HIIBRU YAAB 10

1Binib bi nan dii Moses aakaal na aa kan tinyoor ti Yesu joo ni na mbamɔm. Bi kan tinyoor ngbaan siib. Bi toor kitork ŋibin mɔmɔk la. Kitork ngbaan aa ŋa bi binib bi ŋan doo na. 2Nkaal ngbaan yaa ba nyan Uwumbɔr aadidiliib titunwambir ni kan, baalandak aa ba ga ki li muk bi titunwambir pu. Bi mu aa ba ga ki toor kitork ngbaan. 3Naah ye pu na, kitork ngbaan teer bi baatunwambir pu, libiln mɔmɔk. 4Inaaja aasin, ni iŋoob aasin aa ŋma nyan titunwambir binib aasui ni. 5Nima pu na, Yesu Kristo aah nan ban un dan dulnyaa wee ni na, u bui ke "Uwumbɔr, saa ban ke binib di tiwankur ni tijikaar ki toor kitork ki tii si. Aa naan tiwon tii mi, ke m di ti, ki toor kitork ki tii si. 6Saa ban ke binib toor kitork, ki di see mmii, ki tii si, kaa ban ke bin toor kitork titunwambir pu. 7Le m bui ke 'Uwumbɔr, m fuu ni ke m ŋa saageehn, ke baah ŋmee maabɔr pu saagbaŋ ni na."' 8Njan, le u bui Uwumbɔr, "Saa ban bin di tiwankur ni tijikaar ki toor kitork tii si, kaa ban ke bin toor kitork ki see mmii tii si, kaa ban ke bin toor kitork titunwambir pu." Moses aakaal aah dii pu na, bi toor kitork kena la. Naa piir Uwumbɔr aasui. 9Le Yesu Kristo bui Uwumbɔr, "M fuu ni ke m ŋa saageehn." Yesu Kristo aah di ubaa toor kitork na, Uwumbɔr gaa waatork, le ki kuln kitorkpok ngbaan. 10U ŋa Uwumbɔr aageehn, le ki di ubaa toor kookoo aatork mfim mbaa, le ki ŋa timi waanib. 11Juu yaab aatotoortiib mɔmɔk tun lituln iwiin mɔmɔk, ki tii Uwumbɔr. N-yoonn mɔmɔk, le bi toor kitork kichachaan ki tii u. Kitork ngbaan aan ŋma nyan titunwambir binib aasui ni. 12Yesu Kristo toor kookoo aatork titunwambir pu mfim mbaa, le ki kal Uwumbɔr aaŋaaŋgii wɔb. 13U bi nima ki kii bundaln Uwumbɔr ga nyaŋ waadim ki di bi ŋa utaapɔtaan ni na. 14Kitorkbaan ngbaan pu, le u di Uwumbɔr aanib ki ŋa bi binib bi ŋan doo na, n-yoonn mu kaa kpa ndoon na. 15Uwumbɔr Aafuur nyaan mu tuk timi kena la. Mu nan bui 16ke Tidindaan Uwumbɔr len ke "Maah ga puu tipuul ti, ki tii bi n-yoonn mu choo na le ye ke m ga di maakaal ki di ŋa bisui ni, ki ŋmee mu baalandak ni." 17ki ki len ke "Maan teer baatunwambir, kaan ki teer baah bii maakaal pu na." 18Tɔ, Uwumbɔr yaa di cha pinn titunwambir kan, baan ki toor kitork ti pu. 19Nnaabitiib, Yesu aasin pu, le ti kpa lipoobil ke ti koo ni lipepel chain ponn ni, Uwumbɔr aah bi nin chee na. 20Yesu aah di ubaa ki toor kitork ki tii Uwumbɔr na, u nyan tiwan nimɔk bi ti ni Uwumbɔr aakaasisik ni na, ki tii timi nsanpɔɔn mu ye nsan bamɔnn na, ke ti koo ni Uwumbɔr aah bi nin chee na. 21Ti kpa utotoorninkpil u joo timi bi ye Uwumbɔr aanib na. 22Nima pu na, cha tisui li bi mbamɔm, aan ki duun Uwumbɔr chee, ki gaa u ki kii mbamɔm ki taa joo beeni; ba pu? Yesu Kristo aasin finn tisui ni aatunwambir, timi aalandak taa ki li muk timi titunwambir pu. Le bi finn timi aawon nnyun chain. 