GALASIA YAAB 2

1Ŋibin kipiik ni ŋinaa aah jer na, le m ni Banabas gir buen Jerusalem. Taitus mu dii timi. 2Uwumbɔr nan tuk mi ke m buen Jerusalem. Nima le cha m buen. Le m ni Yesu aanib aaninkpiib kuun tɔb chee tibaa, le m ŋeer tuk bi tibɔnyaan ti m mooni binib bi kaa ye Juu yaab na; ba pu? m ban ke bininkpiib ngbaan kii maah tun Uwumbɔr aatuln pu na, maatuln taa bee fam. 3Tɔ, Taitus u nan bi m chee na, u ye Griik aanii la. Le Yesu aanib aaninkpiib ngbaan aa muk u ke un gii uchakpaln. 4Binib bibaa bi ŋmanni ke bi dii Yesu Kristo ki kpaan ti chee na, bima le nan ban ke bin gii u. Bi kpaan ti chee ke bi lik taah gaa tibaa pu ki dii Yesu aasan kaa ki dii Moses aakaal na. Le bi nan ban bin muk timi ti ki dii Moses aakaal. 5Le taa kii baah ban pu na kpaala. Taa nan ban unii ubaa kpeln Yesu aabɔnyaan tee ki tuk nimi tibɔr yaayan. 6Yesu aanib aaninkpiib bi kpa liyimbil na, (baah bi pu na, naa ye nibaa m chee; ba pu? Uwumbɔr aa pak ubaa ki jer uken,) binib ngbaan aa len ke m di tibɔr tibaa ki kpee maah mooni tibɔr ti na pu. 7Bi bee ke Uwumbɔr lee mi ke m di Yesu aabɔnyaan ki tuk bin kaa ye Juu yaab na, ke waah nan lee Piita un ti tuk Juu yaab pu na. 8Uwumbɔr u tii Piita mpɔɔn ke un ti tuk Juu yaab Yesu aabɔnyaan na, uma le tii m mu mpɔɔn ke m tuk bin kaa ye Juu yaab na. 9Le Jems ni Piita ni Jɔnn bi ye Yesu aanib aaninkpiib na, bi bee Uwumbɔr aah ter mi waatuln ponn ni pu na, le bi di biŋaal ki tii m ni Banabas ke naabitiib pu na, ke ni ŋan ke ti buen bin kaa ye Juu yaab na chee, bi mu le ga buen Juu yaab chee. 10Bi ban ke ti li teer ki ter binib bi ye bigiim bi ponn ni na. M mu aanimbil man ke m ter bi. 11Tɔ, Piita aah fuu ni Antiok aatiŋ ni na, le m kpak u; ba pu? u nan kpa taani la; 12ba pu? bijab bibaa bi nyan ni Jems chee na aa nan kee fuu ni buyoonn na, u nan jin bin kaa ye Juu yaab na chee tijikaar. Bijab ngbaan aah fuu ni na, le u nyan bin kaa ye Juu yaab na chee, kaa ki ji bi chee tijikaar; ba pu? u san Juu yaab bi nyan ni Jems chee na ijawaan. 13Le Juu yaab bi nan bi Antiok aatiŋ ni na mu ŋani Piita aah ŋa pu na la. Bi nyi nin ŋan na, le kaa ŋani ni. Bi cha Banabas mu yenn. 14M kan ke baa dii Yesu aabɔnyaan mbamɔm. Le m tuk Piita bi mɔmɔk aanimbil ni, "Aa ye Juu aanii la. Aa yaa dii bin kaa ye Juu yaab na aah dii pu na, kaa ki dii Juu yaab aasan kan, ba ŋa aa muk bin kaa ye Juu yaab na ke bin dii Juu yaab aasan?" 15Tɔ, ti ye Juu aamaal ni la. Taa ye bin kaa ye Juu yaab bi ye titunwambirdam na; 16le ti mu bee ke unii yaa dii Moses aakaal kan, nima le aan cha Uwumbɔr len ke waabɔr ŋan. Unii yaa gaa Yesu Kristo ki kii kan, nima le ga cha Uwumbɔr len ke waabɔr ŋan. Le ti gaa Yesu Kristo ki kii; ba pu? taah gaa u ki kii pu na, nima le cha Uwumbɔr len ke timi aabɔr ŋan, naa ye ke ti dii Moses aakaal mbamɔm le cha u len; ba pu? Uwumbɔr aan len ke unii ubaa aah dii nkaal ngbaan pu na le cha waabɔr ŋan. 17Taah kpaan Kristo chee ke ti ŋmar pu na, nima le mɔk ke timi Juu yaab ye titunwambirdam ke bin kaa ye Juu yaab na mu aah ye pu na. Nimina ŋmɔk ke Kristo ban titunwambir aa? Aayii. 18M nan yii Moses aakaal ki dii Yesu aasan la. M yaa ki dii nkaal ngbaan kan, nima le ga ŋa mi utunwambirdaan. 19Maa ki dii nkaal ngbaan ke unii u kpo na aah kaa ki dii pu na. Ni naahn ke nkaal ngbaan ku mi. M yii nkaal ngbaan ke m li bi Uwumbɔr aah ban pu na la. 20M nan kpo Kristo chee ndɔpuinkoo pu, le m mu beenin fu; naa ki ye min Pɔɔl le fu. Kristo le fu m ni. Uma Uwumbɔr Aajapɔɔn u gee mi ki nan kpo m pu na, uma le m gaa u ki kii; nima pu le m bi. 21Maa yii Uwumbɔr aanimbaasaln. Maah len pu na le ye ke unii yaa bui ke waah dii Moses aakaal na nima le ga cha u ŋmar kan, u bui ke Yesu nan kpo fam le na.

will be added

X\