LITULN 6

1Idaa mɔmɔk le binib bibaa gaa Yesu ki kii ki kpee waadidiliib pu. N-yoonn ngbaan le Juu yaab bi len Griik aaliin na ŋuli Juu yaab bi len Juu aaliin na pu, le ki bui ke baah yakr tijikaar idaa mɔmɔk na, bi sunn baakpopiibɔr. 2Le Yesu aakpambalb kipiik ni bilee yin Yesu aadidiliib mɔmɔk, ke bin kuun bi chee, ki bui bi, "Naa ŋan ti li yakr tijikaar ki di cha Uwumbɔr aaliin. 3Nnaabitiib, nima pu na, ni lee bijab bilule ni ponn ni. Ni lee bijab bilule bi gbiin Uwumbɔr Aafuur nyaan, ki kpa nlan mbamɔm, ki kpa liyimbil, ki cha bi li ye lituln ngbaan aaninkpiib. 4Timi tibaa, ti ga mann tinimbil ki mee Uwumbɔr, ki tuk binib waaliin." 5Yesu aakpambalb aah len pu na, le ni piir bi mɔmɔk aasui. Le bi lee uja ubaa, bi yi u ke Stiifen, u gaa Yesu ki kii mbamɔm ki gbiin Uwumbɔr Aafuur nyaan. Bi lee Filip mu, ni Prokorus, ni Nikanor, ni Timon, ni Pamenas, ni Nikolas, u ye Antiok aatiŋ aanii na. Waa ye Juu aanii. U nan kpaln le ki dii Juu yaab aasan. 6Le bi lee bijab bilule bimina, ki cha bi sil Yesu aakpambalb aanimbiin ni. Le bi mee Uwumbɔr tii bi, ki di biŋaal ki di paan bi pu. 7Le Uwumbɔr aaliin nan mooni ni kookoo. Le binib gaa Yesu ki kii ki wiir, ki kpae waadidiliib pu Jerusalem ponn ni. Le Uwumbɔr aatotoortiib pam mu gaa Yesu aabɔnyaan tee ki kii. 8Le Uwumbɔr ter Stiifen mbamɔm, ki tii u mpɔɔn saakpen, ki cha u tun lijinjiir aatun Juu yaab aakaasisik ni. 9Le Juu yaab bibaa fii ki kpak u. N-yoonn mbaa, Juu yaab ngbaan nan ye binaagbiib, kaa ki ye. Bi nyan ni Sairene aatiŋ ni, ni Aleksandria aatiŋ ni, ni Silisia aatiŋ ni, ni Asia aatiŋ ni. Le bi kpak Stiifen kinikpakpak. 10Le Uwumbɔr Aafuur nyaan aah tii Stiifen nlan saakpen pu na, baa ŋma len ki nyaŋ u. 11Nima pu na le bi tii bijab bibaa ŋimombil ke bin mɔn inyaamɔn paan u. Le bijab ngbaan len ke bi ŋun u sii Moses ni Uwumbɔr. 12Baah len pu na, le Juu yaab ni baaninkpiib, ni Uwumbɔr aakaal aamɔmɔkb gee liŋuul Stiifen pu. Le bi dan nan chuu u mpɔɔn, ki di u ki di siin kooti ni aaninkpiib aanimbiin ni, 13le ki joo ni binib bi ga mɔn inyaamɔn paan u. Le bi len ke "N-yoonn mɔmɔk uja wee bii Moses aakaal, ki sii Uwumbɔr aadichal. 14Ti ŋun u len ke Yesu, u ye Nasaret aatiŋ aanii na, ga gbaa wii Uwumbɔr aadichal ngbaan, ki kpeln Moses aah nan tii timi nkaal mɔmɔk na." 15Le kooti ni aaninkpiib mɔmɔk lik Stiifen ki kan unimbil wɔb wiin chain ke Uwumbɔr aatuun aanimbil wɔb na.

will be added

X\