GALASIA YAAB 6

1Nnaabitiib, bi yaa pii unii titunwambir ni kan, nimi bi nyi Uwumbɔr aasan mbamɔm na, ni li bi suuna ki ter u un ki dii mbamɔm, ki li lik aabaa, Kinimbɔŋ taa tɔŋ aa mu. 2Ni li ter tɔb ke bin dii Uwumbɔr mbamɔm, aan ki gbiin Kristo aakaal. 3Unii u kaa bi tibɔr tibaa ni na yaa dak ke u ye uninyuun kan, u ŋmanni ubaa la. 4Cha unii mɔmɔk dakl lik waatuln ŋan aan laa ŋan. Li yaa ŋan kan, u ga li kpa mpopiin uma ubaa aatuln pu. U taa nyu baalaa ke waatuln ŋan ki jer una aabo yaan. 5Ba pu? unii mɔmɔk kpa uma ubaa aatuln la. 6Tɔ, binib bi bae Uwumbɔr aaliin na, cha bin yakr baah kpa ni na ki di tii unii u tuk bi Uwumbɔr aaliin na. 7Tɔ, ni taa ŋmanni nibaa; ni taa dak ke ni ga ŋma ŋmann Uwumbɔr; tiwan ni aa bun na, nima le aa ga nan chee. 8Maah len pu na le ye ke unii yaa ŋani waabimbikpok aah ban pu na kan, u ga kan falaa u kaa kpa ndoon na. Unii yaa ŋani Uwumbɔr Aafuur nyaan aah ban pu na kan, u ga kan limɔfal li kaa kpa ndoon na. 9Cha ti tun lituln nyaan ki taa di cha; ba pu? ti yaa kaa di cha kan, ni nan saa naayoonn kan, ti ga kan tinyoor la. 10Nima na, ti yaa kan nsan kan, ti li ŋani binib mɔmɔk tiŋann. Bin gaa Yesu ki kii na, ti li ŋani bima le tiŋann saakpen. 11Lik, m di min mbaa aaŋaal, ki ŋmee nin filk na tii nimi. 12Binib bi muk nimi ke ni li geei ŋichakpan na, bi ban ke bin piir Juu yaab aasui, aan bi taa ŋa bi falaa Kristo aadɔpuinkoo aaliin pu. 13Binib ngbaan, bi geei ŋichakpan la; le bima bibaa aa dii Moses aakaal mɔmɔk. Bi po ban ni li geei ŋichakpan, aan bi li nyu baalaa ke ni ŋa kena. 14Mma kan, m ga nyu baalaa tiwan nibaa baanja le pu, ke Tidindaan Yesu Kristo nan kpo ndɔpuinkoo pu. Waadɔpuinkoo pu, dulnyaa wee ni aawan aa ki mɔ m chee. Ntafal aa ki bi dulnyaa wee ni aawan ni. 15Unii yaa dii Yesu Kristo aasan kan, lichakpangee aa ye tibɔrkpaan, unii yaa kaa gii kan, ni mu aa ye tibɔrkpaan. Mbimbipɔɔn le ye tibɔrkpaan. 16Binib bimɔk kii kena na le ye Uwumbɔr aanib, ki ye Israel yaab bamɔnn. Uwumbɔr tii bi nsuudoon ki san bi kinimbaak. 17Tɔ, ubaa taa ki muk mi; ba pu? binib aah gbaa mi na aabue bi nwon pu, ki mɔk ke m ye Tidindaan Yesu yoo. 18Nnaabitiib, Tidindaan Yesu Kristo ŋa tinyoor ŋa ni pu. Amii.

will be added

X\