JEMS 1

1Min Jems, u ye Uwumbɔr ni Tidindaan Yesu Kristo aatutuln na, m dooni Uwumbɔr aanib bi yaa ki bi itingbaan mɔmɔk ni na. 2Nnaabitiib, ni yaa kan ntɔŋ mɔmɔk aaboŋ kan, ni cha ni mɔmɔk li ye mpopiin ni chee. 3Ba pu? ni bee ke ni yaa kan ntɔŋ, kaa koo mu ni kan, nima le tii nimi limɔr. 4Ni mu li nyi man ki li kpa limɔr ki ti saa naadoon, ki taa di cha, aan ki li ye binib bi ŋan doo na, ki taa li kpa taani ubaa, ki taa lir. 5Ni ponn ni ubaa yaa lann nlan kan, un mee Uwumbɔr, le u ga tii u; ba pu? Uwumbɔr tii binib mɔmɔk saakpen, kaa jinni ubaa inimɔɔn. 6U mu yaa mee Uwumbɔr kan, u li pak ke u ga kan, ki taa joo beeni; ba pu? unii u joo beeni na, u naahn ke libuln aah daar kan, nnyusaakpem aanyunkpuŋ feei pu na. 7Udaan taa dak ke u ga kan nibaa Uwumbɔr chee. 8Ulandak aa si tiwanbaan pu, u saa labr, ki nya du, ki ti saa du. 9Tɔ, Uwumbɔr aah nyuŋ tinaabitiib bi ye bigiim na, bi li kpa mpopiin. 10Waah sunn tinaabitiib bi ye biwankpadam na taab na, bi mu li kpa mpopiin; ba pu? bi ga jer ke mmoopuun aah gbaar mala pu na. 11Nwiin yaa puu ki toŋ kan, le timoor ga yɔl, le mmoopuun gbaar, kaa ki kpa kinyaan. Kena le biwankpadam mu ga kpo, ki cha baawan mɔmɔk. 12Tɔ, unii u kan ntɔŋ ki kpa limɔr na, Uwumbɔr aanyoor bi u pu la. Ba pu? u yaa kan ntɔŋ ki si mbamɔm kan, u ga kan ipiin i ye limɔfal li Uwumbɔr nan puu tipuul ke u ga tii binib bi gee u na. 13Unii yaa kan ntɔŋ kan, u taa len ke Uwumbɔr le tɔŋ u; ba pu? Uwumbɔr aa gee titunwambir, ki mu aa tɔŋni unii ubaa. 14Unii aakpeek yaa cha u ban un nyan Uwumbɔr aasan ponn ni ki tun usui aah gee pu na kan, nima le cha u kanni ntɔŋ. 15Kikpeek yaa dek lipuul kan, ki ma titunwambir la; titunwambir yaa chikr kan, ti ma nkun la. 16Nnaabitiib bi m gee bi na, ni taa ŋmann nibaa. 17Ipiin imɔk ŋan ki ye mbamɔm na, i nyan ni paacham la. I nyan ni Tite Uwumbɔr u nan naan iwiihn imɔk bi paacham na chee. Uma le aa kpelni ke nwiin ni uŋmal aah kpelni pu na, kaa kpa mbɔmbɔɔn. 18U tii timi waaliin i ye mbamɔn na, ki ŋa timi waabim. Waageehn le na. U ban ti li jer waah naan tiwan ni na mɔmɔk. 19Nnaabitiib bi m gee bi na, ni bee nimina la. Ni ŋan ke unii mɔmɔk gee ke un pel, ki taa len mala, ki taa gee liŋuul mala; 20ba pu? binib aaŋuul aa tun Uwumbɔr aatuln nyaan. 21Nima pu na, ni di cha titunwambir ni tiwan nimɔk kaa ŋan na, ki li bi suuna, ki gaa iliin i Uwumbɔr di ŋa nisui ni na; iliin ngbaan ga cha ni ŋmar. 22Ni li ŋani waaliin aah len pu na. Ni yaa pel, ki yaa kaa ŋani kan, ni ŋmanni nibaa la. 23Unii yaa pel iliin ngbaan ki yaa kaa ŋani yaah len pu na kan, u bi le ke unii u lik kinimbilikr ni, ki waa unimbil wɔb aah bi pu na. 24Ba pu? u kan unimbil wɔb aah bi pu na, le ki siir. Libuul ngbaan ni le u sunn waah bi pu na. 25Tɔ, unii yaa dakl lik nkaal mu ye mbamɔm ki gaa timi lii na, ki yaa beenin dii mu kan, ki yaa kaa ye unii u pel ki sunn na kan, u yaa ye unii u ŋani mu aah len pu na kan, Uwumbɔr ga ŋa tinyoor ki ŋa udaan ngbaan aatuln pu. 26Unii yaa len ke u dii Uwumbɔr aasan, u yaa kaa chuu ulambil kan, u ŋmanni ubaa la. Waa dii le na. Ni ye fam la. 27Unii yaa ter nkpobim ni bikpopiib baabɔr ni kan, ki yaa joo ubaa chain, ki di cha titunwambir mɔmɔk kan, uma le dii Tite Uwumbɔr mbamɔm, ki bi chain Uwumbɔr aanimbil ni.

will be added

X\