LUK 11

1Kitaak kibaa daal le Yesu nan bi nibaa chee ki bi mee Uwumbɔr. Waah mee u ti doo na, le waadidiliib ponn ni ubaa bui u, "Ndindaan, mɔk timi taah ga mee Uwumbɔr pu na, ke Jɔnn u nan muin binib nnyun ni na aah mɔk waadidiliib pu na." 2Le Yesu bui bi, "Ni yaa mee Uwumbɔr kan, ni bui ke 'Tite Uwumbɔr u bi paacham na, binib n san saayimbil; saanaan n dan. Bi li ŋani saageehn dulnyaa wee ni, ke baah ŋani pu paacham na. 3Tiin timi din aawiin aajikaar. 4Cha timi aatunwambir pinn timi; le ti mu di cha pinn binib bimɔk koo timi aataani ni na. Taa cha ti kan ntɔŋ. Nyan timi titunwambir ni."' 5Le Yesu ki bui bi, "Ni ponn ni ubaa yaa buen aajɔ do kinyeetaasiik kan, ki ti sil lipaal ki bui u, 'Njɔ, pinn mi ŋiboroboro kpin ŋitaa; 6njɔ ubaa chuun fuu ni ndo; m mu aa kpa tijiir tibaa m tii u.' 7Le aajɔ u bi kidiik ni na ga bui si, 'Taa muk mi. M ni maabilb dɔ kidiik ni la. Ki laŋ a. Maan ŋma fii ki tii si.' 8Naa ye kijɔteek pu, le u ga fii ki di tii si. Aa yaa gaŋni u ki gaŋni u ki muk u kan, nima le ga cha u fii ki di tii si saah ban pu na mɔmɔk. 9Nima pu na m tuk nimi la, ni li mee Uwumbɔr man, le u ga tii nimi. Ni li ban Uwumbɔr chee man, le ni ga kan. Ni li kpaa jaaleŋ man, le u ga piir tii nimi. 10Unii umɔk mee Uwumbɔr na, u ga tii u. Umɔk ban na, u ga kan. Unii umɔk kpaa jaaleŋ na, u ga piir tii u. 11Ni ponn ni ubaa aabo yaa mee si maab kan, aa ga di litakpal tii u uu? U yaa mee si ujan kan, aa ga di uwaa di tii u uu? 12U yaa mee si likoojiln kan, aa ga di unyoohn tii u uu? 13Nimi titunwambirdam yaa tee nyi ipiin i ŋan na ki tii nimi aabim kan, ŋmaninkaabaa Nite Uwumbɔr u bi paacham na, waan di Waafuur nyaan ki di tii binib bi mee u ki ban mu na aa?" 14Le uja u tiyaayar cha u ŋa ubir na bi nima chee. Le Yesu nyan tiyaayar ngbaan u ni. Le u len, kaa ki ye ubir. Le ni gar kinipaak ngbaan pam. 15Bi ponn ni bibaa mu bui ke Kinimbɔŋ bi yi u ke Beelsebul, u ye tiyaayar aayidaan na, le tii u mpɔɔn ke un ti nyan tiyaayar binib ni. 16Bibaa mu tɔŋ u ki ban ke un tun lijinjiir aatuln ki mɔk bi ke u ye Uwumbɔr Aanileekoo. 17Le u bee baah dak pu na, le ki bui bi, "Nnaan mubaa ni aanib yaa jaa tɔb kijaak kan, nnaan ngbaan ga bee yooli la. Lidichal libaa ni aanib mu yaa jaa tɔb kijaak kan, bi ga lir la. 18Ni len ke Beelsebul u ye tiyaayar aayidaan na le tii mi mpɔɔn ke m nyan tiyaayar binib ni. Tiyaayar aayidaan Kinimbɔŋ yaa ŋa kena kan, u jan ubaa kijaak la. Waanaan ga ŋa kinye aan ki sil? 19Ni yaa len ke tiyaayar aayidaan Beelsebul le tii mi mpɔɔn ke m nyan tiyaayar binib ni kan, ke ŋmaa tii nimi aanib mu mpɔɔn ke bin nyan tiyaayar binib ni? Nimi aanib aah ŋani pu na le ga mɔk ke ni kpa mbamɔn aan naa kpa. 20Mma kan, Uwumbɔr aapɔɔn pu le m nyan ni tiyaayar binib ni. Nima le mɔk ke Uwumbɔr aanaan fuu ni ni chee. 21"Liwɔkl u kpa tijaawan saakpen na yaa lik waadichal kan, ubaa aan bii waawan. 