GALASIA YAAB 4

1Maah len pu na le ye ke ubo u ga ji lifaal na le yeh ute aawan mɔmɔk; le waah laa ye ubo buyoonn na, waa jer unaagbiija. 2U bi waaninkpiib ni tiichatiib aaŋaal ni, ki nan saa nwiin mu ute siin u mu na. 3Ti mu bi kena la. Buyoonn taa nan kee nyi Yesu aabɔr na, dulnyaa aakaal nan joo timi tinaagbiir la. 4Naah nan ŋeer n-yoonn mu na, le Uwumbɔr nan tun ni Ujapɔɔn. Upii le nan ma u. Juu yaab aakaal le nan joo u, 5ke un gaa binib bi dii nkaal ngbaan na ki lii, aan Uwumbɔr ŋa timi waabim. 6Taah ye Uwumbɔr aabim na, le Uwumbɔr tun ni Ujapɔɔn Aafuur nyaan tisui ni. Muma le cha ti yi Uwumbɔr ke Tite. 7Nima pu na saa ki ye unaagbiija. Aa ye Uwumbɔr aabo la. Saah ye waabo na, aa ga ji waafaal [Kristo pu]. 8Buyoonn naa nan kee nyi Uwumbɔr na, ŋiwaa ŋi kaa ye Uwumbɔr na nan joo nimi tinaagbiir la. 9Dandana wee ni nyi Uwumbɔr la. Le u mu nyi nimi. Ba ŋa ni ban ni labr ki ki dii dulnyaa aakaal mu kaa kpa mpɔɔn kaa ŋma ter nimi na? Ba ŋa ni ban ke nkaal ngbaan ki joo nimi tinaagbiir? 10Ni joo nwiin aakpakool, ki joo uŋmal mu aakpakool, ki joo libiln mu aakpakool la. 11M nan tun Uwumbɔr aatuln linimaln nikaasisik ni la. Le ni muk mi nsui ni, ke nibaakan maatuln ga ŋa yooli la. 12Nnaabitiib, m nan di ŋikoobil ngbaan mɔmɔk ki di lii, ke m li bi ke naah bi pu na. M gaŋni nimi, ni mu li bi ke maah bi pu na, ki taa ki dii ŋikoobil ngbaan. Ni ye mbamɔn la, naa ŋa mi bakaa ubaa. 13Idabur nan joo mi. Ni nyi ke idabur ngbaan tii mi nsan ke m dan nan tuk nimi Yesu aabɔnyaan njan. 14Le ni ŋa mi tibulchin, kaa lik mi fam, kaa yii mi ke m ye iween aanii. Ni gaa mi ke naah ba ga gaa Uwumbɔr aatuun bee Yesu Kristo pu na. 15Ni nan kpa mpopiin m pu la. Mpopiin ngbaan ki bi la chee dandana wee? M nyi ke ni yaa ba ga ŋma chuu lukr nimi aanimbil ngbaan ki di tii mi kan, ni ba ga chuu lukr ki di tii mi. 16Dandana wee, maah sur nimi ki tuk nimi mbamɔn na, nima le cha m kpaln nimi aadin aa? 17Binib bi tuk nimi tibɔr yaayan na, binimbil man ni pu la. Baabɔr mu aa ŋan. Bi ban ke bin nyan nimi Yesu aasan ni. Bi ban ke ninimbil li man bi pu, ni dii bi. 18Binib aanimbil yaa man bin ti ter nimi Uwumbɔr aasan ni kan, nima le ŋan. Ni ŋan maah bi ni chee buyoonn na, ki ŋan maah kaa bi ni chee buyoonn na mu. 19Maabim, ni wu mi ke imalween aah chuu upii kan ni wu pu na, ki nan saa buyoonn ni chikr Kristo aasan ni na. 20M ban ke m li bi ni chee dandana wee, ki len ni chee; ba pu? m nyi ni dii mbamɔm aan naa dii? 21Nimi bi ban ni dii Moses aakaal na, naa nyi nkaal ngbaan aah len pu na aa? 22Uwumbɔr aagbaŋ len ke Abraham nan kpa japɔɔtiib bilee. Unaagbiipii nan ma ubaa, mmaal aabo mu ma uken. 23Unaagbiipii ngbaan ma kan, u po ma ubijabo binib aageehn pu la. Mmaal aabo ma kan, Uwumbɔr nan puu tipuul tii u ke u ga ma ubijabo, le u ma u. 24Bipiib bilee ngbaan aabɔr kpa ŋitaa la. Unaagbiipii bi yi u ke Hagar, u ma nnaagbiibim. Hagar ŋaŋ Moses aakaal la. Kinye pu? Moses aakaal joo binib tinaagbiir la. Uwumbɔr nan tii Moses nkaal ngbaan Sainai aajool paab. 25Sainai aajool bi Arabia aatiŋ ni. Hagar aabim mu nan bi nima. Jerusalem aatiŋ ki bi dulnyaa ni na naahn unaagbiipii Hagar la; kinye pu? Jerusalem aanib ye binaagbiib la. Moses aakaal le joo bi tinaagbiir. 26Le Jerusalem ki bi paacham na aanib ye mmaal aabim. Timi le ye waabim. 27Ni ŋmee Uwumbɔr aagbaŋ ni ke "Upii u kaa ma mbim na, u li kpa mpopiin! Imalween aah kaa chuu upii u na, u li tar mpopiin ngbaan pu; ba pu? upii uyaachal yii u na aabim wiir, ki jer un kpa chal na aabim." 28Nnaabitiib, ti bi ke mmaal aabijabo Aisak aah nan bi pu na; kinye pu? Uwumbɔr aah puu tipuul ti na le cha ti ye waabim. 29N-yoonn ngbaan unaagbiipii aabijabo nan muk mmaal aabijabo Aisak u bi nan ma u Uwumbɔr Aafuur nyaan aapɔɔn pu na. Dandana wee, ni bi kena la. Binib bi dii Juu yaab aakaal na, bi muk timi bi ye Uwumbɔr aabim Waafuur nyaan aapɔɔn pu na. 30Uwumbɔr aagbaŋ len kinye? Ki len ke Uwumbɔr nan bui Abraham, "Jenn unaagbiipii na ni waabo; ba pu? unaagbiipii aabo na aan li kpa lifaal mmaal aabo na chee." 31Nnaabitiib, maah len pu na le ye ke taa ye unaagbiipii aabim, ti ye mmaal aabim la.

will be added

X\