23Taah bui ke ti kpa limakl na, cha ti li joo limakl ngbaan iŋaal ilee ki taa joo beeni. Ba pu? Uwumbɔr u puu tipuul ki tii timi na, u ga sil tii timi waah puu tipuul ti na. 24Cha titafal li bi tɔb pu man, aan ki fiin tɔb aasui, aan ki li gee tɔb, ki tun lituln li ŋan na. 25Cha ti li beenin kuuni tɔb chee ki ti doon Uwumbɔr man, ki taa di cha, ke binib bibaa aah di cha pu na. Ni li pɔɔni tɔb aataakpab man. Ni kan ke bundaln Yesu Kristo ga gir ni na peeni. Nima na, ni li moo pɔɔni tɔb aataakpab man. 26Tɔ, unii yaa gaa Uwumbɔr aaliin, ki yaa ki yii, ki tun titunwambir kigaak kan, kitork kibaa aa ki bi, ki ga cha Uwumbɔr di cha pinn u. 27U ga kan ntafadaan mu kpa ijawaan na; ba pu? Uwumbɔr ga gee liŋuul saakpen, ki ga di binib bi yii waamɔb na, ki di ŋa mmii mu ton saakpen na ponn ni. 28Unii ubaa yaa nan yii Moses aakaal kan, bisiiraadam bilee, bee bitaa, yaa len kan, le bi ku u, kaa san u kinimbaak. 29Unii yaa lik Uwumbɔr Aajapɔɔn fam kan, ki yaa dak ke Yesu aasin mu ŋa u chain na ye yooli kan, ki yaa sii Uwumbɔr Aafuur nyaan mu san timi kinimbaak na kan, udaan ngbaan ŋeer ntafadaan saakpen ki jer unii u bii Moses aakaal na aah kan pu na. 30Ti bee ke Tidindaan len ke uma le ga daa bitafal, uma le ga teen bi. U ki len ke u ga ji waanib tibɔr. 31Aa yaa lir Uwumbɔr u ye limɔfaldaan na aaŋaal ni kan, ni kpa ijawaan saakpen a. 32Ni teer man n-yoonn mu jer na. Buyoonn ninimbil woln njan na, ni nan ji falaa saakpen a, ki nan kpa limɔr. 33N-yoonn mbaa bi ŋa nimi bakaa, ki sii nimi binib aanimbil ni. N-yoonn mbaa mu ni yakr binib bi jin falaa kena na aafalaa la, 34ki san binib bi bi kiyondiik ni na kinimbaak. Binib aah gaa nimi aawan mpɔɔn pu na, le ni nan kpa mpopiin; ba pu? ni bee ke ni kpa tiwan paacham ni jer baah gaa ni na, ke tiwan ngbaan ga li bi n-yoonn mu kaa kpa ndoon na. 35Ni taa di nimi aapoobil lii man; ba pu? nima le ga cha ni kan tinyoor saakpen. 36Ni ban ni li kpa limɔr, aan ki ŋa Uwumbɔr aageehn, aan ki kan waah puu tipuul ti na. 37Uwumbɔr aagbaŋ len ke "Naan yunn, un choo na ga fuu ni, kaan taan. 38Binib bi gaa Uwumbɔr ki kii na le ŋan u chee ki ga li kpa limɔfal. Unii ubaa mu yaa gir puwɔb kan, waan piir Uwumbɔr aasui." 39Tima kan, taa ye binib bi gir puwɔb aan ki bee yooli. Ti ye binib bi gaa Uwumbɔr ki kii aan ki ŋmar na.

will be added

X\