GALASIA YAAB 3

1Galasia aatiŋ aanib, bijɔrb, ŋmaa ŋmann nimi, ni taa ki dii mbamɔn? Ti nan tuk nimi Yesu Kristo aah nan kpo ndɔpuinkoo pu, pu na. Ni bi ke ninimbil aah kan le na. 2Cha m baa nimi mbaan mbaa. Naah dii Moses aakaal na le cha ni gaa Uwumbɔr Aafuur nyaan aan naah ŋun Yesu aabɔnyaan tee ki gaa u ki kii na le cha ni gaa? 3Uwumbɔr Aafuur nyaan aapɔɔn pu, le ni nan piin ki dii waasan. Ni ye bijɔrb ki dak ke ni ga ŋma dii u nimi nibaa aapɔɔn pu uu? 4Uwumbɔr aah tun litukpaan le ki tii nimi na, ni ye fam aa? M mak ke laa ye fam. 5Uwumbɔr nan tii nimi Waafuur nyaan ki tun lijinjiir aatun nikaasisik ni la. Naah dii Moses aakaal na le cha u ŋani kena aan naah ŋun Yesu aabɔnyaan tee ki gaa u ki kii na le cha u ŋani kena? 6Ni ŋmee Uwumbɔr aagbaŋ ni ke Abraham gaa Uwumbɔr ki kii, nima le cha Uwumbɔr len ke waabɔr ŋan. 7Nimina mɔk timi ke binib bi gaa Uwumbɔr ki kii na, bima le ye Abraham aayabitiib. 8Ni ŋmee Uwumbɔr aagbaŋ ni ke Uwumbɔr nan bee ke bin kaa ye Juu yaab na ga nan gaa u ki kii ki ŋmar. Baah kaa nan kee gaa u ki kii buyoonn na, le u nan puen tuk Abraham tibɔnyaan tee, ki bui u, "Aa pu, le m ga ŋa tinyoor ki ŋa ŋitimbol mɔmɔk aanib pu." 9Nima pu na Uwumbɔr ga ŋa tinyoor ki ŋa binib bi gaa u ki kii na pu, ke waah ŋa tinyoor ki ŋa Abraham u gaa u ki kii na pu na. 10Tɔ, binib bimɔk dii Moses aakaal ke bin ŋmar na, tibɔbil bi bi pu la. Ni ŋmee Uwumbɔr aagbaŋ ni ke "Unii umɔk kaa dii nkaal mumɔk bi Nkaal aagbaŋ ni na kan, tibɔbil bi u pu la." 11Ni ye mbamɔn la, unii yaa dii Moses aakaal kan, nima le aan cha Uwumbɔr len ke waabɔr ŋan. Ni ŋmee Uwumbɔr aagbaŋ ni ke "Unii u gaa Tidindaan ki kii na, Uwumbɔr ga len ke udaan aabɔr le ŋan, uma le ga kan limɔfal li kaa kpa ndoon na." 12Moses aakaal bi, le ki cha naadii. Nkaal ngbaan len ke unii u dii mu mbamɔm na ga li kpa limɔfal. 13Ti bii nkaal ngbaan la. Nima le tibɔbil bi ti pu. Le Kristo nyan timi tibɔbil ngbaan ni; kinye pu? u nan kpo ti pu ki di tibɔbil ngbaan di ŋa uma ubaa aayil pu, ke baah nan ŋmee Uwumbɔr aagbaŋ ni pu na, ke "Unii umɔk bi kpaa u ndɔpuinkoo pu na, tibɔbil bi u pu la." 14Uwumbɔr nan ŋa tinyoor ki ŋa Abraham pu. Le Yesu Kristo nan kpo ti pu ke bin kaa ye Juu yaab na mu kan tinyoor ngbaan. Le ti yaa gaa Yesu ki kii kan, ti ga gaa Uwumbɔr Aafuur nyaan, waah nan puu tipuul ti ke u ga tii timi na. 15Nnaabitiib, m ga di binib aabɔr, ki di ŋaŋ Uwumbɔr aabɔr aah bi pu na la. Unii yaa puu tipuul, ki puu ke u ga sil ŋa kena kan, ubaa aan ŋma kpeln ti, kaan ŋma ŋa ti yooli. 16Uwumbɔr nan puu tipuul ki tii Abraham ni uyabil la. Waa len ke uyabitiib, kaa len ke kinipaak, u len ke unibaan la. U len ke uyabil. Uma le ye Kristo. 17Maah len pu na le ye ke Uwumbɔr nan puu tipuul, ki puu ke u ga sil ŋa kena [Kristo pu]. Ŋibin ikub inaa ni ŋibin piitaa aah jer na, le u tii binib nkaal na. Nkaal ngbaan aa ŋa tipuul ngbaan yooli. 18Tipuul ngbaan pu le Uwumbɔr tii Abraham lifaal. Nima le mɔk ke u ga tii ti mu lifaal tipuul ngbaan pu. Naa ye ke ti dii nkaal ngbaan la, le ga cha u tii timi. 19Ni yaa ye kena kan, ba pu Uwumbɔr tii binib nkaal ngbaan? U tii bi nkaal ngbaan ke bin bee titunwambir aah ye pu na. U ban ke nkaal ngbaan li bi ki nan saa buyoonn Abraham aayabil fuu ni na. Abraham aayabil ngbaan le Uwumbɔr nan puu tipuul ngbaan tii u. Uwumbɔr nan cha waatuuntiib di nkaal ngbaan ki di tii Moses, ke un tii binib. 20Uwumbɔr nan cha waatuuntiib ni Moses le tii binib nkaal ngbaan. Uwumbɔr ubaa le nan puu tipuul na ki tii Abraham. 21Moses aakaal kpak Uwumbɔr aah puu tipuul ti na aa? Aayii. Nkaal ngbaan yaa ba ŋma tii timi limɔfal kan, nkaal ngbaan pu le ti ba ga ŋmar. 22Tɔ, Uwumbɔr aagbaŋ len ke dulnyaa aanib mɔmɔk ye titunwambirdam la, ke Uwumbɔr aah nan puu tipuul ti na, u ga ŋa tinyoor ki ŋa binib bi gaa Yesu Kristo ki kii na pu. Binib bi gaa u ki kii na, bima le u ŋa tinyoor ki ŋa bi pu. 23Buyoonn Yesu aa nan kee fuu ni na, Moses aakaal nan dii timi ki nan saa buyoonn Yesu nan dan dulnyaa ni na ke ti gaa u ki kii. 24Nkaal ngbaan nan ye ukikiir ki kii timi, ki nan saa buyoonn Yesu fuu ni na, aan ti gaa u ki kii le ki ŋmar. 25Dandana wee Yesu le ti gaa ki kii. Moses aakaal aa ki kii timi. 26Nimi bimɔk gaa Yesu Kristo ki kii na, u pu le ni ye Uwumbɔr aabim. 27Baah nan muin nimi nnyun ni Kristo aayimbil pu na, ni gaa Kristo aabimbin la. 28Naah kpaan Yesu Kristo ni na, ni mɔmɔk ye unibaan la. Juu yaab ni bin kaa ye Juu yaab na, ni binaagbiib ni mmaal aabim, ni bijab ni bipiib, ni mɔmɔk ye unibaan la. 29Ni ye Kristo aanib la. Nima le ni ye Abraham aayabitiib. Le ni ni u ga ji lifaal li Uwumbɔr nan puu tipuul ke u ga tii nimi paacham na.

will be added

X\