LUK 17

1Le Yesu bui waadidiliib, "Ntɔŋ ga sil li bi; tibɔbil mu bi unii u tɔŋni binib ke bi tun titunwambir na. 2Bi yaa ba tee di kinaak saakpeŋ ki di tul leen uneen ni, ki tur u lii nnyusaakpem nin chee nyoo na ni kan, ni soor ki tii u, ni u tɔŋ maadidiliib ponn ni uwaatiir ubaa un tun titunwambir. 3Ni li nyi man. "Aana aabo yaa ŋa si bakaa kan, sur u. U yaa kpeln waabimbin kan, di cha pinn u. 4U yaa ŋa si bakaa mfim mulule nwiin mbaa ponn ni, ki yaa dan aa chee mfim mulule ki bui si, 'M ŋa si gafara la,' aa di cha pinn u." 5Le waakpambalb bui u, "Tidindaan, too kpee timi aanaadii pu." 6Le u bui bi, "Ni yaa gaa Uwumbɔr ki kii siib kan, ni ga bui busub ngbaan ke bu ŋɔb libuul ngbaan ni ki ti ŋuŋ nnyusaakpem ponn ni, le bu ga kii nimi aamɔb." 7"Tɔ, ni ponn ni ubaa yaa kpa unaagbiija u ko kisaak, bee u kpaa ipiih na kan, u yaa nyan ni kisaak kan, saan bui u libuul ngbaan ni, 'Nan ji tijikaar.' 8Aa ga bui u, 'Ŋa tijikaar ki siin mi aan m ji ki nyu. M yaa jin doo kan, aa mu ga ji ki nyu.' 9Saanaagbiija yaa ŋa saah ban pu na kan, aa ga doon u ke u ni lituln aa? Aayii. 10Ni mu bi ke unaagbiija ngbaan aah bi pu na la. Ni yaa ŋa Uwumbɔr aah tuk nimi ke ni ŋa pu na mɔmɔk kan, ni bui ke 'Taa ŋeer ubaa pak timi. Ti po ŋa taah ba ga ŋa pu na la."' 11Yesu aah cha Jerusalem na, le u dii Samaria ni Galilee aatiŋ aanaanmɔk. 12Waah koo kitiŋ kibaa ni na, le bikɔndam kipiik ton u nsan ni, ki si dandar, 13le ki teen, "Tidindaan Yesu, sam timi kinimbaak." 14Yesu aah waa bi na, le u bui bi, "Li cha Uwumbɔr aatotoortiib chee, bin ti ŋaŋ nimi." Le baah cha na, bi pɔɔk a. 15Le bi ponn ni ubaa, waah kan ke u pɔɔk na, le u gir ni, le ki nyuŋni Uwumbɔr mpɔɔn pu, 16le ki nan gbaan Yesu aanimbiin ni, ki dooni u. 17U ye Samaria aatiŋ aanii la. Le Yesu baa ke, "Maa teb bikɔndam kipiik la aa? ke biwae na bi la chee? 18Ubaa aa gir ni un ti nyuŋ Uwumbɔr see uwawanja ngbaan baanja aa?" 19le ki bui u, "Saah gaa mi ki kii na, nima le cha aa pɔɔk. Fiin ki li dii saasan." 20Le Farisii yaab nan baa u, "Uwumbɔr aanaan ga fuu ni bayoonn?" Le u bui bi, "Uwumbɔr aanaan aah ga fuu ni pu na, binib aanimbil aan li waa mu. 21Baan ŋma bui, 'Lik, mu bi du,' kaan ŋma bui ke, 'Mu bi nima la.' Uwumbɔr aanaan bi ni ni." 22Le u tuk waadidiliib, "N-yoonn choo, le ninimbil ga li man min Unibɔn Aabo aah ga gir ni bundaln na, kaan kan. 23Le bi ga bui nimi, 'Lik, u bi nima,' ki ga ki bui ke 'Lik, u bi du.' Ni taa buen ti lik, ki taa dii bi man. 24Bundaln min Unibɔn Aabo ga nan gir ni na, ni ga li bi ke utaal aah moo ki woln paacham mɔmɔk pu, binib mɔmɔk ga li waa pu na. 25Dandana aanib ga yii mi. M ga ji falaa saakpen waahr, aan ki nin buen paacham aan ki gir ni. 26Min Unibɔn Aabo aah ga gir ni buyoonn na ga li bi ke Nowa aayoonn aah nan bi pu na. 27Bi nan ji ki nyu, bijab nan yoor bipiib, bipiib mu nan mɔn bijab, ki ti saa bundaln Nowa nan koo buŋɔb ni na, le nnyusaakpem fuu ni ki jin bi mɔmɔk. 28Tɔ, maah ga gir ni bundaln na ga li bi ke Lot aayoonn aah nan bi pu na. Bi nan ji ki nyu, ki daa tiwan ki kooh, ki bu tijikaar, ki maa tidir. 29Bundaln Lot nyan Sodom aatiŋ ni na, le mmii ni cheribir nyan ni paacham ki lir ki ku bi mɔmɔk. 30Kena le ni ga li bi bundaln min Unibɔn Aabo ga nan kpiir na. 31"N-yoonn ngbaan, unii yaa bi kikaafiik ponn ni kan, u taa koo waadiik ponn ni un ti yoor waawan ni bi ki ponn ni na. Un bi kisaak na mu taa gir kun. 32Teer man Lot aapuu aah nan fenn lik upuwɔb na, le Uwumbɔr ŋa u yooli. 33Unii umɔk kaa di ubaa ki di tii Uwumbɔr na kan, waamɔfal ga bee yooli la. Unii umɔk di ubaa ki di tii Uwumbɔr na kan, u ga kan limɔfal li kaa kpa ndoon na. 34M tuk nimi la, buyoonn m ga gir ni na, binib bilee ga li dɔ kidiik kibaa ponn ni kinyeek. M ga nan yoor ubaa ki di buen, ki cha uken. 35Bipiib bilee ga li boo nan idi. M ga nan yoor ubaa ki di buen, ki cha uken. 36[Bijab bilee ga li bi kisaak. M ga nan yoor ubaa ki di buen, ki cha uken.]" 37Le waadidiliib baa u, "Tidindaan, la chee?" Le u bui bi, "Liwankpol aah bi nin chee na, nangbal mam mu kuuni nima chee la."

will be added

X\