1 Tɔ, Uwumbɔr aah puu tipuul ke u ga tii timi lifuur na, nsan laa beenin bi ke ti kan li. Nima na, ni li nyi man, ubaa taa lann lifuur ngbaan. 2 Ti mu ŋun tibɔnyaan tee ke binib ngbaan aah ŋun ti pu na. Bi ŋun ti, kaa gaa kii ti, nima le tibɔnyaan ngbaan aa ŋa bi tinyoor. 3 Timi bi gaa Yesu ki kii na le kan lifuur ngbaan. Uwumbɔr nan len ke "M nan gee liŋuul bin kaa gaa mi ki kii na pu, ki puu tipuul ke baan kan lifuur m chee." Waah naan dulnyaa wee doo na, waatuln doo le na. 4 Iwiin ilule daal aabɔr ŋmee Uwumbɔr aagbaŋ ni ke "Uwumbɔr nan fuur iwiin ilule daal ki di cha waatuln mɔmɔk la." 5 Ni ki ŋmee ke "Baan kan lifuur m chee." 6 Binib bi puen ŋun tibɔnyaan tee na, baa gaa ti ki kii, nima le baa kan lifuur ngbaan. Binib biken mu ga kan lifuur ngbaan. 7 Nima pu na le Uwumbɔr ki siin nwiin mu bi ga kan lifuur ngbaan na, ki yi nwiin ngbaan ke "Din." Binib ngbaan aa kan lifuur ngbaan; le ŋibin pam jer, le David ŋmee Uwumbɔr aagbaŋ ni ke naah nan puen ŋmee pu na, ke "Ni yaa ŋun Uwumbɔr aaneel din kan, ni taa cha nitafal li pɔɔ." 8 Tɔ, Joshua yaa ba tii Israel yaab lifuur ngbaan kan, Uwumbɔr aa ba ga ki siin nwiin muken. 9 Naah bi pu na, lifuur le gur ki tii Uwumbɔr aanib. 10 Unii u kan lifuur Uwumbɔr chee na, u di cha uma ubaa aatuln la, ke Uwumbɔr aah di cha waatuln pu na. 11 Nima pu na, cha tinimbil li man ti kan lifuur ngbaan, ubaa taa yii Uwumbɔr aamɔb ki lir, ke Israel yaab aah lir pu na. 12 Uwumbɔr aaliin fu, ki kpa mpɔɔn, ki ka ki jer kijuk ki ka ŋipepel mɔk ŋilee na, ki koo ni unii aasui ni, ni waawiin ni, ki lik usui ni aabɔbɔrkaan aah bi pu na, ki mɔk waalandak aah bi pu na, ki lik usui aah ban pu na, ke ni ŋan aan naa ŋan. 13 Tiwan nibaa aa bi ki bɔr Uwumbɔr. Tibɔr mɔmɔk nyan mpaan pu, ki dɔ ti ŋmeen unimbil ni. Uma le ti ga len timi aabɔr ki tuk u. 14 Tɔ, ti kpa utotoorninkpikpaan u bi Uwumbɔr do na. U ye Uwumbɔr Aajapɔɔn Yesu la. Nima pu na cha ti li beenin dii u ki taa di waasan di lii. 15 Utotoorninkpil ngbaan ga ŋma san timi kinimbaak timi aafalaa ponn ni. U kan ntɔŋ aaboŋ aaboŋ ke taah kan ntɔŋ mɔmɔk pu na. Uma le aa tun titunwambir tibaa. 16 Timi aatotoorninkpil aah bi kena na, cha ti li kpa lipoobil ki dan Uwumbɔr u kpa tibulchin na aabɔrjal chee, aan u san timi kinimbaak, ki ter timi buyoonn ti ban nterm na.
