LUK 1

1Maaninkpil Teofilus, binib pam nan pɔɔ bibaa ki ŋmee kigbaŋ ponn ni tibɔr ti nan ŋa tikaasisik ni na. 2Binib bi kan tibɔr ngbaan aah piin ki ti doo pu na, bi mooni ti, ki tuk timi. Le bi ŋmee baah tuk timi pu na. 3Min Luk, m mu bee mbamɔm tibɔr ngbaan aah piin pu, ki ti doo pu na. Nima le m dak ke ni ŋan m mu ŋmee ti, taah piin ki ti saa pu na, ki tii si, 4aan aa mu bee baah tuk si tibɔr ti na aabamɔn. 5Buyoonn Herod nan ye Judea aatiŋ aabɔr na, le Uwumbɔr aatotoor ubaa nan bi, bi yi u ke Sakaria. U nan ye Abija aamaal ponn ni aanii la. Upuu aayimbil nan ye Elisabet. U mu nan ye Uwumbɔr aatotoor Aaron aamaal ponn ni aanii ubaa la. 6Sakaria ni upuu mɔmɔk nan ye bininyaan Uwumbɔr chee, ki dii waakaal mɔmɔk, ki ŋani waah ban pu na, kaa kpa taani ubaa. 7Baa nan kpa ubo. Elisabet ye upiiŋoob la. Bi mɔmɔk mu por la. 8Uwumbɔr aatotoortiib aakaal aah dii pu na, le bi lee Sakaria, un ti koo Uwumbɔr aadiik ni, ki ti see tubalee. Waayoonn aah fuu ni na, le u koo Uwumbɔr aadiik ni, un ti tun lituln limina. 10Buyoonn u bi seer tubalee ngbaan tii Uwumbɔr na, le kinipaak saakpeŋ bi lipaal, ki mee Uwumbɔr. 11Le u kan Tidindaan Uwumbɔr aatuun baah seer tubalee libimbiln li paab na aaŋaaŋgii wɔb. 12Sakaria aah kan u na, le ni muk u, le u san ijawaan. 13Le Uwumbɔr aatuun ngbaan bui u, "Sakaria, taa san ijawaan. Uwumbɔr ŋun saameen a. Aapuu Elisabet ga ma ubijabo, ki tii si. Le aa ga yin u ke Jɔnn. 14U yaa ma u kan, le aa ga li kpa mpopiin pam. Binib pam mu ga li mɔɔni. 15U ga li ye uninyuun Tidindaan Uwumbɔr chee. Waan nyu ŋisubil aadaan, ki mu aan nyu ndaan mubaa. U ga gbiin Uwumbɔr Aafuur nyaan buyoonn bi ga ma u na, ki li joo cha. 16U ga giin nimi Israel yaab pam bin ki gir ti dii Bidindaan Uwumbɔr. 17U ga li kpa Uwumbɔr Aafuur nyaan, ni mpɔɔn, ke Uwumbɔr aabɔnabr Elaija aah nan kpa pu na, ki ga lulni Tidindaan pu nsan. U ga cha bijab li gee baabim. U ga cha binib bi kaa kii Uwumbɔr aamɔb na li kpa nlan, bin ti labr, ki li dii bininyaan aah dii pu na. U ga toor binib, bi li ye binib bi gor ki kii Tidindaan na." 18Le Sakaria bui Uwumbɔr aatuun ngbaan, "M por a, mpuu mu por a; m ga ŋa kinye ki bee ki ni ga sil ŋa saah len pu na." 19Le Uwumbɔr aatuun bui u, "M ye Gabriel u si Uwumbɔr aanimbiin ni na. U tun ni mi ke m tuk si tibɔnyaan tee. 20Ni yaa nan ŋeer kan, maah len pu na ga gbiin. Saah kaa pak maah len pu na, le aa ga ŋa ubir, kaan ki ŋma len tibɔr ki ti saa buyoonn tiwan nimina ga ŋa na." 21Le kinipaak ngbaan si lipaal, ki si kii buyoonn Sakaria ga nyan ni Uwumbɔr aadiik ni na. U yunn kaa nyan ni, le ni gar bi pam. 22Waah nyan ni na, waa ŋma len bi chee tibɔr. Nima le cha bi bee ke u kan lijinjiir aawan Uwumbɔr aadiik ni. Le u beenin len libir, kaa ŋma len tibɔr. 