22Le un kpa mpɔɔn jer u na yaa lir u pu ki nyaŋ u kan, u ga fii waajaawan ti ter u na mɔmɔk, ki ji waawan. 23"Unii u kaa dii mi na kan, u ye maadin la. U mu kaa kuuni binib tii mi na kan, u yaar bi la." 24"Tiyaayar yaa nyan unii ni kan, ti ga li chuun gɔr nnyun aah kaa bi kipɔɔk ki ponn ni na, ki ban taah ga kal nin chee ki fuur na, kaan kan. Le ti ga len, 'Ti ga gir kun taah nyan unii u ponn ni na la.' 25Le ti ga gir ni, le ki nan kan ke bi toor taakookooyaan, le ni ŋan. 26Le ti ga buen ki joo ni tiyaayar tilule ti bir ki jer ti na. Le ti mɔmɔk ga koo unii ngbaan ponn ni, ki ga li bi u ponn ni, le ki ŋa u yooli ki jer waah nan bi njan na pu na." 27Yesu aah len kena na, le kinipaak ngbaan ponn ni upii ubaa len mpɔɔn pu, "Uwumbɔr aanyoor bi upii u ma si ki tii si libiil na pu." 28Le Yesu bui ke "Binib bi ŋun Uwumbɔr aaliin ki kii i na, Uwumbɔr aanyoor bi bima le pu." 29Kinipaak aah kuuni Yesu chee na le u bui ke, "Dandana aanib ye binib bi bir na la. Bi ban ke m mɔk bi lijinjiir aawan, aan bi nin gaa mi ki kii. Uwumbɔr aah nan ŋa lijinjiir aatuln ki ŋa waabɔnabr Jonah pu na, lituln limina aaboln le bi ga kan. Maan mɔk bi lijinjiir aawan niken. 30Uwumbɔr aah nan ŋa Jonah pu na, ni nan ye limɔkl le ki tii Ninefa aatiŋ aanib. Kena, waah ga ŋa min Unibɔn Aabo pu na, ni ga li ye limɔkl le ki tii dandana aanib ngbaan. 31Upiibɔr u nyan ni ŋŋaaŋgan aasikakl wɔb na, nan nyan ni dandar ke u nan ŋun Ubɔr Solomon aalan aaliin. Min u jer Solomon na bi du la, le naa ŋun maaliin. Bundaln Uwumbɔr ga ji binib tibɔr na, upiibɔr ngbaan aah nan ŋa pu na, nima le ga mɔk ke dandana aanib aabɔr bii. 32Jonah nan tuk Ninefa aatiŋ aanib Uwumbɔr aaliin, le bi kpeln baabimbin. Min, u jer Jonah na, le tuk dandana aanib Uwumbɔr aaliin, le baa kpeln baabimbin. Bundaln Uwumbɔr ga ji binib tibɔr na, Ninefa aatiŋ aanib aah nan kpeln baabimbin pu na, nima le ga mɔk ke dandana aanib aabɔr bii." 33"Unii yaa see karyaa kan, waan di u di bɔr, kaan di lisambil di chiŋ u pu. U ga di u tɔŋ tiwan paab la, le u li wiin binib bimɔk koo ni na, bi li waa. 34Aanimbil ye saawon aakaryaa la. Aanimbil yaa woln ke aa dii Uwumbɔr aasan kan, saabimbin mɔmɔk gbii nwiihn la. Aanimbil yaa kaa woln kan, saabimbin gbii mbɔmbɔɔn la. 35Li nyi aanimbil woln aan ŋaa woln. 36Saabimbin mɔmɔk yaa gbii nwiihn, kaa bɔɔn