HIIBRU YAAB 2

1Nima pu na, ni ŋan ke titafal li bi tibɔnyaan ti ti ŋun ti na ponn ni, ti taa di ti lii. 2Iliin i Uwumbɔr nan cha waatuuntiib tuk waanib na, i sil mbamɔm la. Unii umɔk yii iliin ngbaan ki ŋa yaah kɔ pu na, u kan ntafadaan waah ŋeer pu na. 3Nima pu na ti yaa yii ŋŋmarkpaan ngbaan aaboln kan, taan nyan ntafadaan ni. Tidindaan ubaa le nan pue tuk binib ŋŋmarm ngbaan aabɔr. Le binib bi ŋun na tuk timi, ki mɔk timi ke ti gbii la. 4Uwumbɔr mu cha bi tun lijinjiir aatun aaboŋ aaboŋ waapɔɔn pu, ki tii bi Waafuur nyaan aapiin waah gee pu na. Nima le mɔk ke bi len mbamɔn. 5Ti len dulnyaa u choo na aabɔr la. Uwumbɔr aa di dulnyaa ngbaan ki di ŋa waatuuntiib aaŋaal ni. 6Ni ŋmee Uwumbɔr aagbaŋ ni: "Unibɔn ye ba? le aa teer u; binib ye ba? le aatafal bi bi ni. 7Aa sunn bi taab ki cha saatuuntiib jer bi siib. Aa nyuŋ bi ki tii bi lisil saakpen, ki ŋa bi saawanaankaan mɔmɔk aayidam, 8ki cha tiwan mɔmɔk kii baamɔb." Tɔ, saah cha tiwan mɔmɔk kii baamɔb na, tiwan ni kaa kii baamɔb na aa ki gur. Ti mu aa kee kan tiwan mɔmɔk kii baamɔb; 9ti kan Yesu la. Uwumbɔr sunn u taab ki cha waatuuntiib jer u siib, aan u ti kpo ki tii binib mɔmɔk, uma Uwumbɔr aanimbaasaln pu. Dandana wee ti kan ke waah jin nkun aafalaa na, le Uwumbɔr nyuŋ u ki tii u lisil saakpen. 10Uwumbɔr u nan naan tiwan mɔmɔk ke ni pak u na, ni ŋeer u ke un cha Yesu ji falaa, ki li joo ni Uwumbɔr aabim bi wiir na waanaan ni. U pu le bi ŋmar. Waah ji falaa pu na, nima le cha u ye timi aaŋmaŋmardaan bamɔnn. 11U ŋani binib chain la. U ni binib bi u ŋani bi chain na, bi mɔmɔk kpaan te ubaa la. Nima le inimɔɔn aa joo u ke u yin bi unaabitiib, 12le ki len ke "Uwumbɔr, m ga tuk nnaabitiib saabɔr. M ga gaa ilahn ki pak si saanib aakaasisik ni," 13ki ki len: "M ga gaa Uwumbɔr ki kii la," ki ki len: "Lik, m ni mbim bi Uwumbɔr tii mi bi na sɔ." 14Tɔ, timi waabim aah ye binibɔm pu na, nima le u mu kpaln unibɔn, ke un ti kpo, ki ŋa Kinimbɔŋ u nan kpa nkun aapɔɔn na yooli, 15le ki gaa binib bimɔk san nkun ijawaan na ki lii; baayoonn mɔmɔk nkun aajawaan nan joo bi. 16Ni ye mbamɔn, naa ye Uwumbɔr aatuun le u kpaln. Abraham aayabil le u kpaln. 17Ni ŋan ke u naahn unaabitiib tiwan mɔmɔk ponn ni, aan ki li ye utotoorninkpil u san timi kinimbaak, ki tun Uwumbɔr aatuln mbamɔm, ki di ubaa ki toor kitork aan Uwumbɔr di cha pinn waanib baatunwambir. 18Uma ubaa le kan ntɔŋ ki ji falaa, nima le u ga ŋma ter binib bi kan ntɔŋ na.

will be added

X\