23Waawiin aah ye pu, un tun lituln Uwumbɔr aadichal ni na, aah doo na, le u kun. 24Ni bi ki cha, le upuu Elisabet dek lipuul, ki bɔr ubaa iŋmal iŋmu, 25le ki bui ke, "Tidindaan Uwumbɔr lik maah bi pu na la, le ki ŋa mi tibulchin kena ki tii mi, ki nyan mi inimɔɔn ni." 26Lipuul aah ŋa iŋmal iluub aapuul na, le Uwumbɔr tun ni waatuun Gabriel un buen Galilee aatiŋ kibaa ni, bi yi ki ke Nasaret, 27ke un buen usaapɔɔn ubaa chee, bi yi u ke Mari. Waa nyi uja. Bi nan puu ke bi ga tii u tichal. Bi yi uchal Josef, u ye Ubɔr David aamaal ponn ni aanii ubaa la. 28Le Uwumbɔr aatuun ngbaan fuu ni Mari chee le ki doon u, le ki bui u, "Tidindaan Uwumbɔr ŋa si tibulchin saakpen a, ki bi aa chee, ki ŋa tinyoor ki ŋa aa pu, ki jer waah ŋa bipiib mɔmɔk pu na." 29Waah len kena na, le ni gar Mari saakpen. Le u dakl lik waah len pu na aatataa. 30Le u ki bui u, "Mari, taa san ijawaan. Uwumbɔr ŋa si tibulchin la. 31Aa ga dek lipuul, ki ma ubijabo ki yi u ke Yesu. 32U ga li ye uninyuun la. Bi ga yi u Uwumbɔr u kaa kpa ŋeen aatɔ na Aajapɔɔn. Tidindaan Uwumbɔr ga tii u uyaja Ubɔr David aanaan. 33U ga li ye uyaja Jakob aayabitiib aabɔr n-yoonn mu kaa kpa ndoon na. Waanaan aan doo." 34Le Mari baa Uwumbɔr aatuun ngbaan ke, "Maah kaa nyi uja na, m ga ŋa kinye ki ma ubo?" 35Le u bui u, "Uwumbɔr Aafuur nyaan ga sunn ni aa pu. Uwumbɔr u kaa kpa ŋeen aatɔ na aapɔɔn ga cha aa dek lipuul. Nima pu na le saah ga ma ubo u na ga li ye chain. Bi ga yi u ke Uwumbɔr Aajapɔɔn la. 36Lik, aana aabo Elisabet, u por na, u mu pil ubijabo aapuul. Baah nan yi u ke upiiŋoob na, kpa iŋmal iluub aapuul la; 37nibaa aa pɔɔ Uwumbɔr chee." 38Le Mari bui Uwumbɔr aatuun ngbaan, "M ye Tidindaan Uwumbɔr aanaagbiipii la. Saah len pu na, u cha ni ŋa kena." Le Uwumbɔr aatuun ngbaan buen. 39N-yoonn ngbaan le Mari gor mala ki buen ŋijoo ponn ni, le ki ti buen kitiŋ kibaa ni, ki bi Juda aatiŋ ponn ni, 40le ki koo Sakaria do, ki doon upuu Elisabet. 41Elisabet aah ŋun idoon na, le waabo fii uponn ni. Le Uwumbɔr Aafuur nyaan gbiin Elisabet. 42Le u len mpɔɔn pu ki bui Mari, "Uwumbɔr ŋa tinyoor ki ŋa aa pu ki jer waah ŋa bipiib mɔmɔk pu na, ki ŋa tinyoor ki ŋa ubo u bi aaponn ni na mu la. 43Uwumbɔr nyuŋ mi u ye ugiin na, ki cha Tidindaan aana dan nan mann mi. 44Ntafal aah ŋun saadoon na, le maabo fii mponn ni, waah kpa mpopiin pu na. 45Si u gaa Tidindaan Uwumbɔr ki kii na, u ŋa tinyoor ki ŋa aa pu la, ki ga ŋa waah nan tuk si ke u ga ŋa pu na." 46Le Mari bui ke "M nyuŋni Tidindaan Uwumbɔr nsui ni la. 47M kpa mpopiin saakpen, Uwumbɔr u ye maaŋmaŋmardaan na pu la. 48U teer mi, u ye waanaagbiipiigiin na. Dandana ki joo cha, binib mɔmɔk ga len ke Uwumbɔr ŋa tinyoor ki ŋa m pu la, 49ba pu? Uwumbɔr u kpa mpɔɔn na tun litukpaan ki tii mi. Waayimbil ye chain la. 50Binib bi san u na, u san bi kinimbaak, ni biyabitiib, ni biyabitiib ponn ni ki joo cha. 51U mɔk binib waapɔɔn, ki jenn kalmbaanidam bi dak ke bi ye bininyuun na. 52U nyan bibɔrkpaan baanaan ni, ki nyuŋ bigiim la. 53Binib bi nkon joo bi na, u tii bi tijikaar nyaan, bin ji bab. U cha biwankpadam chuun ni iŋaalpeel. 