔk nwiin pu ni kinyeek na baabamɔn aa? U ga yunn aa? 8M tuk nimi la, u ga tii bi baabamɔn mala. Min Unibɔn Aabo mu yaa gir ni kan, m ga kan binib beenin tii mi naadii dulnyaa wee ni ii?" 9Le Yesu ŋak liyaataŋakl tii binib bi dak ke bima le ŋan ki jer unibɔn mɔmɔk, kaa lik pak ubaa na, ke 10"Bijab bilee nan koo Uwumbɔr aadichal ni, ke bin ti mee Uwumbɔr. Ubaa nan ye Farisii aanii la, uken mu nan ye ulampuugaar la. 11Farisii aanii le nan sil ubaa ki mee Uwumbɔr ki bui ke 'Uwumbɔr, m doon si ke maa bi ke binib mɔmɔk aah bi pu na. Maa kpa iniman, kaa tun lituln li kaa ŋan na, kaa gɔr kidaagook, kaa bi ke ulampuugaar umina aah bi pu na. 12Likpakool mɔmɔk ponn ni, m lul bumɔb iwiin ilee la. Maah kan tinyoor timɔk na, m yakr mfim kipiik ki nyan tibaa ki di tii si.' 13Ulampuugaar ngbaan le nan sil dandar, kaa kaar un waan lik paacham. U po si jik uyil, le ki bui ke 'Uwumbɔr, sam mi titunwambirdaan kinimbaak,' le ki cha kun. 14M tuk nimi la, Uwumbɔr len ke ulampuugaar ngbaan aabɔr le ŋan, waa len ke Farisii aanii ngbaan aabɔr ŋan; ba pu? unii umɔk nyuŋ ubaa na, Uwumbɔr ga sunn u taab. Unii umɔk sunn ubaa taab na, Uwumbɔr ga nyuŋ u." 15Le binib bibaa joo ni mbipɔm, ki di dan Yesu chee, ki ban ke un di uŋaal ki di paan bi pu. Waadidiliib aah kan kena na, le bi kae bi. 16Le Yesu yin bi, bin dan u chee, le ki bui waadidiliib, "Cha mbim ngbaan dan m chee man. Taa ki jenn bi man. Binib biyaabimbin bi ke mbim aah bi pu na, bima le yeh Uwumbɔr aanaan. 17M tuk nimi mbamɔn la, unii umɔk kaa gaa Uwumbɔr aanaan ke ubo aah gaar tiwan pu na, waan koo mu ni." 18Le uyidaan ubaa nan baa Yesu, "Tiicha nyaan, m ga ŋa kinye ki kan limɔfal li kaa kpa ndoon na?" 19Le Yesu baa u, "Ba pu aa yi mi ke tiicha nyaan? Ubaa aa ŋan, see Uwumbɔr baanja. 20Aa nyi Uwumbɔr aakaal la: 'Taa gɔr kidaagook; taa ku binib; taa su kinaayuk; taa li ye nnyaamɔn aasiiraadaan; li pak aate ni aana."' 21Le u bui u, "M joo nkaal mumina mɔmɔk tibir ni la." 22Yesu aah ŋun kena na, le u bui u, "Tiwan nibaa le gur. Kooh saah kpa tiwan nimɔk na, ki di ŋimombil ngbaan ki di tii bigiim, aan ki li kpa liwangol paacham, aan ki dan nan dii mi." 23Waah ŋun kena na, le ni ŋa u mpombiin saakpen; ba pu? u kpa liwankpal saakpen a. 24Yesu aah kan kena na, le u bui ke, "Ni pɔɔ saakpen binib bi kpa liwankpal na koo Uwumbɔr aanaan ni. 25Uwankpadaan aah ga koo Uwumbɔr aanaan ni pu na, ni pɔɔ ki jer laakumii aah ga koo seerkaa aameer ni pu na." 26Le binib bi ŋun kena na bui ke "Ni yaa ye kena kan, ŋmaa ga tee ŋmar?" 27Le Yesu bui ke "Tiwan ni pɔɔ binib chee na, naa pɔɔ Uwumbɔr chee." 28Le Piita bui u, "Tima kan, ti nan di taah kpa nimɔk na ki di lii, ki dii si la." 29Le Yesu bui bi, "M tuk nimi mbamɔn la, unii umɔk di cha waadichal, bee upuu, bee unaabitiib, bee ute, bee una, bee waabim, Uwumbɔr aanaan pu na kan, 30u ga kan ki jer waah di cha tiwan nimɔk na saakpen dandana wee. N-yoonn mu choo na, u ga kan limɔfal li kaa kpa ndoon na." 31Le Yesu di waadidiliib kipiik ni bilee na, ki di nyan ngbaan, le ki bui bi, "Li pel man, ti yaa fuu Jerusalem kan, bi ga di min Unibɔn Aabo ki ŋa Uwumbɔr aabɔnabtiib aah nan ŋmee ke bi ga nan ŋa mi pu na mɔmɔk. 32Bi ga di mi ki di ŋa bin kaa ye Juu yaab na aaŋaal ni, bin ti ŋa mi mbɔɔnyun, ki yook mi, ki teei timɔɔtan ŋani m pu, 33ki lue mi ŋinaalab, ki ga ku mi. Iwiin itaa daal le m ga fikr nkun ni." 34Le baa bee iliin imina aatataa. Uwumbɔr le bɔr yaatataa. Nima le baa bee waah len pu na aatataa. 35Le Yesu aah peen Jeriko aatiŋ ni na, ujoon ubaa ka nsan aamɔgbiln, ki mee binib tiwan. 36Le u ŋun kinipaak aah choo pu na, le ki baa ke "Ba ŋa?" 37Le bi bui u, "Yesu u ye Nasaret aatiŋ aanii na le choo." 38Le u teen ke "Yesu, u ye Ubɔr David aayabil na, sam mi kinimbaak." 39Le binib bi luln Yesu pu nsan na kae u, ke un ŋmin. Le u moo tar, "Ubɔr David aayabil, sam mi kinimbaak." 40Le Yesu sil nsan ni, le ki bui bi, "Li joo ni u man." Waah duun ni u na, le u baa u, 41"Aa ban ba?" Le u bui u, "Ndindaan, m ban ke aa likr nnimbil le tii mi." 42Le u bui u, "Aa likr a. Saah gaa mi ki kii na, nima le cha aa likr." 43Libuul ngbaan ni le u likr, le ki dii u, le ki nyuŋni Uwumbɔr. Binib ngbaan mɔmɔk aah kan kena na, le bi pak Uwumbɔr.

will be added

X\