nibaa chee kan, aa ga li bi nwiihn ni mbamɔm. Ni ga li bi ke karyaa u wiin chain na bi, ki woln saah bi nin chee na." 37Le Yesu aah len kena ki ti doo na, le Farisii aanii ubaa bui u ke un dan udo ki nan ji tijikaar. Le u koo waadichal ni, ki kal ki ji. 38Le Farisii aanii ngbaan kan ke Yesu ji kaa ŋir uŋaal. Le ni gar u. 39Le Tidindaan Yesu bui u, "Nimi Farisii yaab, ni ŋir tiyir ni ŋisambil aapuwɔb mbamɔm, kaa ŋir ni ponn ni. Kena le ni ban ke binib bui ke ni ye bininyaan; nisui ponn ni mu gbiin kinaayuk aatuln ni titunwambir. 40Nimi bijɔrb, Uwumbɔr u nan naan tiwon na, uma le naan nisui mu. 41Di naah kpa tiwan ni na, ki di tii bigiim, ki di nibaa mu ki di tii bi. Ni yaa ŋa kena kan, tijɔŋ tibaa aan ki li bi ni chee. 42"Nimi Farisii yaab, tibɔbil bi ni pu; ba pu? ni yakr tikpifar kipiik ki nyan nibaa na ki di tii Uwumbɔr, kaa ŋani ni ŋan na, kaa gee Uwumbɔr. Ni ŋan ke ni li ŋani ni ŋan na, ki li gee Uwumbɔr, ki yakr nimi aawan mu ki di tii u. 43"Nimi Farisii yaab, tibɔbil bi ni pu; ba pu? ni gee ke ni kal bininyuun aakakaa chee mmeen aadir ni, ki gee ke binib doon nimi kinyaŋ ni. 44Tibɔbil bi ni pu. Ni naahn ŋikaakul ŋi bɔɔ na, ŋi binib chuun taar ŋi pu, kaa nyi na." 45Le Uwumbɔr aakaal aamɔmɔkr ubaa bui u, "Tiicha, saah len kena na, aa sii ti mu la." 46Le Yesu bui ke "Nimi Uwumbɔr aakaal aamɔmɔkb, tibɔbil bi ni mu pu. Ni di nkaal mu pɔɔ saakpen na, le ki di kpee Uwumbɔr aakaal pu, ki tuk binib ke bi li dii kena. Ni mu aa ter bi bin dii. 47Tibɔbil bi ni pu; ba pu? ni maa ŋikaakul ki tii Uwumbɔr aabɔnabtiib bi nan bi n-yaayoonn na. Niyajatiib le nan ku bi. 48Ni mu nyi baah nan ku bi pu na, ki mu kii baah nan ŋa pu na. Niyajatiib le nan ku bi. Ni mu maa ŋikaakul ki tii bi. 49Nima pu na le Uwumbɔr u kpa nlan na, nan bui, 'M ga tun bibɔnabtiib ni bitutuliib bi chee. Le bi ga ku ngem ki ŋa biken mu falaa.' 50Buyoonn dulnyaa wee nan piin ki joo cha na, binib nan ku Uwumbɔr aabɔnabtiib. Linikur ngbaan mɔmɔk pu le Uwumbɔr ga daa dandana aanib aatafal. 51Njan bi nan ku Abel, le ki ku bininyaan ki joo cha, ki ti pii Uwumbɔr aabɔnabr Sakaria, u bi nan ku u Uwumbɔr aadiik ni na. Mbamɔn, m tuk nimi la, linikur ngbaan mɔmɔk pu le Uwumbɔr ga daa dandana aanib aatafal. 52"Nimi Uwumbɔr aakaal aamɔmɔkb, tibɔbil bi ni pu. Naa mɔk binib Uwumbɔr aakaal mbamɔm. Nimi nibaa aa dii mu, le ki tee leŋ binib bi ban bin dii mu na." 53Yesu aah nyan nima chee na, le Uwumbɔr aakaal aamɔmɔkb, ni Farisii yaab kpak u kinikpakpak pam, ki baa u mbaan tibɔr ti wiir na pu, 54ki ban bin pen u nlan, bin ti kan waataani aan ki galn u.

will be added

X\