54Waah nan puu tipuul ti ki tii tiyajatiib na, u ŋa kena la, ki ter waatutuliib Israel yaab. 55U teer ki san Abraham ni uyabitiib kinimbaak n-yoonn mu kaa kpa ndoon na la." 56Tɔ, le Mari nan bi Elisabet do iŋmal itaa, le ki gir kun. 57Le ni ŋeer Elisabet ma ubo. Le u ma ubijabo. 58Le udoyaab ŋun ke Tidindaan Uwumbɔr san u kinimbaak saakpen. Le u ni bi kpaan ki mɔɔni. 59Waabo aawiin iniin daal, le bi dan bi nan gii uchakpaln, le ki ban bin yi u ke Sakaria, ke baah yi ute pu na. 60Le una aa kii, ki bui ke bi ga yi u Jɔnn la. 61Le bi bui u, "Unii ubaa aa kpa liyimbil limina nimi aamaal ponn ni." 62Le bi di biŋaal len ute chee, ki baa u ke u ban ke bin yi waabo kinye. 63Le u bui bi ke bin tii u kigbaŋ. Baah tii u na, le u ŋmee ke, "Waayimbil le ye Jɔnn." Le ni gar bi mɔmɔk pam. 64Libuul ngbaan ni le Sakaria aalambil lɔkr. Le u piin ki bi len, ki pak Uwumbɔr. 65Le ijawaan chuu bidoyaab mɔmɔk. Le Judea aatim mumɔk bi ŋijoo ponn ni na aanib ŋun tibɔr ngbaan. 66Le binib bimɔk ŋun ti na, ni ŋa bi ilandak. Le bi baa ke, "Ubo ngbaan ga li ye ba aaniboln?" Le Tidindaan Uwumbɔr aaŋaal mu bi u pu. 67Le Uwumbɔr Aafuur nyaan gbiin Sakaria, u ye Jɔnn aate na, le ki cha u len Uwumbɔr aaliin: 68"Cha ti pak Tidindaan u ye timi Israel yaab Aawumbɔr na. U dan nan ter waanib, ki gaa bi lii, 69ki tii timi unii u ye timi aaŋmaŋmardaan ki kpa mpɔɔn, ki ye waatutuln Ubɔr David aamaal ponn ni aanii ubaa na la. 70U nan cha waabɔnabtiib chain len kena n-yaayoonn na ki joo cha. 71U nan puu tipuul ke u ga nyan timi timi aadim aaŋaal ni, ni bimɔk nan timi na aaŋaal ni, ti ŋmar. 72U nan len ke u ga san tiyajatiib kinimbaak, ki teer waah puu tipuul ti ye chain na. 73U nan puu tipuul ki tii tiyaja Abraham, 74ke u ga nyan timi timi aadim aaŋaal ni, aan ti dii u ki taa li san ijawaan, 75ki li bi chain, ki li kpa mbimbin nyaan u chee n-yoonn mɔmɔk. 76"Si, maabo, bi ga yi si Uwumbɔr u kaa kpa ŋeen aatɔ na aabɔnabr. Aa ga lulni Tidindaan pu nsan, ki toor nsan tii u, 77ki tuk waanib ke u ga di cha baatunwambir ki pinn bi, bin ŋmar; 78ba pu? timi Aawumbɔr kpa tibulchin, ki san timi kinimbaak. U yaa gaa timi ke ti ŋmar kan, ni ga li bi ke nwiin aah puuni pu na. 79Ni ga woln binib bi bi mbɔmbɔɔn ni ki san nkun ijawaan na, ni ga mɔk timi nsan mu ga tii timi nsuudoon na." 80Le ubo ngbaan muun, ki dii Uwumbɔr ni usui mɔmɔk, le ki nan bi kipɔɔk ni, ki ti saa buyoonn u piin ki tuk Israel yaab Uwumbɔr aaliin na.

will be added

X\