EFESUS YAAB 3

1Nima pu na, min Pɔɔl, m mee Uwumbɔr tii nimi la. M ye Yesu Kristo aayom, nimi bi kaa ye Juu yaab na pu. 2M dak ke ni ga li ŋun Uwumbɔr aah san mi kinimbaak pu na, ki cha m tuk nimi waah gee nimi pu na. 3U nan kpiir tibɔbɔrkaan ki mɔk mi la. M puen ŋmee ti kigbaŋ kee ponn ni iliin siib. 4Ni yaa karn maah ŋmee pu na kan, ni ga bee maah nyi Kristo aabɔbɔrkaan pu na. 5Uwumbɔr aa nan kpiir tibɔbɔrkaan ngbaan ki mɔk n-yaayoonn na aanib. Dandana wee Waafuur nyaan kpiir ti, ki mɔk Yesu aakpambalb ni waabɔnabtiib bi bi chain na. 6Tibɔbɔrkaan ngbaan le ye ke timi Juu yaab ni nimi bi kaa ye Juu yaab na bin gaa Yesu aabɔnyaan tee na, ga kpaan ki yakr Uwumbɔr aafaal, ki kpaan ki ye Yesu Kristo aanib, ki kpaan ki bi Uwumbɔr aah nan puu tipuul ti na ni, Yesu Kristo pu. 7Uwumbɔr aanimbaasaln pu, le u san mi kinimbaak ki ŋa mi tibɔnyaan tee aatutuln, ki tii mi mpɔɔn ke m tun lituln ngbaan. 8Maa pii Uwumbɔr aaniwaatiir ubaa, le u mu tii mi lituln nyaan limina, ke m buen bin kaa ye Juu yaab na chee, ki ti moon tibɔnyaan tee, ki tuk bi Kristo aah ŋan saakpen pu na, 9ki kpiir mɔk binib mɔmɔk tibɔbɔrkaan, ke bin kaa ye Juu yaab na mu ga ŋmar. Uwumbɔr u nan naan tiwan mɔmɔk na, nan bɔr tibɔbɔrkaan ngbaan ki nan saa dandana. 10U ŋa kena ke waatuuntiib bi bi paacham na yaa kan Juu yaab ni bin kaa ye Juu yaab na aah kpaan tɔb chee ki ŋa Yesu aanib pu na kan, bi ga bee Uwumbɔr aah kpa nlan mɔk aaboŋ pu na. 11N-yaayoonn na le u nan len ke u ga ŋa kena Tidindaan Yesu Kristo pu. 12Taah gaa Yesu ki kii ki kpaan u ni na, nima le ti kpa lipoobil ke ti dan Uwumbɔr chee ki doon u, ki taa li san ijawaan. 13Nima pu na m gaŋ nimi, ni taa cha nitaakpab yɔl maah ji falaa ni pu, pu na. Maafalaa le ye nimi aaterm. 14Nima pu na, le m gbaan Tite Uwumbɔr u ye Tidindaan Yesu Kristo Aate na aanimbiin ni. 15Waah ye Tite na, nima le mɔk timi te aabimbin bamɔnn aah bi pu na. 16Waah kpa mpɔɔn saakpen pu na, le m mee u ke un tii nimi mpɔɔn nisui ni, Waafuur nyaan pu, 17le ki mee u ke Kristo li bi nisui ni, naah gaa u ki kii pu na, le ki mee u ke ngeehn li bi ni chee, 18le ki mee u ke ni ni waanib mɔmɔk ŋma bee Kristo aah gee nimi saakpen pu na. 19Waah gee timi pu na jer unii aah ga ŋma bee pu na. M mee Uwumbɔr ke un di waabimbin nyaan ki gbiin nimi. 20Waapɔɔn aah bi tisui ni ki tun lituln pu na, u ga ŋma ŋa saakpen ki tii timi ki jer taah ga ŋma dak ke ti mee u pu na. 21Yesu Kristo aanib aah kpaan u ni na, bi li nyuŋni Uwumbɔr n-yoonn mɔmɔk ki ti saa dulnyaa wee aadoon, ki li nyuŋni u n-yoonn mu kaa kpa ndoon na. Amii.

will be added

X\