LUK 13

1N-yoonn ngbaan le binib bibaa dan nan bui Yesu ke Galilee aatiŋ aanib aah nan bi toor kitork ki tii Uwumbɔr na, le Pailat nan ku bi. 2Le Yesu baa bi, "Ni dak ke Galilee aatiŋ aanib ngbaan nan ye titunwambirdam ki jer Galilee yaab biken aa? Nima le cha u ku bi ii? 3Aayii. M tuk nimi la, ni yaa kaa kpeln nimi aabimbin kan, ni mɔmɔk ga kpo kena la. 4Tɔ, libimbifɔfɔkn aah nan lir ki ku bijab kipiik ni biniin Siloam ni na, ni dak ke bi nan kpa taani ki jer Jerusalem aanib mɔmɔk aa? 5Aayii. M tuk nimi la, ni yaa kaa kpeln nimi aabimbin kan, ni mɔmɔk ga kpo kena la." 6Le u ŋak bi liyaataŋakl, "Uja ubaa nan bun busub bubaa waasaak ponn ni; le ki joo cha, le u dan nan lik ke ŋisubil bi aa ŋaa bi, le kaa kan nibaa. 7Le u bui waatutuln, 'Ŋibin ŋitaa le na m dan nan lik busub bue. Maa kan lisubil libaa. Gaa bu lii. Taa cha bu li si ki gaa kitiŋ yooli.' 8Le ututuln ngbaan bui u, 'Ndindaan, cha bu libiln lee, m gbii bu taab, ki ban tinaabin ki bil bu. 9Libiln li choo na, bu yaa lun kan, ni ŋan. Bu yaa kaa lun kan, aa gaa bu lii."' 10Juu yaab aakpakool daal le Yesu bi mmeen aadiik ni, ki tuk binib Uwumbɔr aaliin. 11Le upii ubaa bi nima. Tiyaayar le joo u ki ŋa u ubun ŋibin kipiik ni ŋiniin. U boo guii, kaa ŋma yaar. 12Yesu aah kan u na, le u yin u ke un dan u chee, le ki bui u, "Upii, m teb saaween," 13le ki di uŋaal paan u pu. Libuul ngbaan ni le u yaar, le ki nyuŋ Uwumbɔr. 14Yesu aah teb upii ngbaan likpakool daal na, nima le cha mmeen aadiik ni aaninkpil gee liŋuul Yesu pu, le ki bui kinipaak ngbaan, "Iwiin iluub le bi likpakool aakaasisik ni, ti li tun lituln, ki cha likpakool daal. Nima pu na, ni dan iwiin iluub ngbaan aakaasisik ni aan u teb nimi. Ni taa ki dan likpakool daal u nan teb nimi." 15Le Tidindaan Yesu bui u, "Nimi biŋmaŋmannim, likpakool daal kan, ni ga chuu gbiln nimi aanaaja, bee nimi aabon, ki di u buen nkpen ni ke un ti nyu nnyun. 16Upii wee, u ye Abraham aayabil na, le Kinimbɔŋ buu u ŋibin kipiik ni ŋiniin le ki ŋa u u boo guii na. Maah chuu buur u likpakool daal na, naa ŋan aa?" 17Yesu aah len kena na, le binib bimɔk kpak u kinikpakpak na, inimɔɔn chuu bi. Waah tun lijinjiir aatun ŋi wiir na, le kinipaak ngbaan mɔk nan kpa mpopiin pam. 18Le Yesu baa bi, "Uwumbɔr aanaan naahn ba? M ga di ba ki di ŋaŋ mu? 19Mu naahn tisufar aabil, bi yi li ke mustad, li uja ubaa nan di bun waakpaab ni na. Le li muun ki ŋa busub. Le inyoon i laani paacham na dan nan ter yaadir bu aabon pu." 20Le Yesu ki baa bi, "M ga di ba ki di ŋaŋ Uwumbɔr aanaan? 21Mu naahn nnyɔk bi joo ŋani boroboro na, upii nan di ŋa boroboro aayon ponn ni, boroboro ngbaan mɔk duun la." 22Le Yesu cha Jerusalem. Waah cha na, le u bɔɔ dii ntisaakpem ni ntiwaatiir ni, le ki tuk binib Uwumbɔr aaliin. 23Le unii ubaa baa u, "Ndindaan, bin ŋmar na le bi siib aa?" 24Le Yesu bui bi, "Cha ninimbil li man ni li dii mbisamɔb mu kaa waa na. M tuk nimi la, buyoonn udichaldaan na ga nan fii ki laŋ kidiik na, nee aapuwɔb le binib pam ga li ban bin koo ni, kaan ŋma koo ni. Le ni ga si lipaal, le ki kpaa jaaleŋ, ki bui ke 'Tidindaan, chuu piir tii timi.' Le u ga bui nimi, 'Maa nyi nimi. Ni nyan ni la chee?' 26Le ni ga bui ke 'Ti ni si le nan kpaan ji ki nyun. Aa nan tuk binib Uwumbɔr aaliin timi aatiŋ ni la.' 27Le u ga ki bui nimi, 'M tuk nimi la, maa nyi nimi. Ni nyan ni la chee? Nimi titunwambirdam, ni mɔmɔk nyan m chee man.' 28Le u ga jenn nimi. Le ni ga li waa Abraham ni Aisak ni Jakob ni Uwumbɔr aabɔnabtiib mɔmɔk Uwumbɔr aanaan ni. Ni ga li bi lipaal, ki wii ki ŋman ŋinyin nima chee. 29Binib ga nyan liwipuul wɔb, ni liwilir wɔb, ni isikakl mɔk, ki ga li kal ki ji tijikaar Uwumbɔr aanaan ni. 30Li pel man, puwɔb yaab bibaa ga nan ŋa bisanlulm. Bisanlulm bibaa mu ga nan ŋa puwɔb yaab." 31N-yoonn ngbaan le Farisii yaab bibaa dan Yesu chee, le ki nan bui u, "Nyan du chee, ki li cha. Ubɔr Herod ban un ku si la." 32Le Yesu bui bi, "Ni li cha ti tuk uŋɔk ngbaan, 'Din ni fon le m ga nyan tiyaayar binib ni, ki teei bibum. Iwiin itaa daal le maatuln ga doo.' 33Nima le m cha Jerusalem din ni fon ni daalpu. Baan ku Uwumbɔr aabɔnabr ubaa nibaa chee, see Jerusalem ponn ni. 34"Jerusalem aanib, nsui bii ni pu la. Ni ku Uwumbɔr aabɔnabtiib, ki yur waatutuliib ŋitakpal ki ku bi. N-yoonn mɔmɔk le m nan ban m kuun nimi ki kpaan nimi m chee, ke ukɔla aah kuuni waakoobi pu ki ŋani ufeen ni na, le naa kii. 35Lik, Uwumbɔr siir cha nimi. M tuk nimi la, naan ki kan mi ki nan saa bundaln ni ga bui ke, 'Tidindaan Uwumbɔr aanyoor bi un choo waayimbil ni na pu."'

will be added

X\