HIIBRU YAAB 9

1Uwumbɔr aah puu njan aapuul ki tii bi na, u mɔk bi baah ga doon u pu na. Bi nan kpa kidiik ki bi ga doon u ki ponn ni, binib nan maa ki na. 2Bi ŋa libɔkl lipepel libaa wɔb, ki yin li ke lipepel chain. Karyaa ni teebl ni boroboro bi tii Uwumbɔr na, nan bi li ponn ni. 3Bi di likekeln ki gii libɔkl ponn ni lipepel libaa wɔb, ki yin li ke chain chain. 4Salmaa aabimbiln nan bi ni ponn ni. Libimbiln ngbaan paab le bi see tubalee ki tii Uwumbɔr. Uwumbɔr aakaal aah nan bi dakaa u ponn ni na, mu nan bi ni ni. Bi nan di salmaa aakur le ki di biin dakaa ngbaan pu. Tijikaar ti bi yi ti ke mana na, nan bi salmaa aasambil ponn ni, dakaa ngbaan ponn ni. Aaron aadaabil li nan puun nsupuun na mu nan bi u ponn ni. Uwumbɔr aakaal aah ŋmee ŋitakpapapan ŋilee ŋi pu na, mu nan bi u ponn ni. 5Tiwanaankaan nilee bi yi ni ke cherubim na mu nan bi dakaa ngbaan paab. Nima chee le Uwumbɔr nan mɔk Israel yaab waah wiin chain pu na. Tiwanaankaan ngbaan nan kpa ifeen i biin dakaa ngbaan aabiil pu na, Uwumbɔr aah san bi kinimbaak nin chee na. Taan ŋma len tiwan nimina mɔmɔk aatataa nibaa nibaa dandana wee. 6Baah di tiwan nimina mɔmɔk ki di siin kena na, le bitotoortiib koo mɔb aadiik ni iwiin mɔmɔk, bin ti tun lituln tii Uwumbɔr. 7Utotoorninkpil baanja le koo ni lipepel chain chain li bi libɔkl ngbaan ponn ni na. U koo ni nima chee libiln mɔmɔk mfim mbaa baanja. U yaa koo ni kan, see u joo ni nsin, un ti tii Uwumbɔr, uma ubaa aatunwambir ni binib aatunwambir pu. 8Uwumbɔr Aafuur nyaan mɔk timi ke mɔb aadiik ngbaan aah nan laa bi na, binib aa nan kpa nsan bin koo ni lipepel chain chain ponn ni. 9Libɔkl ngbaan le nan ye Yesu aabɔr aamɔkl ki tii bi. Libɔkl ngbaan ponn ni, le bi di ipiin ni tiwankur ki toor kitork ki tii Uwumbɔr. Naa nan cha bisui doon titunwambir pu. 10Nkaalkpok ngbaan mɔk bi tijikaar ni tiwanyukaan ni kɔ na, ni nin kaa kɔ na, ki mɔk bi baah ga finn bibaa ki ŋa chain pu na. See bi dii kena ki nan saa buyoonn Yesu aah joo ni nsanpɔɔn mu ŋan na. 11Dandana wee Kristo fuu ni a, ki ye utotoorninkpil, ki joo ni nsan nyaan mu bi nan len ke mu ga fuu ni na. Waa koo ni libɔkl li binib ŋa li dulnyaa wee ni. U dii lipepel li jer dulnyaa wee aabɔkl ngbaan, 12le ki koo lipepel li ye chain na paacham, mfim mbaa kookoo. Uma ubaa aasin pu le u nan gaa timi lii n-yoonn mu kaa kpa ndoon na, naa ye tiwankur aasin pu. 13Bi nan di iŋoob ni inaaja aasin ki di yɔk yɔk binib bi kaa ye chain na pu, ki di unaasabo aafatan ki di gbaa gbaa bi pu. Le ni ŋa tiwon chain. 