EFESUS YAAB 6

1Mbim, ni li keei nitetiib ni ninatiib aamɔi Tidindaan pu; ba pu? nima le ŋan. 2Li pak aate ni aana. Nkaal ngbaan ye nkaalkpaan la. Uwumbɔr puu tipuul ke bi yaa kii mu kan, 3u ga ŋa tinyoor ki ŋa bi pu, ki tii bi limɔfal fɔfɔk dulnyaa wee ni. 4Bijab, ni taa fiin nimi aabim aaŋuul. Ni li joo bi mbamɔm, ki sur bi, ki tuk bi Tidindaan aaliin. 5Binaagbiib, ni li keei nidindaatiib bi bi dulnyaa wee ni na aamɔi, ki li san bi, ki tun lituln mbamɔm, ke naah tun lituln pu ki tii Kristo na. 6Bi yaa bi ni chee, ke bi yaa kaa bi kan, ni li tun lituln mbamɔm, ke naah ga tun ki tii Kristo pu na, ki taa ban ke binib pak nimi. Naah ye Kristo aanaagbiib na, ni li ŋani Uwumbɔr aageehn nisui mɔmɔk, 7ki li tun lituln ki tii nidindaatiib ni mpopiin, ke naah ga tun pu ki tii Tidindaan na, naa ye binib. 8Teer man, ke unii umɔk tun lituln nyaan na, u yaa ye unaagbiija bee kinamalk kan, Tidindaan ga tii u waatuln aapar. 9Dindaatiib, ni mu li ŋani nimi aanaagbiib mbamɔm, ki taa faani bi, ki li nyi ke ni ni nimi aanaagbiib kpaan Dindaanbaan le paacham. Uma aa pak ubaa ki jer uken. 10Nnaabitiib, gbilngbiln yaan, Tidindaan aah kpa mpɔɔn saakpen pu na, ni li kpa mpɔɔn mu u tii nimi na. 11Yoor man tijaawan timɔk Uwumbɔr tii timi na. Nima le ga cha ni ŋma yii Kinimbɔŋ aanyaamɔn aalan. 12Naa ye binib le ti jaa kijaak. Ti jaa Kinimbɔŋ aanikpiwambir ti bi paacham ki kpa mpɔɔn ki joo dulnyaa aanib bi bi mbɔmbɔɔn ni na. 13Nima pu na, ni li yoor tijaawan timɔk Uwumbɔr tii timi na. Nima le ga cha ni yii Kinimbɔŋ, ki nyaŋ u ki li beenin si bundaln u ga jan nimi kijaak na. 14Nima pu na, gor nibaa man ki ti jan kijaak. Ni li joo Uwumbɔr aaliin i ye mbamɔn ki naahn ligbapapaln na; ki li kpa mbimbin nyaan mu bi ke tikur ti biin kibiŋ pu na; 15ki li tak ŋinaatak ŋi ye tibɔnyaan ti tii timi nsuudoon na; 16ki li ŋani Yesu Kristo naadii, naadii bi ke kipiln ki ga kiir Kinimbɔŋ aapiihn i wu ke mmii na; 17ki li chik tikur aayikpupuk ki ye Uwumbɔr aapɔɔn mu cha ni ŋmar na; ki yoor Uwumbɔr aaliin i naahn kpaacha u Waafuur nyaan tii timi na; 18ki li mee Uwumbɔr ki gaŋni u ke un ter nimi. N-yoonn mɔmɔk ni li mee u mbimbin mɔmɔk pu. Waafuur nyaan aah mɔk nimi pu na, ni li mee u kena, ki taa geeni man, ki taa di cha man. Ni li mee u n-yoonn mɔmɔk ki tii waanib mɔmɔk, 19ki li mee u ki tii m mu, ke un mɔk mi maah ga len pu na, ki tii mi lipoobil ke m waar mmɔb ki tuk binib tibɔnyaan tee aabɔbɔrkaan. 20M si Yesu aasisiiyaan, ki bi kiyondiik ni tibɔnyaan ngbaan pu la. Nima pu na, ni li mee Uwumbɔr ke un tii mi lipoobil, ke m tuk binib tibɔnyaan ngbaan, maah ba ga tuk bi pu na. 21Tinaabogeen Tikikus u ye Tidindaan aatutuln bamɔnn na, uma le ga tuk nimi maabɔr mɔmɔk, le ni bee maah bi pu na. 22Nima le m cha u buen ni chee, ke un tuk nimi taah bi pu na, aan ki sɔŋ nisui. 23Tite Uwumbɔr ni Tidindaan Yesu Kristo tii tinaabitiib nsuudoon, ki cha ni li gee tɔb ki gaa u ki kii mbamɔm. 24Tidindaan Yesu Kristo ŋa tinyoor ki ŋa binib bimɔk gee u n-yoonn mu kaa kpa ndoon na pu.

will be added

X\