14Nimina yaa ŋa tiwon chain kan, Kristo aasin ga ter timi, ki jer kena. Uwumbɔr Aafuur nyaan mu bi n-yoonn mu kaa kpa ndoon na aapɔɔn pu, u nan di ubaa ki toor kitork ki kaa kpa ngalm na, ki tii Uwumbɔr. Waasin ga nyan titunwambir ti ga ku timi na tisui ni, aan ti dii Uwumbɔr u ye limɔfaldaan na. 15Yesu aah ŋa kena na, le Uwumbɔr puu tipuupɔln ki tii timi. Nima pu, le binib bi Uwumbɔr yin bi na ga kan lifaal li kaa kpa ndoon na, waah puu tipuul ti ke u ga tii bi na. Binib bi Uwumbɔr nan puu njan aapuul ki tii bi na, bi tun titunwambir la. Yesu aah kpo na, nima le Uwumbɔr di cha pinn bi, ki gaa bi lii. 16Unii yaa yakr waafaal ki laa kal kan, ubaa aan ŋma ji lifaal ngbaan, see bi puen mɔk ke u kpo. 17Buyoonn u laa beenin bi na, ubaa aan ŋma ji lifaal ngbaan, see u kpo. 18Nima pu na, Uwumbɔr aah nan puu tipuul ti njan na, bi nan di nsin le ki mɔk ke tipuul le bi, bi ni Uwumbɔr aakaasisik ni. 19Njan le Moses tuk binib mɔmɔk baah ga dii Uwumbɔr aakaal mɔmɔk pu na, le ki nin di tikumaman ni tifar, ki di ŋa inaabi ni iŋoob aasin, ni nnyun ni, le ki di yɔk yɔk Uwumbɔr aakaal aagbaŋ pu, ni binib mɔmɔk pu, 20le ki bui bi, "Uwumbɔr aah puu tipuul ti ki tii nimi na aasin le na," 21le ki di nsin ngbaan ki yɔk yɔk libɔkl pu, ni baah joo tiwan nimɔk ki tun lituln ki tii Uwumbɔr na pu. 22Nkaal ngbaan aah dii pu na, bi yaa nan ban bin ŋa tiwan chain kan, see bi di nsin ki yɔk yɔk ni pu le ki ŋa ni chain. Nsin yaa kaa nyan kan, Uwumbɔr aan di cha pinn titunwambir. 23Uwumbɔr aabɔkl ni tiwan nimɔk nan bi li ponn ni na ye paacham aawan aanaŋ la. Le bi di tiwankur aasin ki ŋa ni mɔmɔk chain. Paacham aawan bamɔnn le ban nsin mu jer tiwankur aasin na, aan ki ŋa chain. 24Kristo aa koo ni lipepel chain li ye paacham yaan aanaŋ li binib maa li na, ponn ni. Paacham le u koo ni, ki si timi aasisiiyaan Uwumbɔr aanimbiin ni. 25Juu yaab aatotoorninkpil di nsin mu kaa ye uma ubaa aasin na, ki koo ni lipepel chain libiln mɔmɔk. Yesu Kristo di ubaa ki toor kitork mfim mbaa baanja. 26U yaa ba nan di ubaa toor kitork libiln mɔmɔk kan, u ba ga ji falaa n-yoonn mɔmɔk, buyoonn dulnyaa wee aah piin na, ki joo cha na. Naah ye pu na, u fuu ni buyoonn ni ŋeer na, ki di ubaa ki toor kitork mfim mbaa, un ti kuln titunwambir. 27Uwumbɔr siin ke binib ga kpo mfim mbaa, nee aapuwɔb le u ga ji bi tibɔr. 28Kristo mu di ubaa ki toor kitork mfim mbaa, binib pam aatunwambir pu. U ga ki fuu ni leelee. Naa ye titunwambir pu le u ga ki fuu ni. U ga fuu ni aan binib bi lik waagirndaal na ŋmar.

will be added

X\